काठमाडौं । लेखक तथा पत्रकार कमल रिजालको २१औं कृति ‘दर्शनागार : दर्शनको वैश्विक रूपरेखा’ लोकार्पण गरिएको छ । काठमाडौंमा आयोजित एक कार्यक्रमबीच उक्त कृतिको लोकार्पण गरिएको हो । शिखा बुक्सले प्रकाशन गरेको ३२० पृष्ठको पुस्तकमा दर्शनसँग सम्बन्धित विभिन्न प्रामाणिक विषय समेटिएका छन् । पुस्तकमा पौरस्त्य, पाश्चात्य र इस्लामिक दर्शनसँगै अन्तरसंयोजन दर्शन तथा प्रयोगात्मक प्रश्नवादी दर्शनलगायत विषय समावेश छन् ।
लेखक रिजालले करिब दश वर्षको अध्ययन, चिन्तन र अनुसन्धानपछि पुस्तक तयार पारेको बताउनुभयो । उहाँका अनुसार पुस्तकका पूर्वार्धका तीन खण्ड सम्बन्धित दर्शनका मूल ग्रन्थबाट उद्धृत सामग्रीमा आधारित छन् । अन्तरसंयोजन र प्रयोगात्मक प्रश्नवादी दर्शन भने पौरस्त्य, पाश्चात्य तथा इस्लामिक दर्शनको समन्वय गर्दै समीक्षा र विश्लेषणका आधारमा तयार पारिएको उहाँले बताउनुभयो ।
साहित्यकार डा.नवराज लम्सालले पौरस्त्य दर्शन निर्माणको प्रमुख आधार वेद रहेको उल्लेख गर्दै ‘दर्शनागार’ले मानिसलाई आफ्नै कर्ममाथि प्रश्न गर्न प्रेरित गर्ने बताउनुभयो । पुस्तकमा अध्यात्म र भौतिकवादी दर्शनको तुलनात्मक अध्ययन गरिएको उल्लेख गर्दै उहाँले दुवै धारालाई समन्वय गरिएकाले कृतिलाई समन्वयवादी दर्शनको दृष्टिले पनि अध्ययन गर्न सकिने बताउनुभयो ।
पुस्तकमाथि समीक्षा गर्दै प्राडा.भागवत ढकालले पौरस्त्य दर्शनको सुरुवात नै जिज्ञासाबाट भएको बताउनुभयो । पूर्वको आध्यात्मिकता, पश्चिमको वैज्ञानिकता र नेपालको बहुसांस्कृतिकतालाई संयोजन गरेर नयाँ दर्शनको विकास गर्न सकिने उहाँले धारणा राख्नुभयो । पौरस्त्य र पाश्चात्य दर्शनको तुलनात्मक अध्ययनका लागि पनि ‘दर्शनागार’ महत्त्वपूर्ण कृति भएको उहाँको भनाइ थियो ।
नेपाल स्रष्टा समाजका अध्यक्ष श्रीओम श्रेष्ठ ‘रोदन’ले ‘दर्शनागार’ दर्शन विधामा फरक ढंगले लेखिएको पुस्तक भएको बताउनुभयो । समीक्षक शैलेन्द्र अधिकारीले पुस्तकले आममानिसमा दर्शनप्रति जिज्ञासा बढाउने र दर्शनका विषय बुझ्न सहज बनाउने धारणा राख्नुभयो ।
शिखा बुक्सका प्रबन्ध निर्देशक पुष्पराज पौडेलले रिजालका धर्म, दर्शन र अध्यात्मसम्बन्धी पुस्तक प्रकाशन गर्दै आएको बताउनुभयो । आगामी दिनमा पनि यस्ता कृति प्रकाशनलाई निरन्तरता दिने उहाँले बताउनुभयो । ‘दर्शनागार’को मूल्य ७९५ रुपैयाँ तोकिएको छ ।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
आईसीयूभित्रै अन्तर्वार्ता प्रकरण संसदमा प्रवेशः
पुर्चौडीमा पहिरोले एक घर पूर्ण
पहिचान भइसकेका शव तत्काल परिवारलाई
सम्पत्ति शुद्धीकरण विभागका डिजीलाई पेस्तोल
आइतबारको बिदा कटौती गर्न राप्रपा
दाङमा आठ नाल भरुवा बन्दुक