न्युज एजेन्सी नेपालसँगको कुराकानीमा मन्त्री श्रेष्ठले यसअघि तीन दिनअघिसम्मको मौसम पूर्वानुमान गर्न सकिने अवस्थामा रहेकामा अहिले सात दिनअघिसम्मको पूर्वानुमान गर्न सक्ने प्रणाली विकास गरिएको बताउनुभयो।
उहाँका अनुसार मन्त्रालयले जिम्मेवारी सम्हालेको सुरुवाती चरणमै प्रशान्त महासागरमा विकसित भइरहेको ‘सुपर एल निनो’ का सम्भावित प्रभावबारे अध्ययन तथा विश्लेषण गरेको थियो। जलवायु परिवर्तनका कारण वर्षाको स्वरूपमा समेत परिवर्तन देखिन थालेकाले पूर्वानुमान प्रणालीलाई थप प्रभावकारी र भरपर्दो बनाउन आवश्यक रहेको उहाँले बताउनुभयो।
मन्त्री श्रेष्ठले विपद् जोखिम न्यूनीकरणका लागि पूर्वसूचना प्रणाली मात्र पर्याप्त नहुने उल्लेख गर्दै स्थानीय तहसम्म जनचेतना अभिवृद्धि, विपद् पूर्वअभ्यास र सूचना प्राप्त भएपछि अपनाउनुपर्ने प्रक्रियाबारे स्पष्ट जानकारी आवश्यक रहेको बताउनुभयो।
उहाँले पछिल्ला बाढी तथा पहिरोका घटनामा नदीको जलस्तर मापन र निगरानीका लागि जडान गरिएका उपकरणसमेत बगाएकाले आगामी दिनमा थप दिगो प्रविधिको प्रयोग गर्नुपर्ने आवश्यकता औँल्याउनुभयो। रसुवा बाढीका क्रममा टिमुरे, बेत्रावतीलगायतका क्षेत्रमा जडान गरिएका संरचनामा क्षति पुगेको उल्लेख गर्दै उहाँले जोखिमयुक्त स्थानमा उपकरण जडान गर्दा तिनको दिगोपनालाई समेत ध्यान दिनुपर्ने बताउनुभयो।
यद्यपि, केही तल्लो तटीय क्षेत्रमा पूर्वसूचना प्रणालीले प्रभावकारी रूपमा काम गरेको उहाँको भनाइ छ। मजुवा बस्ती, भरतपुर र सुस्तालगायतका क्षेत्रमा सम्भावित बाढीको जोखिमबारे समयमै जानकारी दिन पूर्वसूचना प्रणालीले सहयोग पुर्याएको उहाँले बताउनुभयो।
मन्त्री श्रेष्ठले जापानमा भूकम्पलगायतका विपद्का लागि नियमित पूर्वअभ्यास गरिएझैँ नेपालमा पनि स्थानीय तहसम्म विपद् पूर्वअभ्यासको संस्कार विकास गर्नुपर्नेमा जोड दिनुभयो। २०७२ सालको भूकम्प, मेलम्चीलगायतका क्षेत्रमा आएका बाढी तथा पछिल्ला वर्षमा देखिएका असामान्य वर्षाका घटनाले विपद् पूर्वतयारीलाई नियमित अभ्यासका रूपमा अघि बढाउनुपर्ने आवश्यकता देखाएको उहाँको भनाइ छ।
उहाँले मौसम पूर्वानुमान र नदीको जलस्तर निगरानी प्रणालीको विकाससँगै जनचेतना अभिवृद्धि तथा विपद् पूर्वअभ्यासलाई पनि प्राथमिकता दिनुपर्ने बताउनुभयो। पूर्वसूचना प्रणाली, स्थानीय तहबीचको समन्वय र जोखिम न्यूनीकरणसम्बन्धी तयारीलाई एकीकृत रूपमा अघि बढाउन सके विपद्बाट हुने मानवीय तथा भौतिक क्षति न्यूनीकरण गर्न सकिने उहाँले उल्लेख गर्नुभयो।







हराउन थाले दसैँका परम्परागत पिङ
अन्नपूर्ण पदमार्गमा पर्यटकको आगमन बढ्न
नयाँबसपार्कबाट गाउँ फर्किने यात्रुको चाप
श्रीमान् गुमाएपछि छ सन्तानको भविष्यको
चलचित्र कलाकार संघको बडादशैं शुभकामना
प्रस्तावित राजदुतविरुद्ध उजुरी दिएका उजुरीकर्ता