18th May | 2021 | Tuesday | 6:20:46 AM

‘हेप्नु हेप्यौ तिमीले, देखाइदिन्छौं हामीले’ भन्दै पिच सडकको माग गर्दै आन्दोलन

ध्रुर्वसागर शर्मा   POSTED ON : बैशाख ३, २०७८ (६:३९ PM)

‘हेप्नु हेप्यौ तिमीले, देखाइदिन्छौं हामीले’ भन्दै पिच सडकको माग गर्दै आन्दोलन

म्याग्दी । ‘हेप्नु हेप्यौ तिमीले, देखाइदिन्छौं हामीले’ लेखेको प्लेकार्ड वोकेर एक हुल मानिस सडकमा सवारी साधन रोकेर उभिएका छन् । चक्काजामका लागि उभिएका युवा,युवती र वृद्धबृद्धाहरु निकै आक्रोशित देखिन्छन् । यो दृश्य म्याग्दीको सदरमुकाम बेनीबजारको पश्चिमी क्षेत्र मंगलाघाटको हो ।

एक वर्षदेखि अलपत्र म्याग्दीको सदरमुकाम बेनी बजारमा निर्माणाधिन मंगलाघाट–हाडेभिर–बगरफाँट सडक आयोजनालाई पुर्णता दिन माग गर्दै स्थानीयबासी आन्दोलनमा उत्रिएका हुन् । धुलो र हिलोले आजित भएका मंगलाघाटका बासिन्दाले सडक निर्माण सुरु गराउन दवावका लागि जिल्ला प्रशासन कार्यालय घेराउ र चक्काजम गरेका हुन् ।

मंगलाघाट देखि हाडेभिर हुदै बगरफाँट जोड्ने १४ सय मिटर सडक कालोपत्रे गर्ने योजनालाई पुर्णता दिन माग गर्दै बेनी नगरपालिका–७ मंगलाघाटका बासिन्दाले शुक्रबार बेनी–दरवाङ सडकमा एक घण्टा चक्काजाम र जिल्ला प्रशासन कार्यालय घेराउ गरेका छन् ।निर्माण ब्यवसायी र सम्बद्ध कार्यालयले प्रतिवद्धता अनुसार सडक कालोपत्रे गर्न बेवास्ता गरेपछि मंगलाघाटका तीन वटा टोल सुधार समिति, वौद्ध युवा क्लव र आमा समूहले संयुक्त आन्दोलन गरेको मंगलाघाट टोल सुधार समितिका अध्यक्ष खिमबहादुर छन्त्यालले बताए ।


सघन सहरी बिकास डिभिजन कार्यालय बागलुङले सञ्चालन गरेको मंगलाघाट देखि बेनी नगरपालिकाको वडा नम्बर २ को हाडेभिर हुदै बगरफाँट जोड्ने सडक कालोपत्रेमा भएको ढिलासुस्तिले नागरिकलाई सास्ति, साँघुरो सडक छेउमा थुपारिएका निर्माण सामग्रीले आवत जावतमा समस्या र दुर्घटनाको जोखिम बढाएको छ ।

मंगलाघाट मंगला, मालिका र धवलागिरी गाउँपालिका र हाडेभिर भकिम्ली, सिंगा र बरंजालाई सदरमुकाम बेनीसँग जोड्ने सडकको नाका हो । दुई वर्षमा सम्पन्न गर्ने लक्ष्य सहित २०७५ माघ २२ गते देब एण्ड सायर–बिएन–त्रिशक्ति जेभीले पाँच करोड रुपैयाँमा ठेक्का लिएको योजनाको म्याद २०७७ माघमा सकिएपनि निर्माण ब्यवसायीले काम सूचारु गर्न बेवास्ता गरेका छन् ।

निमार्ण कार्यमा ढिलासुस्ती भएका कारण स्थानीयबासी आन्दोलित भएका छन् बेनपा ७ का वडा अध्यक्ष राजेन्द्रकुमार श्रेष्ठले बताए । ‘हामीले यो बिषयमा नगरपालिका, आयोजना स चालन गर्ने कार्यालय र आज जिल्ला प्रशासन कार्यालयमा पनि आएका छौँ’ उनले भने, यो आयोजना समयमै सकिनेमा विश्वास लिएका छौँ ।

कोरोनाको जोखिम, लकडाउन, भेरिएसन अर्डनमा भएको ढिलाई र पर्याप्त बजेट ब्यवस्थापन नहुँदा आयोजनाको काम प्रभावित भएको निर्माण ब्यवसायीको तर्क छ । हालसम्म दुई करोड रुपैयाँ भुक्तानी लगेका निर्माण ब्यवसायीले करिब डेढ वर्षपछि यसै हप्तादेखि बगरफाँट क्षेत्रमा नाली निर्माण सुरु गरेका छन् ।

२०७५ साउनमै मंगलाघाटको तल्लो बजार क्षेत्रमा करिब दुई सय मिटर सडक ढलान गरेका निर्माण ब्यवसायीले बैशाख महिनाभित्र कालोपत्रे पनि गरिसक्ने देब एण्ड सायर–बिएन–त्रिशक्ति जेभीका प्रतिनिधि नारायण जिसीले बताए । ‘हामीले सडक कालोपत्रे गर्नका लागि आवश्यक पर्ने सबै सामाग्री ल्याईसकेका छौँ, अबको केही दिनमा मंगलघाटमा कालोपत्रे सुरु गछौँ’ उनले भने अहिले हामीले बगरफाँटमा काम सुरु गरेका छौँ ।

चालु आर्थिक वर्षमा असी लाख रुपैयाँ बिनियोजन भएको योजनाका ठेकेदारले यसअघि गरेको कामको समेत भुक्तानी नभएको बताएका छन् । गर्मी मौसम आवश्यक पर्ने अक्सपाल्ट प्रबिधिको कालोपत्रे गर्न नाली, सडक चक्लाउने, पर्खाल लगाई सकेर केही भागमा बेस र सब बेस राखेका छन् । कोरोनाका कारण फागुन देखि ६ महिना म्याद थप गर्ने प्रक्रिया अघि बढाएको कार्यालयले जनाएको छ ।


Views: 91