काठमाडौं । जापानमा आयोजना हुने २०औँ एसियाली खेलकुद (एसियाड) अन्तर्गत पुरुष क्रिकेटमा नेपालले समूह चरणका दुईमध्ये कम्तीमा एउटा खेल जिते क्वाटरफाइनलमा स्थान बनाउनेछ । क्वाटरफाइनलमा पुगेपछि नेपालले भारत वा श्रीलंकामध्ये एक टोलीसँग प्रतिस्पर्धा गर्ने सम्भावना छ । एसियाली खेलकुदको पुरुष क्रिकेटमा १० टोली सहभागी हुँदैछन् । नेपालसहित अफगानिस्तान र आयोजक जापान समूह ‘ए’मा छन् । समूह ‘बी’मा हङकङ, मलेसिया र ओमान छन् । भारत, पाकिस्तान, बंगलादेश र श्रीलंकाले भने सोझै क्वाटरफाइनलमा स्थान बनाएका छन् ।
समूह चरणमा प्रत्येक समूहका शीर्ष दुई टोली क्वाटरफाइनलमा प्रवेश गर्नेछन् । तीन टोली रहेको समूह ‘ए’मा नेपालले दुईमध्ये एउटा खेल जिते शीर्ष दुईमा रहने निश्चित हुनेछ । नेपालले सेप्टेम्बर २५ मा अफगानिस्तान र सेप्टेम्बर २६ मा आयोजक जापानसँग प्रतिस्पर्धा गर्नेछ । दुवै खेल जापानको निसिनस्थित क्रिकेट मैदानमा हुनेछन् ।
समूह चरणको नतिजाले क्वाटरफाइनलमा नेपालको प्रतिद्वन्द्वीसमेत निर्धारण गर्नेछ । प्रतियोगिताको खेल तालिकाअनुसार समूह ‘ए’को विजेताले श्रीलंकासँग तथा दोस्रो स्थानमा रहने टोलीले भारतसँग क्वाटरफाइनल खेल्नेछ । यसअनुसार नेपाल समूह विजेता बने श्रीलंकासँग र समूहको दोस्रो स्थानमा रहे भारतसँग प्रतिस्पर्धा गर्नेछ ।
भारत सन् २०२३ मा चीनको हाङझाउमा भएको एसियाली खेलकुदको पुरुष क्रिकेटको स्वर्ण विजेता हो । अघिल्लो संस्करणको प्रदर्शनका आधारमा भारतसँगै पाकिस्तान, बंगलादेश र श्रीलंकाले यसपटक सोझै क्वाटरफाइनलमा स्थान पाएका हुन् ।
पुरुष क्रिकेट प्रतियोगिता सेप्टेम्बर २४ देखि अक्टोबर ३ सम्म सञ्चालन हुनेछ । क्वाटरफाइनलका खेल सेप्टेम्बर २८ र २९ मा, सेमिफाइनल अक्टोबर १ तथा स्वर्ण पदकका लागि फाइनल अक्टोबर ३ मा हुनेछ ।
एसियाली खेलकुदका लागि क्यानले सार्वजनिक गरेको टोलीमा दीपेन्द्रसिंह ऐरीलाई कप्तानको जिम्मेवारी दिइएको छ । त्यस्तै टोलीका अन्य खेलाडीमा कुशल भुर्तेल, आसिफ शेख, रोहितकुमार पौडेल, आरिफ शेख, कुशल मल्ल, सन्दीप जोरा, लोकेश बम, सन्दीप लामिछाने, गुल्शन झा, करण केसी, सोमपाल कामी, नन्दन यादव, ललितराज राजवंशी र शेर मल्ल रहनुभएको छ । आगामी असोज ३ देखि १८ गतेसम्म जापानको आइची नायोगमा २०औँ एसियाली खेलकुद प्रतियोगिता हुँदैछ ।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
अपर म्याग्दी–१ को सुरुङ ‘ब्रेक
नेपाल नेत्रज्योति सङ्घद्वारा प्रधानमन्त्री दैवी
बाँदरले दुःख दिएपछि सामूहिक मार्सी
सेतीबाढीपीडितले पठाए भोटेकोशी पीडितलाई सहयोग
कृष्णभीरको पहिरोले हेटौँडा–काठमाडाैं सडकमा सवारीको
सङ्खुवासभाको पाँचखपनमा चट्याङ लागेर एकको