नेपाल हुलाकलाई एपीपीयूको ‘इनोभेसन अवार्ड’

काठमाडौँ । दुर्गम क्षेत्रमा हुलाक सेवा विस्तार गर्दै सरकारी कुरियर सेवाका रूपमा अघि बढाएको पहलको कदरस्वरूप नेपाल हुलाकले एसिया प्रशान्त हुलाक सङ्घ (एपीपीयू) को सन् २०२६ को ‘इनोभेसन अवार्ड’ प्राप्त गरेको छ ।

थाइल्यान्डको बैंककमा गत अगस्ट ३१ देखि सेप्टेम्बर ४ सम्म आयोजित १४औँ एपीपीयू कंग्रेसमा हुलाक सेवा विभागलाई ‘सर्भिस इन रिमोट एरियाज’ शीर्षकमा उक्त सम्मान प्रदान गरिएको विभागकी महानिर्देशक मनमाया भट्टराई पङ्गेनीले जानकारी दिनुभयो ।

सरकारी कुरियर सेवाका रूपमा दुर्गम क्षेत्रसम्म सेवा विस्तार गर्न नेपाल हुलाकले गरेको पहललाई अवार्डको आधार बनाइएको हो । शासकीय सुधारका १०० कार्यसूचीमार्फत सरकारले हुलाक सेवालाई परम्परागत हुलाक सेवाबाट सरकारी कुरियर सेवातर्फ रूपान्तरण गर्ने नीति लिएसँगै विभागले महत्वपूर्ण सरकारी कागजात नागरिकको घरदैलोसम्म पुर्‍याउने सेवा विस्तार गरिरहेको छ ।

राहदानी, सवारी चालक अनुमतिपत्र, शैक्षिक प्रमाणपत्र, स्वास्थ्यसम्बन्धी रिपोर्टलगायत महत्वपूर्ण कागजात नागरिकको घरमै पुर्‍याउने कामलाई अवार्डका लागि महत्वपूर्ण आधार मानिएको महानिर्देशक पङ्गेनीले बताउनुभयो ।

१४औँ एपीपीयू कंग्रेसमा महानिर्देशक पङ्गेनीको नेतृत्वमा नेपालबाट तीन सदस्यीय प्रतिनिधिमण्डल सहभागी भएको थियो । नेपाली प्रतिनिधिमण्डलले विभिन्न सत्रमा नेपालको हुलाक प्रणालीको वर्तमान अवस्था, आधुनिकीकरणका प्रयास, हालसम्म भएका काम तथा सरकारका प्राथमिकताबारे जानकारी गराएको थियो ।

महानिर्देशक पङ्गेनीले नेपालको कठिन भौगोलिक अवस्थाका कारण हुलाक सेवा सञ्चालनमा विभिन्न चुनौती रहे पनि सडक तथा सञ्चार पूर्वाधार कमजोर भएका दुर्गम क्षेत्रमा समेत भरपर्दो सेवा पुर्‍याउन पूर्वाधार निर्माणसहित सुधारका काम भइरहेको बताउनुभयो ।

सरकारी सेवा नागरिकको घरसम्म पुर्‍याउने तथा प्रत्येक सेवा सरल, छिटो र भरपर्दो बनाउने उद्देश्यले हुलाकको भूमिका विस्तार भइरहेको उहाँको भनाइ छ ।

कंग्रेसमा सीमापार विद्युतीय व्यापार तथा क्षेत्रीय हुलाक ढुवानी सञ्जाल विस्तारका विषयमा समेत नेपालले आफ्नो धारणा राखेको थियो । स्थानीय तथा मौलिक उत्पादनलाई अन्तर्राष्ट्रिय बजारसम्म पुर्‍याउन हुलाक सञ्जाललाई प्रभावकारी माध्यमका रूपमा विकास गर्न सकिने विषय नेपालले उठाएको थियो ।

विशेषगरी साना उद्यमी, किसान तथा ग्रामीण समुदायका उत्पादनलाई बजारसँग जोड्न हुलाकले ढुवानीको सेतुका रूपमा काम गर्न सक्ने र क्षेत्रीय विद्युतीय व्यापार तथा हुलाक ढुवानी मार्गमार्फत नेपाली साना उत्पादकका वस्तु एसिया प्रशान्त क्षेत्र हुँदै विश्व बजारसम्म पुर्‍याउन सदस्य राष्ट्रबीच सहकार्य आवश्यक रहेको महानिर्देशक पङ्गेनीले बताउनुभयो ।

कंग्रेसको पूर्ण बैठकमा नेपाललाई विशेष समय उपलब्ध गराइएको थियो । सो अवसरमा महानिर्देशक पङ्गेनीले नेपालमा आएको विनाशकारी बाढीबाट भएको क्षतिबारे समेत जानकारी गराउनुभयो ।

उहाँले विपद्का समयमा सडक, पुल तथा दूरसञ्चार सेवा अवरुद्ध हुँदा हुलाक तथा सञ्चार सञ्जालको महत्व अझ बढ्ने बताउनुभयो । विपद्का समयमा सूचना, राहत सामग्री, औषधि तथा आवश्यक सरकारी सेवा नागरिकसम्म पुर्‍याउन हुलाकको पहुँच महत्वपूर्ण हुने उहाँको भनाइ थियो ।

एपीपीयू कंग्रेसमार्फत नेपालले आधुनिक, भरपर्दो, समावेशी तथा नागरिककेन्द्रित हुलाक प्रणाली निर्माणका लागि अन्तर्राष्ट्रिय सहयोगको आवश्यकता समेत औँल्याएको छ ।

नेपालले प्रविधि हस्तान्तरण, कर्मचारीको क्षमता विकास, डिजिटल प्रणाली, विद्युतीय व्यापार, वातावरणमैत्री प्रविधि तथा विपद् प्रतिरोधी हुलाक पूर्वाधार निर्माणमा सहयोग गर्न अन्तर्राष्ट्रिय समुदायसँग आग्रह गरेको छ ।

१४औँ एपीपीयू कंग्रेसमा एसिया प्रशान्त क्षेत्रका ३२ सदस्य राष्ट्रका प्रतिनिधि सहभागी भएका थिए । कंग्रेसमा क्षेत्रीय हुलाक सेवा आधुनिकीकरण, डिजिटल रूपान्तरण, सीमापार व्यापार, हुलाक ढुवानी तथा सदस्य राष्ट्रबीच सहकार्यलगायत विषयमा छलफल भएको थियो ।