काठमाडौं । नेपाली कांग्रेसकी नेतृ डिला संग्रौला पन्तले पार्टीमा लामो समयदेखि भुइँ तहमा काम गरिरहेका कार्यकर्ताको योगदानको उचित मूल्यांकन नभएसम्म कांग्रेसको रूपान्तरण सम्भव नहुने बताउनुभएको छ।
बुधबार काठमाडौंमा आयोजित पत्रकार सम्मेलनमा उहाँले संगठनको वडा तहदेखि केन्द्रसम्म काम गरेका कार्यकर्ताको योगदानलाई मूल्यांकन गर्दै उनीहरूलाई नेतृत्वको अवसर दिनुपर्ने बताउनुभएको हो।
कांग्रेसको १५औँ महाधिवेशनमा महामन्त्री पदमा उम्मेदवारी दिनुभएकी संग्रौलाले भुइँ तहका कार्यकर्ताको मूल्यांकन, शिक्षा सुधार, युवा नेतृत्व विकास, संगठन सुदृढीकरण, पार्टी रूपान्तरण, सुशासन र महिला सशक्तीकरणलाई आफ्नो प्रमुख एजेन्डा बनाउनुभएको बताउनुभयो।
उहाँले युवाहरू ठूलो संख्यामा विदेश पलायन भइरहेको उल्लेख गर्दै शिक्षा र रोजगारीबीच प्रत्यक्ष सम्बन्ध स्थापित गर्नुपर्नेमा जोड दिनुभयो। विद्यार्थी तथा युवालाई कांग्रेसको राजनीतिसँग जोडेर नेतृत्व तहमा पुर्याउनु आफ्नो पहिलो प्राथमिकता रहेको उहाँको भनाइ छ।
“आजको शिक्षा नीति बेरोजगार शिक्षा नीति छ । युवाहरू ब्रेन ड्रेन भएर बाहिरिएका छन् । नेपालमा उनीहरूको सीप र लगानी गर्ने आधार छैन,” उहाँले भन्नुभयो, “त्यसैले विद्यार्थी र युवालाई कांग्रेसको राजनीतिमा कसरी जोड्ने, पार्टीलाई युवा मैत्री बनाउने र युवालाई नेतृत्वमा ल्याउने मेरो पहिलो एजेन्डा हो।”
आफूले वडा, क्षेत्र, जिल्ला हुँदै केन्द्रसम्म संगठनमा काम गरेको चार दशक पुग्न लागेको उल्लेख गर्दै संग्रौलाले पार्टी संगठनमा ऊर्जा र सशक्तीकरण आवश्यक रहेको बताउनुभयो।
“संगठनमा काम गर्ने साथीहरूको मूल्यांकन हुनुपर्छ । जबसम्म भुइँ तहमा काम गर्ने कार्यकर्ताको मूल्यांकन हुँदैन, तबसम्म कांग्रेसमा रूपान्तरण हुन सक्दैन,” उहाँले भन्नुभयो।
संग्रौलाले पछिल्लो राजनीतिक परिवर्तनपछि कांग्रेस पनि समयअनुकूल रूपान्तरण हुनुपर्ने आवश्यकता रहेको बताउनुभयो। जेन–जी आन्दोलनपछि नेपालको राजनीतिले नयाँ मोड लिएको उल्लेख गर्दै उहाँले कांग्रेस यथास्थितिमा अघि बढ्न नसक्ने निष्कर्षसहित आफूहरू परिवर्तनको पक्षमा उभिएको बताउनुभयो।
उहाँले कांग्रेसलाई सबैलाई समेट्ने राजनीतिक शक्तिका रूपमा अघि बढाउन संगठनको नेतृत्व सक्षम र सबल हुनुपर्ने धारणा राख्नुभयो।
सुशासन र भ्रष्टाचारमा शून्य सहनशीलताको मुद्दा उठाउँदै संग्रौलाले उच्च तहमा पुगेका राजनीतिक नेतृत्वदेखि कर्मचारीसम्मको सम्पत्ति छानबिन हुनुपर्ने बताउनुभयो। पार्टीभित्र पनि आन्तरिक लोकतन्त्रसँगै आन्तरिक सुशासन कायम हुनुपर्ने उहाँको भनाइ छ।
उहाँले अनुभवी, मध्यम पुस्ता र युवा पुस्तालाई जोडेर कांग्रेसलाई अघि बढाउनुपर्ने बताउनुभयो। कांग्रेसप्रति असन्तुष्ट मतदातालाई पुनः पार्टीसँग जोड्न जनताको घरदैलोमा पुगेर संगठन विस्तार गर्नुपर्नेमा समेत उहाँले जोड दिनुभयो।
महिलातर्फ महामन्त्री पदमा आफूलाई समर्थन गर्न कांग्रेसका पालिका, क्षेत्र तथा प्रदेश तहका सभापति, महाधिवेशन प्रतिनिधि तथा देश–विदेशमा रहेका पार्टी कार्यकर्तालाई उहाँले आग्रह गर्नुभयो।







जलवायु न्याय माग्ने नेपालको आधार
कञ्चनपुरमा १६ लाख ८७ हजार
वेस्ट बैंकमा यहुदी बस्ती विस्तारकको
पार्टीभित्रको गुटगत असन्तुष्टि र असहमतिलाई
काँग्रेसलाई नयाँ पुस्ताको जोश र
गगन थापाको नेतृत्वमा काँग्रेस रूपान्तरण