30th September | 2020 | Wednesday | 1:11:04 AM

ट्रम्पविरुद्ध महाभियोग : प्रस्ताव सिनेटमा लगिँदै

एजेन्सी   POSTED ON : माघ २, २०७६ (१०:०६ AM)

ट्रम्पविरुद्ध महाभियोग : प्रस्ताव सिनेटमा लगिँदै

वासिङ्टन । अमेरिकी राष्ट्रपति डोनाल्ड ट्रम्पको महाभियोगसम्बन्धी प्रस्ताव एक हप्ताभित्र सिनेटमा अघि बढाइने भएको छ । आगामी सात दिनभित्रमा सो प्रस्ताव अघि बढ्ने समाचारमा जनाइएको छ । त्यसका बुधबार अमेरिकी संसद्को तल्लो सदन हाउस अफ रिप्रेजेण्टेटिभले लगाएको उनीमाथिको महाभियोगसम्बन्धी जानकारी सिनेटमा पठाइने छ । 

सिनेट अमेरिकी संसद्को माथिल्लो सदन हो । त्यहाँ सयजना सांसद रहने छन् । उनीहरूले दुई तिहाइ बहुमतबाट राष्ट्रपति ट्रम्पलाई महाभियोग लगाउन सक्नेछन् । यस महाभियोग प्रस्तावमाथिको समग्र प्रक्रियाको नेतृत्व अमेरिकाका प्रधानन्यायाधीशले गर्नेछन् । कानुनी प्रावधान अनुरूप नै उनलाई पनि यस विषयमा सहभागी गराइने छ र त्यो प्रक्रिया यसै हप्ताबाट नै सुरु हुने पनि सिनेटका एकजना अधिकारीले जानकारी दिएका छन् । यसै हप्ताको बिहीबार अथवा शुक्रबारसम्ममा अमेरिकाको सर्वाेच्च अदालतका प्रधानन्यायाधीश जोन रोबर्टले सिनेटमा हुने यससम्बन्धी महाभियोग प्रक्रियाको अध्यक्षताको सपथ लिने कार्यक्रम छ । यस महाभियोग प्रक्रियाको अध्यक्षता अमेरिकी सर्वाेच्च अदालतका प्रधानन्यायाधीशले ग्रहण गर्ने कानुनी प्रावधान रहेको छ । 

यसरी यो महाभियोगमा मतदान हुनुअगाडि नै केही प्रक्रिया रहने छन् । ती प्रक्रिया पूरा गर्दा त्यस्तै आगामी फेबु्रअरी महिनाको अन्त्यसम्ममा लाग्ने बताइएको छ । सिनेटका अधिकारीले यसै हप्ताबाट नै ट्रम्पका विरुद्धको महाभियोगको प्रक्रिया प्रारम्भ हुने जानकारी गराएका हुन् । यसअघि गत महिनामात्र अमेरिकी संसद्को तल्लो सदन हाउस अफ रेप्रेजेण्टेटिभ्सले ट्रम्पले आफ्नो शक्तिको दुरुपयोग गरेको भन्ने आरोपको पक्षमा मतदान गरेको थियो । त्यो ट्रम्पविरुद्धका दुई महाभियोगका आरोपमध्येको एउटा थियो । त्यस महाभियोग प्रस्तावमा भएको मतदानमा महाभियोग लगाउने पक्षमा २३० मत परेको थियो भने विपक्षमा १९७ मत परेको थियो । अमेरिकी राजनीतिक पार्टीको एजेण्डाअनुरूप नै मत खसेको बताइएको थियो । 

उक्त प्रस्तावमा अधिकांश डेमोक्र्याट सदस्यले आरोपको पक्षमा र रिपब्लिकनले आरोपको विपक्षमा मत हालेका थिए । राष्ट्रपति ट्रम्पले अब महाभियोगको दोस्रो आरोपका रूपमा रहेको कांग्रेसलाई अवरुद्ध तुल्याएको विषयमा पनि मतदानको सामना गर्नुपर्ने देखिन्छ । डोनाल्ड ट्रम्प अमेरिकी संसद्को तल्लो सदन हाउस अफ रेप्रेजेण्टेटिभ्सबाट महाभियोग लगाइएका तेस्रो अमेरिकी राष्ट्रपति बनेका छन् । उक्त मुद्दा माथिल्लो सदन सिनेटमा प्रवेश गरेपछि गरिने महाभियोगको प्रस्तावमाथिको मतदानले उनी राष्ट्रपति रहने वा नरहने भन्नेबारेसमेत निर्णय गर्नेछ । 


Views: 85