संक्रमित बढेपछि धौलागिरी अस्पतालमा अक्सिजन अभाव

डम्मर बुढा मगर   POSTED ON : जेठ २, २०७८ (१:१९ PM)

संक्रमित बढेपछि धौलागिरी अस्पतालमा अक्सिजन अभाव

बागलुङ । बागलुङमा कोरोना संक्रमितको संख्या बढ्दै गएपछि गण्डकी प्रदेशको दोस्रो ठूलो धौलागिरी अस्पतालमा अक्सिजन अभाव हुन थालेको छ । कोरोनाको दोस्रो लहरको नयाँ भेरियन्टसँगै कोरोना संक्रमण दर तीव्र बढ्दा धौलागिरी अस्पतालमा अहिले लक्षणसहितका गम्भीर अवस्थाका ३५ र इर्मजेन्सी कक्षमा समेत ५ जना गरी ४० जना कोरोना संक्रमित उपचाररत छन् । 


अस्पतालमा दुई वर्ष अगाडी अक्सिजन प्लान्ट जोडिए पनि अक्सिजन भर्ने उपकरण नहुँदा अक्सिजन अभाव भएको अस्पतालले जनाएको छ । अहिले धौलागिरी अस्पतालमा १२ देखि १५ मिनेटमा एक सिलिण्डर खपत भइरहेको छ । अस्पतालमा ८० सिलिण्डर छ । अक्सिजन प्लान्ट भएपनि भर्ने उपकरण अभावमा पोखरा पठाउनुपर्ने बाध्यताले तत्कालनै अक्सिजनको अभाव हुन थालेको धौलागिरी अस्पताल बागलुङका मेडिकल सुपरिटेण्डेन्ट डा.शैलेन्द्र बिक पोखरेलले बताउनुभयो ।

‘दुई दिन भयो अस्पतालमा अक्सिजनको अभाव हुन थालेको छ, पोखरामा सिलिण्डर भर्नका लागि दैनिक ४÷५ वटा गाडी पठाइरहेका छौं, समस्या हुने देखिएको छ’ डा.पोखरेलले भन्नुभयो ‘चालकले पोखरा भ्यालीमै केन्द्रित गर्न थालेकाले हामीलाई ढिलाइ गरेर दिन थालियो भन्छन्, यहाँ उपचाररत बिरामीलाई अक्सिजन अभाव हुने जोखिम बढ्यो, पर्वत र म्याग्दीबाट समेत अक्सिजन सिलिण्डर लिएर समेत काम चलाइरहेका छौं ।’

कालीगण्डकी अक्सिजन सप्लायर्स पोखराले अक्सिजन उपलब्ध गराउँदै आएको छ । खाली सिलिण्डर लैजाने र त्यही ल्याएर जोड्ने गरेर काम चलाउँदा समस्या भइरहेको पोखरेलको भनाई छ । ‘अस्पतालमा भर्ना भएका सबै जसो बिरामीलाई अक्सिजन आवश्यक देखिएको छ,’ उहाँले भन्नुभयो ‘हामी चरम तनावमा छौं, यो बेला सबै तिर अक्सिजन सिलिण्डरको अभाव छ, यहाँ निरन्तर आइरहेको पनि आउन कम हुँदा समस्या भएको हो, यसबारे सम्बन्धित निकाय सबैमा खबर गरिसकेका छौं ।’

धौलागिरी अस्पतालमा अक्सिजनको अभाव हुन नदिने गण्डकी प्रदेश स्वास्थ्य निर्देशनालयका आपूर्ति विभाग प्रमुख खिमबहादुर खड्काले बताउनुभयो । ‘हामीले निरन्तर यहाँ आएका सिलिण्डर भरेर पठाइरहेका छौं, अहिले देशव्यापीरुपमा अक्सिजनको अभाव छ,’ खड्काले भन्नुभयो, ‘हामीले प्रदेशका सबै जिल्लामा सन्तुलित हिसाबले अक्सिजन पु¥याउनु पर्नेछ । यस क्रममा केही ढिला भएको हुन सक्छ, हामीले जतिसक्दो छिटो अक्सिजन पठाउन आवश्यक पहल गरि रहेका छौं ।’

गण्डकी प्रदेश सरकार सामाजिक विकास मन्त्रालयले धौलागिरी अस्पतालमा २०७६ साल पुसमा अक्सिजन प्लान्ट स्थापना गरेको थियो । अक्सिजन प्लान्टमा उत्पादन भएको अक्सिजन सोझै अस्पतालमा रहेको बिरामीको बेडमा पाइप लाइनबाट पुग्ने भए पनि अक्सिजन सिलिण्डरमा भर्न नमिल्दा समस्या छ ।  

पाइप लाइनबाट खपत भएर रहेको अक्सिजन सिलिण्डरमा भर्न सकेको खण्डमा कोरोना महामारीमा अक्सिजनको अभाव टार्न मद्दत पुग्ने भए पनि अक्सिजनको ‘फिलिङ सिस्टम’ नहुँदा अस्पतालको अक्सिजन प्लान्टमा उत्पादन भएको आधा जस्तो अक्सिजन खेर गइरहेको छ । 

धौलागिरी अस्पताललाई १ सय शैयाको कोभिड अस्पतालको रुपमा विकास गर्ने गण्डकी प्रदेश सरकारले निर्णय गरिसकेको छ । संक्रमितको संख्या दिन प्रतिदिन बढेपछि अक्सिजनको चरम अभाव हुन थालेको छ । जिल्लाका सबै स्थानीय तह, म्याग्दी, पर्वतका बिरामीको पनि यही अस्पतालमा उपचार गर्नु पर्ने हुँदा थप संकट पर्ने देखिन्छ । अस्पतालले सम्बन्ति निकायलाई जानकारी गराइ सकेको छ ।


Top