काठमाडौँ । नेपाली कम्युनिष्ट पार्टीका वरिष्ठ नेता एवं पूर्वप्रधानमन्त्री झलनाथ खनालले चीनबाट सिक्दै नेपालले आफ्नै इतिहास, संस्कृति र सामाजिक विशेषतामा आधारित विकास तथा समाजवादको मोडल निर्माण गर्नुपर्ने बताउनुभएको छ ।
काठमाडौँमा आयोजित तेस्रो संस्करणको ‘काष्ठमण्डप संवाद’को आइतबार समापन गर्दै उहाँले सन् १९४९ को क्रान्तिपछि चीनले हासिल गरेको राजनीतिक स्थिरता, आर्थिक विकास र सामाजिक रूपान्तरणबाट नेपालले महत्वपूर्ण शिक्षा लिनुपर्ने बताउनुभएको हो ।
नेता खनालले चीनले स्थिरतालाई विकासको पहिलो र प्राथमिक सर्तका रूपमा लिएको उल्लेख गर्दै नेपालमा पनि दिगो राजनीतिक स्थिरताको आधार निर्माण गर्नु ठूलो चुनौती रहेको बताउनुभयो । स्थिरताबिना दिगो विकास सम्भव नहुने उहाँको भनाइ थियो ।
उहाँले चीनले राजनीतिक, आर्थिक तथा सामाजिक विकासका क्रममा अन्य देशको मोडलको हुबहु नक्कल नगरी आफ्नै देशको विशेषताअनुसार विकासको बाटो तय गरेको बताउनुभयो । नेपालले पनि परिवर्तन र रूपान्तरणको प्रक्रियामा आफ्नै विशेषताअनुसारको राजनीतिक तथा विकासको मोडल निर्माण गर्नुपर्ने उहाँको धारणा थियो ।
“चीनले क्रान्तिका क्रममा अन्य देशका मोडल जस्ताको तस्तै अनुकरण गरेन । आफ्नै देशको विशेषताअनुसार आफ्नै मोडल विकास गर्यो । अब हाम्रो देशमा पनि परिवर्तन र रूपान्तरणका प्रक्रिया अघि बढाउँदा नेपाली विशेषताकै बाटो पत्ता लगाउन सक्नुपर्छ,” उहाँले भन्नुभयो ।
समाजवाद निर्माणका क्रममा पनि चीनले सोभियत सङ्घ तथा पूर्वी युरोपका मुलुकको मोडलको हुबहु अनुकरण नगरेको उहाँले उल्लेख गर्नुभयो । चीनले विकास गरेको ‘चिनियाँ विशेषताको समाजवाद’बाट नेपालले सिक्नुपर्ने भए पनि त्यसको प्रत्यक्ष नक्कल गर्न नहुने उहाँको भनाइ थियो ।
नेता खनालले नेपालले पश्चिमा लोकतन्त्रको करिब–करिब ठाडो नक्कल गरेको टिप्पणी गर्दै आफ्नै ऐतिहासिक तथा सांस्कृतिक विकासक्रमसँग जोडिएको राजनीतिक प्रणाली निर्माण गर्नुपर्नेमा जोड दिनुभयो ।
“चीनको मोडल हामीले पछ्याउने कुरा होइन । चीनले त नपछ्याऊ भन्छ । हामीले पनि पछ्याउनु हुँदैन । हामीले आफ्नै मोडल विकास गर्ने हो,” उहाँले भन्नुभयो ।
नेपालको लामो ऐतिहासिक, सांस्कृतिक तथा सामाजिक विकासक्रमलाई वर्तमान परिवर्तनका आकाङ्क्षा र राजनीतिक विचारसँग जोड्नुपर्ने उहाँको भनाइ थियो । वैदिक, किरात, बुद्धकालीन, लिच्छवि तथा खस राज्यलगायत विभिन्न कालखण्डमा विकसित नेपाली समाजका आफ्नै विशेषता रहेको उल्लेख गर्दै उहाँले ती विशेषतालाई आधार बनाएर रूपान्तरणको बाटो तय गर्नुपर्ने बताउनुभयो ।
नेता खनालले पार्टी निर्माण र सुशासनका क्षेत्रमा समेत चीनको अनुभवबाट नेपालले सिक्नुपर्ने बताउनुभयो । नेपालको आफ्नै ऐतिहासिक, सांस्कृतिक तथा सामाजिक विशेषतालाई आधार बनाएर राजनीतिक रूपान्तरणको प्रक्रिया अघि बढाउनुपर्नेमा उहाँले जोड दिनुभयो ।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
बाढीले क्षति पुर्याएका झोलुङ्गे पुल
प्रधानमन्त्री राहत कोषमा मौज्दात रु
कन्काइ पुल १४ वर्ष अलपत्र
घरपझोङ जलवायु परिवर्तन सम्मेलन सुरु
खर्क व्यवस्थापनमा नेपालले भुटानबाट सिक्नुपर्छ
सुनचाँदीको मूल्य घट्यो, आज प्रतिताेला