काठमाडौं । प्रधानन्यायाधीश तथा सर्वोच्च अदालतका न्यायाधीशहरूको नाम जोडेर पछिल्लो समय सञ्चारमाध्यम र सामाजिक सञ्जालमा सार्वजनिक भएका सामग्रीप्रति सर्वोच्च अदालतले गम्भीर ध्यानाकर्षण भएको जनाएको छ ।
सोमबार बसेको सर्वोच्च अदालतको पूर्ण बैठक (फुलकोर्ट)ले पाँचबुँदे निर्णय गर्दै सार्वजनिक भएका विषयमा निष्पक्ष र स्वतन्त्र छानबिन गर्न सम्बन्धित निकायलाई आग्रह गरेको हो ।
प्रधानन्यायाधीश तथा सम्बन्धित न्यायाधीशहरूले यसअघि नै आफ्नो धारणा सार्वजनिक गरिसकेको अवस्थामा फुलकोर्टले पूर्वाग्रहरहित ढंगले संविधान र कानुनबमोजिम छानबिन गरी सत्यतथ्यसहितको निष्कर्ष यथाशीघ्र सार्वजनिक गर्न आग्रह गरेको छ ।
सर्वोच्चले संविधान र कानुनको सर्वोच्चताप्रतिको आफ्नो आस्था र प्रतिबद्धता दोहोर्याउँदै त्यसमा अडिग रहेको स्पष्ट पारेको छ । सञ्चारमाध्यममा प्रकाशित तथा प्रसारित समाचारका सम्बन्धमा कानुनबमोजिम हुने छानबिन र अनुसन्धानमा आफूहरूले कानुनले तोकेको जवाफदेहिता निर्वाह गर्नुका साथै पूर्ण सहयोग गर्ने प्रतिबद्धता पनि जनाएको छ ।
न्यायपालिका जनताको आस्था र विश्वासमा टिकेको संस्था भएकाले यससँग सम्बन्धित समाचार प्रकाशन तथा प्रसारण गर्दा आमजनता र सेवाग्राहीमा भ्रम सिर्जना नहुने विषयमा संवेदनशील हुन सर्वोच्चले आग्रह गरेको छ ।
छानबिनको निष्कर्ष प्राप्त नहुँदै कसैलाई लाञ्छित गर्ने वा न्याय सम्पादनको काममा अवरोध पुग्ने गरी समाचार प्रकाशन तथा प्रसारण नगर्न सञ्चारमाध्यमलगायत सम्बन्धित सबैलाई अनुरोध गरिएको छ ।
यसैगरी, पछिल्ला समाचारबाट विचलित नभई नियमित रूपमा न्याय सम्पादनको काममा क्रियाशील रहन सर्वोच्चले देशभरका अदालतमा कार्यरत न्यायकर्मीहरूलाई आग्रह गरेको छ ।
सर्वोच्च अदालतका प्रवक्ता तथा सहरजिस्ट्रार डा. अशोककुमार क्षेत्रीद्वारा जारी प्रेस विज्ञप्तिमार्फत फुलकोर्टका निर्णय सार्वजनिक गरिएको हो ।








विजयादशमी : आफ्नै अहंकारमाथि विजयको
रसुवा बाढीः ‘विकास क्षेत्रको पुनरुत्थान
न्यायाधीश बम हत्याका दोषी बाबु
बाढी प्रभावित बालबालिकाको संरक्षणका लागि
आजको राशिफल : कुन राशिलाई
बडादशैँको छैटौं दिन आज कात्यायनी