म्यासाचुसेट्स, अमेरिका । नेपालमा हालै आएको बाढीपहिरोबाट ठूलो जनधनको क्षति भएकोप्रति ऐक्यबद्धता जनाउँदै अमेरिकाको म्यासाचुसेट्सस्थित नरउडमा नेपाली समुदायले शोकसभा तथा दीप प्रज्ज्वलन कार्यक्रम आयोजना गरेको छ । हिमालयन लायन्स क्लब, डिस्ट्रिक्ट ३३के, म्यासाचुसेट्सको आयोजनामा नरउड टाउन कमनमा सम्पन्न कार्यक्रममा बाढीपहिरोमा परी ज्यान गुमाउनेहरूप्रति श्रद्धाञ्जलि अर्पण गर्दै शोकसन्तप्त परिवारप्रति गहिरो समवेदना व्यक्त गरिएको थियो ।
कार्यक्रममा नेपालमा भएको प्राकृतिक विपत्तिप्रति ऐक्यबद्धता जनाउँदै प्रभावितहरूको शीघ्र उद्धार, राहत तथा पुनर्स्थापनाका लागि प्रार्थना गरिएको थियो । सोही अवसरमा हिमालयन लायन्स क्लबले विपत्तिमा परेका नेपालीहरूको सहयोगका लागि दुई हजार अमेरिकी डलर नेपाल सरकारको प्रधानमन्त्री राहत कोषमा पठाउने घोषणा गरेको छ ।
कार्यक्रममा डिस्ट्रिक्ट गभर्नर क्रिष्टिन, डिस्ट्रिक्ट डिग्नेटरिज स्टिभन तथा डा. उषा शर्मा, पूर्व डिस्ट्रिक्ट गभर्नर म्याथु र नरउड टाउन मेनेजर टोनीलगायतको विशेष उपस्थिति थियो ।
त्यसैगरी, प्याबफोनका संस्थापक अध्यक्ष विष्णुमणि आचार्य, निवर्तमान अध्यक्ष विरोचन नेपाल, बोस्टन मेट्रोवेस्ट नेपाली कम्युनिटीका अध्यक्ष सुरेश ढकाल, बीडीए म्यासाचुसेट्स स्टेट कमिटीका अध्यक्ष राम थापा, क्रिएटिभ वुमन ग्रुपका अध्यक्ष सानु बर्मा, हिमालयन लायन्स क्लबका उपाध्यक्ष विजय शर्मालगायत क्लबका पदाधिकारी तथा बोर्ड अफ डाइरेक्टर्सका सदस्यहरूको सहभागिता रहेको थियो । कार्यक्रममा स्थानीय नेपाली तथा अमेरिकी समुदायका विभिन्न व्यक्तित्वहरूको समेत उल्लेखनीय उपस्थिति थियो ।
कार्यक्रमको सहजीकरण बीडीए अमेरिकाका केन्द्रीय अध्यक्ष तथा हिमालयन लायन्स क्लबका चार्टर प्रेसिडेन्ट महेश्वर पन्तले गर्नुभएको थियो । कार्यक्रममा हिमालयन लायन्स क्लबका अध्यक्ष थानीरत्न कँडेलले सहभागी सबैलाई धन्यवाद दिँदै नेपालमा भएको प्राकृतिक विपत्तिप्रति ऐक्यबद्धता जनाउनुभएको थियो ।
अध्यक्ष कँडेलले बाढीपहिरोमा परी ज्यान गुमाउनेहरूप्रति श्रद्धाञ्जलि अर्पणगर्दै पीडित तथा शोकसन्तप्त परिवारप्रति गहिरो समवेदना व्यक्त गर्नुभयो । उहाँले क्लबका सदस्यहरूबाट संकलित रकममा थप सहयोग गरी कुल दुई हजार अमेरिकी डलर प्रधानमन्त्री राहत कोषमा पठाउने घोषणा गर्नुभएको हो ।
दीप प्रज्ज्वलनका क्रममा सहभागीहरूले नेपालमा बाढी तथा प्राकृतिक विपत्तिबाट प्रभावित परिवारप्रति हार्दिक समवेदना व्यक्त गर्दै पीडितहरूको शीघ्र उद्धार, राहत तथा पुनर्स्थापनाका लागि प्रार्थना गरेका थिए । कार्यक्रमको नरउड टेलिभिजनले समेत विशेष कभरेज गरेको थियो ।
जन्मभूमि नेपालमा परेको विपत्तिको पीडा सातासमुद्रपारि रहेका नेपाली समुदायले समेत उत्तिकै अनुभूत गरिरहेको सन्देश दिँदै नरउडमा आयोजित शोकसभा तथा दीप प्रज्ज्वलन कार्यक्रमले नेपाली समुदायको जन्मभूमिप्रतिको आत्मीयता, मानवीय संवेदना र विपत्तिको समयमा एकजुट हुने भावनालाई उजागर गरेको छ ।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
भोटेकोशी बाढी : ट्रमा सेन्टरमा
लागुऔषध खैरो हेरोइनसहित मकवानपुरमा तीन
कान्ति राजमार्गको पहिरो पन्छाउने कार्य
भोटेकोशी बाढी : एक हजार
बाढी प्रभावित जिल्लाहरुमा राहत तिब्र,
क्यासिनोमा नेपाली प्रवेश गराई जुवा