ऐक्यबद्ध भएर बाढी प्रभावित क्षेत्रको पुनरुत्थानमा जुट्नुपर्छः संयोजक दाहाल

 नुवाकोट  नेपाली कम्युनिष्ट पार्टी (नेकपा)का संयोजक एवं पूर्वप्रधानमन्त्री पुष्पकमल दाहाल ‘प्रचण्ड’ले भोटेकोशी हुँदै त्रिशूली नदीमा आएको बाढीबाट भएको क्षतिको पुनरुत्थानका लागि सम्पूर्ण शक्ति एकजुट भएर लाग्नुपर्ने बताउनुभएको छ ।

बाढीबाट धादिङको गल्छीदेखि नुवाकोटको विदुर नगरपालिका–१० भैँसेसम्म पुगेको क्षतिको स्थलगत अवलोकनपछि विदुरमा आज आयोजित सर्वपक्षीय छलफलमा उहाँले बाढीलाई ‘हिमालय विपत्ति’को संज्ञा दिँदै पुनरुत्थानका लागि सबै पक्ष एकजुट हुनुपर्ने बताउनुभयो ।

आपत्कालीन अवस्थामा योजनाबद्ध रूपमा काम गर्न नसकिए पनि बाढीपछि खोज तथा उद्धार, राहत वितरण र होल्डिङ सेन्टर सञ्चालनमार्फत प्रभावित नागरिकलाई गरिएको सहयोग महत्त्वपूर्ण रहेको उहाँले उल्लेख गर्नुभयो । दीर्घकालीन समाधानका लागि अब पुनर्वासको कार्यक्रम अघि बढाउनुपर्ने उहाँको भनाइ थियो ।

“बाढीले ठूलो मात्रामा मानवीय तथा भौतिक पूर्वाधारमा क्षति पुर्‍याएको रहेछ”, संयोजक दाहालले भन्नुभयो, “क्षति पुगेका सडक, पुल, विद्यालयलगायत सामुदायिक तथा सरकारी सेवा जतिसक्दो चाँडो सञ्चालनमा ल्याएर प्रभावित बासिन्दाको दैनिकी सहज बनाउन जोड दिनुपर्छ ।”

बाढी प्रभावित नागरिकले आश्रय लिइरहेको होल्डिङ सेन्टरको समेत अनुगमन गर्नुभएका उहाँले त्यसको विकल्पमा जतिसक्दो चाँडो अस्थायी आवास निर्माण गर्न स्थानीय तहलाई आग्रह गर्नुभयो ।

सरकारको सहयोगमा प्रभावितलाई स्थायी आवास निर्माणमा सहभागी गराउनुपर्ने भए पनि त्यसका लागि तत्काल समाधान ननिस्कने अवस्था रहेकाले स्थानीय सरकारको अगुवाइमा अस्थायी आवास निर्माण गरी होल्डिङ सेन्टरमा बस्नुपर्ने अवधि छोट्याउने वातावरण बनाउन उहाँले सुझाव दिनुभयो ।

बाढी प्रभावित क्षेत्रमा सहयोग पुर्‍याउन आफ्नो पार्टी पङ्क्ति पहिलो दिनदेखि नै सक्रिय रहेको बताउँदै उहाँले अस्थायी आवास निर्माणका लागि भ्रातृसंस्थामार्फत आवश्यक जनशक्ति परिचालन गरिसकेको जानकारी दिनुभयो ।

योङ कम्युनिष्ट लिग (वाइसिएल)मार्फत तत्काल १५० परिवारका लागि अस्थायी आवास निर्माण गर्न लागिएको जानकारी दिँदै संयोजक दाहालले अन्य राजनीतिक दल तथा सङ्घसंस्थालाई पनि आ–आफ्नो तर्फबाट सक्रिय हुन आग्रह गर्नुभयो ।

भोटेकोशीमा आएको बाढी असामान्य घटना भएकाले यसलाई सामान्य बाढीका रूपमा नभई हिम पग्लेर आएको ‘हिमालय विपत्ति’का रूपमा पहिचान गर्नुपर्ने उहाँले बताउनुभयो ।

“च्छो रोल्पामा हुन लागेको विष्फोटपछिको जोखिम रोक्न गरिएका प्रयासको अनुभव लिएर आगामी दिनमा थप दुर्घटना हुन नदिन सम्पूर्ण शक्ति एकजुट हुनुपर्छ”, उहाँले भन्नुभयो, “विदेशीसँग भएका समझदारीबाट हामीले आवाज उठाउने मात्र होइन, न्याय खोज्नुपर्छ ।”

जलवायु परिवर्तनको असरका कारण आगामी दिनमा पनि जोखिम कायम रहने भएकाले नदीको जलसतह पुगेको स्थानसम्म बस्ती बसाल्न नहुने उहाँको भनाइ थियो । बाढीले प्रभाव पारेको क्षेत्रसम्मको जग्गालाई खोला कायम गरी त्यस्तो जग्गा गुमाउने प्रभावितलाई सट्टामा अर्को व्यवस्था मिलाउने गरी दीर्घकालीन नीति आवश्यक रहेको उहाँले जोड दिनुभयो ।

“विगतमा गोरखा भूकम्पपछि सम्पूर्ण राजनीतिक शक्ति एकजुट भएर नयाँ संविधान जारी गर्दै एकताको सन्देश दिएका थियौँ । यस विपत्तिमा पनि सम्पूर्ण शक्ति एकजुट भई सङ्कटको घडीमा नेपाली एकताबद्ध हुने गरेको सन्देश दिन आवश्यक छ”, उहाँले भन्नुभयो, “एकताबद्ध भएर समन्वयका साथ अघि बढ्न सक्यौँ भने यो सङ्कटको समाधान गर्न सक्छौँ ।”

संयोजक दाहालले बाढी प्रभावित क्षेत्र तथा होल्डिङ सेन्टर सञ्चालनको अवस्थाको अनुगमन गर्नुका साथै विभिन्न स्थानका प्रभावित बासिन्दासँग अन्तरक्रियासमेत गर्नुभएको थियो ।