मटला भीरमै रोकियो ढोरपाटन र गुर्जा जोड्ने सडक

ध्रुबसागर शर्मा   POSTED ON : बैशाख २१, २०७८ (५:०८ PM)

मटला भीरमै रोकियो ढोरपाटन र गुर्जा जोड्ने सडक

म्याग्दी । म्याग्दीको अत्यन्त दुर्गम ठाउँ धौलागिरि गाउँपालिका १ गुर्जा र बागलुङ,रुकुम र म्याग्दीको सीमानामा पर्ने ढोरपाटन क्षेत्रमा पुग्ने सडक निर्माणको काम धौलागिरी गाउँपालिका ३ मुनाको मटला भीरमा पुगेर रोकिएको छ ।

सडक डिभीजन कार्यालयमार्फत निर्माण हुन लागेको मुना–ढोरपाटन सडक खण्ड अन्तर्गत  पर्ने मटला भीरको विशाल पहरो फुटाउने काममा ढिला सुस्ती हुँदा सडक निर्माणको काम  रोकिएको हो ।

जिसी कन्ट्रक्सनले निर्माणको जिम्मा लिएको मटला भीर  सडक खण्डका लागि चालु आर्थिक वर्षमा सडक डिभिजन कार्यालयबाट रु २ करोड,धौलागिरि गाउँपालिकाबाट रु २५ लाख र मालिका गाउँपालिका वडा नं २ लुलाङबाट रु १५ लाख विनियोजन भएको थियो ।

राष्ट्रिय वनको क्षेत्र भित्र पर्ने मटला भिरमा बन कार्यालयको अनुमति विना सडक निर्माण गर्न लागिएकोले मुद्धा परेपछि त्यसको छिनोफानो नहुन्जेलसम्म लुलाङको खोरिया गाउँबाट सडकको ट्रयाक खोल्न नसकिएको धवलागिरि गाउँपालिका वडा नं २ लुलाङका वडासदस्य मतिप्रसाद पाइजाले बताउनु भयो ।

मुना–ढोरपाटन सखडक खण्ड  लुलाङको लमसुङदेखि खोरिया गाउँसम्म पुगेको छ । मटला भीरको पहरो फुटाएर ट्रयाक खोल्ने हो भने चालु आर्थिक वर्षमा नै खोरिया गाउँसम्म मोटर पुग्न सक्ने भएको छ । 

यो सडकको ट्रयाक खुलेर यातायातका साधनहरु संचालन भएमा म्याग्दी,बागलुङ,रुकुम,रोल्पा लगाएतका जिल्लाका हजारौं सर्वसाधारणलाई सजिलो हुने वडा सदस्य मतिप्रसाद पाइजाले बताउनुभयो । बागलुङको बुर्तिवाङ हुँदै ढोरपाटन जोड्ने सडक भन्दा यो सडक निकै छोटो र सहज भएकाले निर्माण कार्यलाई तिब्रता दिन स्थानीयले माग गरेका छन् ।

त्यसैगरी जिल्लाकै अति दुर्गम गाउँ मानिने गुर्जा जोड्ने सडक पनि यही भएकोले धौलागिरि गाउँपालिकाको पहिलो प्राथमिकतामा यो सडक रहेको धौलागिरि गाउँपालिका ३ का वडाअध्यक्ष पुर्म पुनले बताउनु भयो । जिल्लाको दुर्गम वस्ती र बागलुङ,म्याग्दी रुकुमलाई जोड्ने यो सडक निर्माण कार्यलाई तिव्रता दिई समयमा नै ट्रयाक खोल्न सक्ने हो भने युगौंदेखि पिछिडिएका दुर्गम गाउँका नागरिकले सुविधा प्राप्त गर्न सक्ने उहाँको भनाइ रहेको छ ।

यो सडक निर्माण भएर सवारीका साधनहरु संचालन हुन थालेपछि पश्चिम म्याग्दीका विकट वस्तीहरुका मानिसहरुलाई सुविधा पुग्नुको साथै उनीहरुको आर्थिक अवस्थामा उल्लेख्य सुधार आउने अपेक्षा गरिएको छ ।

मुना, लुलाङ, मुदी र गुर्जाका साथै ढोरपाटन क्षेत्र जडिबुटी,खनिज,वनपैदावर,पशुपालन,पर्यटन र प्राङ्गारिक कृषिको लागि अति नै सम्भावना बोकेका ठाउँहरु भएकाले सडक सुविधा भएपछि त्यहाँ पाइने प्राकृतिक वस्तु र आग्र्यानिक खाद्यान्न, तरकारी र फलफूलले बजार पाउने स्थानीयको आशा रहेको छ ।




Top