काठमाडौँ । सर्वोच्च अदालतले प्रतिनिधिसभा नियमावली, २०८३ का दुई विवादित प्रावधान तत्काल कार्यान्वयन नगर्न अन्तरिम आदेश दिएको छ ।
नेपाली काँग्रेसका सांसदहरूले दायर गरेको रिटमाथि सुनुवाइ गर्दै प्रधानन्यायाधीश डा. मनोजकुमार शर्मासहित पाँच सदस्यीय संवैधानिक इजलासले बुधबार यस्तो आदेश दिएको हो । इजलासमा न्यायाधीशहरू कुमार रेग्मी, डा. नहकुल सुवेदी, विनोद शर्मा र शारङ्गा सुवेदीसमेत हुनुहुन्छ ।
सर्वोच्चले नियमावलीको नियम १४० को उपनियम (११) र नियम २५९ तत्काल कार्यान्वयन नगर्न आदेश दिएको हो ।
नियम १४०(११) संविधान संशोधनको प्रक्रियासँग सम्बन्धित छ । उक्त व्यवस्थामा प्रतिनिधिसभा र राष्ट्रियसभाको मत जोडेर संविधान संशोधनका लागि आवश्यक दुईतिहाइ बहुमत पुग्ने व्यवस्था गरिएको थियो । रिट निवेदकहरूले संविधानले प्रत्येक सदनमा छुट्टाछुट्टै दुईतिहाइ बहुमत आवश्यक हुने व्यवस्था गरेको भन्दै उक्त प्रावधान संविधानविपरीत रहेको दाबी गरेका थिए ।
त्यस्तै, नियम २५९ मा प्रतिनिधिसभा नियमावलीलाई विशेष कानुनसरह लागू हुने व्यवस्था गरिएको थियो । उक्त प्रावधानअनुसार प्रचलित कानुनमा जुनसुकै व्यवस्था भए पनि प्रतिनिधिसभा नियमावलीमा उल्लिखित विषय नै सांसदका हकमा लागू हुने भनिएको थियो ।
रिट निवेदकहरूले नियम २५९ ले संविधानले नदिएको अधिकार प्रयोग गर्दै सारवान् कानुनी व्यवस्था गरेको दाबी गरेका थिए ।
संवैधानिक इजलासले प्रारम्भिक रूपमा हेर्दा नियमावलीका ती व्यवस्था संवैधानिक प्रबन्धको प्रतिकूल रहेको देखिएको भन्दै तत्काल कार्यान्वयन नगर्न अन्तरिम आदेश दिएको हो । ती व्यवस्था कार्यान्वयनमा आए संवैधानिक प्रावधानमा अपूरणीय क्षति पुग्न सक्ने इजलासको आदेशमा उल्लेख छ ।
प्रतिनिधिसभा नियमावली, २०८३ गत जेठ १७ गते प्रतिनिधिसभाबाट पारित भएको थियो । नियमावलीका केही प्रावधानप्रति विपक्षी दलहरूले पारित हुनुअघि नै प्रश्न उठाउँदै आएका थिए । प्रतिनिधिसभाको आधिकारिक अभिलेखमा पनि नियमावली, २०८३ प्रकाशित रहेको छ।
नियमावलीका विवादित प्रावधानविरुद्ध नेपाली काँग्रेसका राष्ट्रियसभा संसदीय दलकी नेता कमला देवी पन्त, सचेतक पदमबहादुर परियार, प्रतिनिधिसभा संसदीय दलका उपनेता अभिषेकप्रताप शाह र प्रमुख सचेतक बासना थापाले रिट दायर गरेका थिए । उनीहरूका तर्फबाट अधिवक्ता अमृतकुमार केसीले प्रतिनिधित्व गर्नुभएको थियो ।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
बाँदरले दुःख दिएपछि सामूहिक मार्सी
सेतीबाढीपीडितले पठाए भोटेकोशी पीडितलाई सहयोग
कृष्णभीरको पहिरोले हेटौँडा–काठमाडाैं सडकमा सवारीको
सङ्खुवासभाको पाँचखपनमा चट्याङ लागेर एकको
५३ हजार बढी ग्यास सिलिन्डर
तरकारीको विषादी परीक्षण बढाइँदै