काठमाडौँ । रसुवा लगायत विभिन्न जिल्लामा आएको त्रिशूली बाढी र पहिरोमा परी हालसम्म १ हजार ३ सय ५६ जनाको मृत्यु भएको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरणले शनिबार साँझ ६ बजे सार्वजनिक गरेको पछिल्लो तथ्याङ्कअनुसार विपद्मा परी अझै ४ हजार ९ सय ९४ जना सम्पर्कविहीन छन् ।
प्राधिकरणका अनुसार बाढीबाट सबैभन्दा बढी चितवनमा ३ सय ६३ जनाको मृत्यु भएको छ । नवलपरासी पूर्वमा २ सय २३, नवलपरासी पश्चिममा २ सय २१, नुवाकोटमा १ सय ९७, रसुवामा १ सय ६९, गोरखामा ७५, धादिङमा ७० र तनहुँमा ३८ जनाको शव फेला परेको छ ।
फेला परेका शवमध्ये हालसम्म ९८ जनाको मात्र पहिचान खुलेको छ । पहिचान हुन बाँकी शवको डिएनए परीक्षणका लागि सम्बन्धित जिल्ला प्रहरी कार्यालयमा फोटो र नाता प्रमाणित कागजातसहित सम्पर्क गर्न प्राधिकरणले आग्रह गरेको छ ।
विपद्मा परी हालसम्म ६ हजार ६ सय ७६ जना घाइते भएका छन् । त्यसमध्ये ३ सय २७ जनाको विभिन्न १० वटा अस्पतालमा उपचार भइरहेको छ भने २ सय ४२ जना उपचारपछि घर फर्किएका छन् ।
घाइतेको उपचारमा नेपाली सेनाले ३ हजार ३ सय ७९ जना र सशस्त्र प्रहरीले २ हजार ९ सय ७० जनालाई स्वास्थ्य सेवा प्रदान गरेका छन् । बाढी प्रभावित क्षेत्रबाट हालसम्म १३ हजार ३ सय ९६ जनाको सफल उद्धार गरिएको प्राधिकरणले जनाएको छ ।
रसुवा, नुवाकोट र धादिङमा स्थापना गरिएका ३९ वटा होल्डिङ सेन्टरमा ३ हजार ५ सय ३३ जनालाई सुरक्षित राखिएको छ ।
४,९९४ जना अझै सम्पर्कविहीन
प्राधिकरणका अनुसार सम्पर्कविहीनमध्ये नुवाकोटका २ हजार ३ सय ४०, रसुवाका १ हजार ९ सय ६७, सुरक्षाकर्मी तथा कर्मचारी १ सय र विदेशी पर्यटक ५ सय ८७ जना छन् ।
बेपत्ताको खोजी तथा उद्धारका लागि २१ हजार ४ सय २ जना सुरक्षाकर्मी परिचालन गरिएको छ । यसमा नेपाली सेनाका ९ हजार २ सय ८७, नेपाल प्रहरीका ७ हजार ९ सय १२ र सशस्त्र प्रहरीका ४ हजार २ सय ३ जना रहेका छन् ।
उद्धारका लागि नेपाली सेना तथा निजी क्षेत्रका हेलिकप्टरले हालसम्म १ हजार ४ सय ७९ पटक उडान भरेका छन् ।
राहत र मनोसामाजिक परामर्शमा तीव्रता
सरकारले बाढी प्रभावित क्षेत्रमा राहत वितरणलाई समेत तीव्रता दिएको छ । भदौ २२ गते मात्रै दुईवटा हेलिकप्टर र आठवटा मिनी ट्रकमार्फत खाद्यान्न तथा गैरखाद्यान्न सामग्री प्रभावित क्षेत्रमा ढुवानी गरिएको छ ।
सरकारले रसुवा र नुवाकोटलाई १–१ करोड रुपैयाँ, धादिङलाई ५० लाख रुपैयाँ तथा प्रभावित १५ वटा पालिकालाई कुल १३ करोड ५० लाख रुपैयाँ नगद राहत उपलब्ध गराएको छ ।
विपद्बाट प्रभावित नागरिकमा देखिन सक्ने मानसिक तनाव तथा अन्य मनोसामाजिक समस्यालाई सम्बोधन गर्न १ सय ५० जनाभन्दा बढी स्वास्थ्यकर्मी परिचालन गरिएको प्राधिकरणले जनाएको छ ।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
बाढीपीडितलाई सहयोग गर्ने सन्देशसहित सांस्कृतिक
मकवानपुरमा ट्राफिक कारबाही बढ्दा पनि
संक्रामक पशु रोगबाट प्रभावित किसानलाई
त्रिभुवन विमानस्थलमा दुर्गा प्रसाईँ समर्थक
त्रिभुवन राजपथको सडक भासियो, एकतर्फी
ब्रिक्समा नेपाल नबोलाइनुको कारण भारत