13th August | 2020 | Thursday | 2:45:38 AM

मेरो रगत–रगतमा कांग्रेस बगिरहेको छ : जोशी

हिमालय टाइम्स   POSTED ON : श्रावण १५, २०७७ (९:२५ AM)

मेरो रगत–रगतमा कांग्रेस बगिरहेको छ : जोशी

काठमाडौं । गत आम निर्वाचनमा आफ्नै पार्टीका उम्मेदवारलाई पराजित गराउन भूमिका खेलेको भन्दै नेपाली कांग्रेसले पार्टीका केही नेताहरूलाई अनुशासनको कारबाहीस्वरूप निष्कासन गरेको छ । जसमा पार्टी नेता तथा पूर्वमन्त्री गोविन्दराज जोशी र पूर्व–राज्यमन्त्री पुष्करनाथ ओझा र डडेल्धुरा कांग्रेसका कार्यालय सचिव रामबहादुर विष्ट पाँच वर्षका लागि पार्टीबाट निष्कासनमा पर्नुभएको छ । जोशी तनहुँका र ओझा कैलालीका नेता हुनुहुन्छ । उहाँहरूमाथि आम निर्वाचनमा पार्टी उम्मेदवारहरूलाई अन्तर्घात गरी हराएको उजुरी परेको थियो । पार्टी अनुशासन समितिले उजुरीमाथि छानविन गरी उहाँहरूलाई स्पष्टीकरण लिएर कारबाही गरिएको जनाएको छ । यसको पक्ष र विपक्षमा पार्टीभित्रै पनि मत विभाजित छ । शीर्ष नेतृत्वले आफ्नो व्यक्तिगत स्वार्थपूर्तिका लागि अनुशासनको  डण्डा चलाएको टिप्पणी पनि भइरहेको छ । यसै सम्बन्धमा पार्टीको कारबाहीमा पर्नुभएका पूर्वमन्त्री गोविन्दराज जोशीसँग हिमालय टाइम्सले गरेको संक्षिप्त कुराकानी । 

पार्टीको अनुशासन उल्लंघन गरेको भन्दै तपाईँलगायत केही नेतालाई कांग्रेसको अनुशासन समितिले पाँच वर्षसम्म पार्टीबाट निष्कासन गरेको छ । यस विषयमा तपाईँको धारणा के छ ?

नेपाली कांग्रेसले अनुशासनका नाममा जुन कारबाही गरेको छ, यसमा प्राकृतिक न्यायको सिद्धान्तलाई समेत निमोठिएको छ । मसँग वैरभाव भएको व्यक्तिलाई अनुशासन समितिको सदस्य बनाएर त्यस्तो समितिले कारबाही गरेकाले यो अराजनीतिक, अनैतिक र विधानविपरीत छ । पदलोलुप र स्वार्थी व्यक्तिको कब्जामा पार्टी परेकाले यो लगनशील, क्षमतावान, इमानदार र सिद्धान्तनिष्ठ व्यक्तिमाथि गरिएको सुनियोजित प्रहार हो । शेरबहादुर देउवा र रामचन्द्र पौडेलको भागबण्डा र स्वार्थका आधारमा कारबाही गरिएको हो । यसले सिद्धान्तनिष्ठ र लगनशील कार्यकर्तालाई समेत स्तब्ध बनाएको छ । यस्तो कदम अमान्य भएकाले म घोर आपत्ति प्रकट गर्दछु । 

तपाईँले यसलाई अमान्य भने पनि पार्टीले त कारबाही गरिसक्यो, अब चाहिँ तपाईंको कदम कस्तो रहन्छ ?

हेर्नुस् , मेरो रगत रगतमा कांग्रेस छ । म र मेरो परिवारले यो पार्टी निर्माणका लागि धेरै रगत र पसिना बगाएको छ । म राष्ट्रियता र प्रजातन्त्रको पक्षमा आफूलाई सधैँ समर्पित गर्छु । सञ्चार माध्यममा बोलेर, लेखेर मैले आफ्नो विचार प्रवाहित  गरिरहन्छु । पार्टीका आम नेता र कार्यकर्ताले पनि पदलोलुप र सिद्धान्तच्युत व्यक्तिलाई छुट्याउन सक्नुपर्छ । सत्ताको साँचो हात पार्नका लागि जोसँग पनि सहमति र सहकार्य गरेर आज कांग्रेस पार्टीलाई बद्नाम बनाइएको छ । त्यसको विरुद्धमा म आवाज उठाइरहन्छु । कांग्रेस पार्टी मर्नु भनेको प्रजातन्त्र पनि समाप्त हुनु हो । त्यसैले राष्ट्रियता र प्रजातन्त्रको  पक्षमा आफूलाई उभ्याउँदै अघि बढ्छु । 

यसको मतलव तपाईँले छुट्टै पार्टी खोलेर आफ्नै किसिमको जनमत निर्माण सोचमा हुनुहुन्छ ?

