काठमाडौं । इङ्लिस ब्याटर मोइन अलीको अलराउण्ड प्रदर्शन र उत्कृष्ट बलिङको मद्दतमा जनकपुर बोल्ट्सले नेपाल प्रिमियर लिग (एनपीएल) को तेस्रो संस्करणमा पहिलो जित निकालेको छ ।
बिहीबार कीर्तिपुरस्थित त्रिवि क्रिकेट मैदानमा भएको खेलमा जनकपुरले काठमाडौं गोर्खाजलाई ८ विकेटले पराजित गरेको हो । जितका लागि काठमाडौंले दिएको ११६ रनको लक्ष्य जनकपुरले १७.२ ओभरमा २ विकेट गुमाएर पूरा गर्यो ।
जनकपुरको जितमा मोइन अलीले अविजित ५८ रन बनाए । उनले ५१ बलमा समान तीन चौका र छक्का प्रहार गरे । हसन अली ४० रनमा अविजित रहे । यी दुईले तेस्रो विकेटका लागि अविजित ७९ रनको साझेदारी गर्दै टोलीलाई सहज जित दिलाए । हसनले आफ्नो इनिङमा एक चौका र तीन छक्का प्रहार गरे ।
लक्ष्य पछ्याउने क्रममा जनकपुरको सुरुआत भने राम्रो हुन सकेन । ओपनर तृतराज दास दोस्रो ओभरमै ५ रन बनाएर आउट भए । काठमाडौंका रिपोन मण्डलले उनलाई स्मित पटेलबाट क्याच गराएका थिए ।
मोइनले अर्को छेउबाट इनिङ सम्हाल्दै मायन यादवसँग दोस्रो विकेटका लागि ३० रनको साझेदारी गरे । तर छैटौँ ओभरमा मायन ९ रन बनाएर रनआउट भए । त्यसपछि मोइन र हसनले अविजित साझेदारी गर्दै जनकपुरलाई जित दिलाए ।
यसअघि टस जितेर पहिले ब्याटिङ गरेको काठमाडौं गोर्खाज १९.३ ओभरमा ११५ रनमै अलआउट भएको थियो । सुरुआतदेखि दबाबमा परेको काठमाडौंका लागि भीम सार्कीले सर्वाधिक ३३ रन बनाए । रसिद खानले १७ तथा स्मित पटेलले १३ रन जोडे ।
जनकपुरका युवा बलर राहुल यादवले उत्कृष्ट प्रदर्शन गर्दै चार विकेट लिए । उनले ३१ रन खर्चिए । सइफ हसनले दुई विकेट लिँदा मोइन अली, कप्तान हरमित सिंह र ललित राजवंशीले समान एक विकेट लिए ।
राहुलले दोस्रो ओभरमा साम हेजलेटलाई १ रनमा आउट गर्दै काठमाडौंको विकेट पतन सुरु गरेका थिए । तेस्रो ओभरमा हरिशंकर साह ९ रनमा आउट भए । त्यसपछि स्मित पटेललाई १३ रनमा आउट गराउँदै राहुलले काठमाडौंलाई थप दबाबमा पारे ।
५.१ ओभरमा २९ रन जोड्दा तीन विकेट गुमाएको काठमाडौंले पावरप्लेमा ३६ रन मात्रै बनाउन सक्यो । आठौँ ओभरमा मोइन अलीले रसिद खानलाई १७ रनमा आउट गरेपछि काठमाडौं ४७ रनमा चार विकेट गुमाएको अवस्थामा पुग्यो ।
त्यसपछि भीम सार्की र सुमित महर्जनले पाँचौँ विकेटका लागि २९ रनको साझेदारी गरे । तर सुमित १० रन बनाएर रनआउट भए । १५औँ ओभरमा भीमलाई ललित राजवंशीले कुशल परेराबाट स्टम्पिङ गराएपछि काठमाडौंको इनिङ थप धराशायी बन्यो ।
१७औँ ओभरमा राहुलले काठमाडौंका कप्तान करण केसीलाई ८ रनमा र मोहम्मद आदिललाई शून्यमा लगातार आउट गरे । तर उनले ह्याट्रिक पूरा गर्न सकेनन् । त्यसपछि काठमाडौंले थप २३ रन जोड्दा बाँकी विकेट गुमाएर ११५ रनमा समेटियो ।
पहिलो खेलमा कर्णाली याक्ससँग पराजित भएको जनकपुरले दोस्रो खेलमै जित निकाल्दै प्रतियोगितामा पुनरागमन गरेको छ । काठमाडौं गोर्खाजले भने तेस्रो संस्करणको एनपीएलमा आफ्नो पहिलो खेल खेलेको हो ।






तीनकुने राजावादी आन्दोलनमा सुरक्षा कमान्ड
कांग्रेस महाधिवेशनमा ४० जनाले उम्मेदवारी
भारतीय महिला क्रिकेट टोलीकी नयाँ
सौराहा अन्तर्राष्ट्रिय खुला तेक्वान्दो कात्तिकमा
नेपालमा चेस जेन टुको आधिकारिक
आजदेखि अन्तरवडा फुटसल