बिपी कोइरालाले अघि सारेका सिद्धान्तलाई नेपाली कांग्रेसले भुल्दै गएको छ । अघि नै भनिसकेँ मेरो रगत रगतमा कांग्रेस बगिरहेको छ । मैले अहिले नयाँ पार्टी खोल्ने कुनै सोच बनाएको छैन । म कांग्रेसका सिद्धान्त र मान्यताप्रति सधैँ दृढ र प्रतिबद्ध छु । अब कस्तो परिस्थिति निर्माण हुँदै जान्छ त्यसले पनि प्रभाव पार्छ । 

तनहुँमा तपाईँको पक्षमा ठूलो जनमत छ, त्यहाँकोे राजनीतिमा अब तपाईँको भूमिका के रहन्छ ? अनि तपाईँसँग सहकार्य गरेका साथीहरूलाई के भन्नुहुन्छ ?

तनहुँ जिल्लासँग मेरो गहिरो सम्बन्ध छ । त्यहाँ कांग्रेसलाई स्थापित गराउने पहिलो व्यक्ति म नै हुँ । म प्राय त्यहाँका सबै जनताका घरघरमा पुगेको छु । तनहुँको विकासका लागि मैले सकेको योगदान दिइरहेको छु । आगामी दिनमा पनि मेरो सक्रियता घट्ने छैन ।  त्यहाँ मसँग सहकार्य गरेका साथीहरू धेरै हुनुहुन्छ । उहाँहरूलाई मेरो साथ सधैँ रहन्छ । ममाथि जुन अन्याय भएको छ, यसमा साथीहरूलाई कत्ति पनि निराश र विचलित नहुन आग्रह गर्दछु । सबै साथीहरूलाई साथमा लिएरै अगाडि बढ्छु । आगामी निर्वाचनसम्म पार्टीले आफ्नो निर्णय सच्चायो भने चुनावमा पनि उठ्न सकिन्छ । 

तपाईँहरूमाथि जसरी कारबाही गरियो यसले कांग्रेसलाई के असर पार्ला ?

सबैभन्दा ठूलो  कुरा त पार्टीप्रति नै भरोसा घट्छ । राजनीतिक क्षेत्रमा मेरो लगनशीलता र निष्ठा आम पार्टी नेता कार्यकर्ताले बुझ्नुभएकै छ । अनि त्यस्ता नेता पनि कारबाहीको शिकार बन्छन् भने अन्य नेता, कार्यकर्तामा त्यसले कस्तो मनोविज्ञान बनाउँछ ? त्यसैले यो घटनाले पार्टीका इमानदार, सक्षम र लगनशील व्यक्तिलाई निराश बनाइदिएको छ । आम मतदाता पनि विकर्षित भएका छन् । यसको प्रभाव तनहुँ मात्र होइन देशैभर पर्छ । गलत पात्रहरू पार्टीको नेतृत्वमा हालीमुहाली गरुन्जेलसम्म यो स्थिति देखापर्छ । मलाई लाग्छ, यसबाट नेपाली कांग्रेसले ठूलो मूल्य चुकाउनुपर्छ । नेतृत्वको कार्यशैली र क्षमतामा सुधार आएन भने कांग्रेसको समाप्तिको घडी झन् छोटिँदै जान्छ । त्यो भनेको प्रजातन्त्रमाथिकै प्रहार हो । 

त्यसो भए रामचन्द्र पौडेल र तपाईँबीचको द्वन्द्वले नै यो  परिस्थिति सिर्जना भएको हो त ?

पक्कै पनि, रामचन्द्र पौडेलले तनहुँमा केही काम गर्न सक्नुभएको छैन । विकास, निर्माणका साथै जनताका सवालमा उहाँलाई कुनै सरोकार छैन छ त केवल पद र पैसाको । त्यसैले  आम जनता र मतदातामा पनि उहाँ लोकप्रिय हुन सक्नुभएको छैन । जनतामाझ रहेको मेरो लोकप्रियताले उहाँलाई सधँै पिरोलिरहेको हुन्छ । त्यसकारण दम्भ र आफ्नो अलोकप्रियताको कारण मलाई डण्डा चलाउनुभएको हो । तर, यसले उहाँकै राजनीतिक जीवन ध्वस्त हुने पक्का छ । 

पार्टीले आफ्नो निर्णय सच्याउला त ?

मलाई लाग्छ अहिले कांग्रेसको नेतृत्वमा विवेकभन्दा पनि गुट र स्वार्थ समूहको पकड छ । क्षमता होइन, चाकडीवादको हालीमुहाली छ । त्यसैले अहिलेकै नेतृत्व र प्रवृत्तिले त्यो सच्चिएला जस्तो चाहिँ लाग्दैन । 


Views: 256