कर्णाली प्रदेश समाज दक्षिण कोरिया र जापानबाट अक्सिजन कन्सन्ट्रेसन मेसिन हस्तान्तरण

खगेन्द्र अधिकारी   POSTED ON : असार २, २०७८ (५:२३ PM)

 कर्णाली प्रदेश समाज दक्षिण कोरिया र जापानबाट अक्सिजन कन्सन्ट्रेसन मेसिन हस्तान्तरण

सुर्खेत । कर्णाली प्रदेश समाज दक्षिण कोरिया र जापानले प्रदेश सरकारलाई अक्सिजन कन्सन्ट्रेसन मेसिन हस्तान्तरण गरेको छ । बुधबार सामाजिक विकास मन्त्री यज्ञबहादुर बुढाक्षेत्रीलाई कर्णाली प्रदेश समाज दक्षिण कोरियाका सल्लाहकार लक्ष्मीप्रसाद बस्नेत र जापानका सल्लाहकार प्रेम रावलले सात थान अक्सिजन कन्सन्ट्रेसन हस्तान्तरण गर्नुभएको हो ।

 कार्यक्रममा सामाजिक विकास मन्त्री बुढाक्षेत्रीले कोरोना संकटका बेला रोजगारीका लागि विदेशमा रहेका नेपालीहरुले गरेको सहयोग महत्वपूर्ण रहेको बताउनु भयो । ‘रोजगारीका लागि कोरिया र जापानमा रहेका नेपालीहरुले आफ्नो छाक काटेर कोरोना संकटमा गरेको सहयोग धेरै महत्वपूर्ण छ,’ मन्त्री बुढाक्षेत्रीले भन्नुभयो, ‘आफ्नो माटोप्रतिको माया देखाउने सम्पूर्ण विदेशी भूमिमा रहेका नेपालीहरुलाई सरकारकोतर्फबाट हार्दिक आभार व्यक्त गर्दछु ।’

 कर्णाली प्रदेश समाज दक्षिण कोरियाका अध्यक्ष प्रकाश बस्नेतले कोरिया र जापानमा रहेका नेपालीहरुले संकलन गरेको रकमबाट सात थान अक्सिजन कन्सन्ट्रेसन प्रदान गरिएको बताउनु भयो । ‘कोरोनाका कारण अक्सिजन नपाएर हाम्रा आफन्तहरुले दुःख पाएको टुलुटुलु हेरेर बस्न सकेनौं,’ अध्यक्ष बस्नेतले भन्नुभयो, ‘छाक कटाएर केही रकम जम्मा ग¥यौं, त्यसैबाट अक्सिजन कन्सन्ट्रेसन मेसिन खरिद गरेर पठाएका हौं ।’

 कर्णाली प्रदेश समाज दक्षिण कोरिया र जापानबाट सात थान १० लिटरका अक्सिजन कन्सन्ट्रेसन मेसिन कर्णाली प्रदेश अस्पतालसहित पाँच जिल्लालाई वितरण गरिएको हो । कर्णाली प्रदेश समाज जापानका अध्यक्ष कृष्ण शाहीले कर्णाली प्रदेश अस्पतालमा दुई, चौरजहारी मिसन अस्पताल, जाजरकोट जिल्ला अस्पताल, दैलेख जिल्ला अस्पताल, कालिकोटको राष्टकोट अस्पताल र कर्णाली स्वास्थ्य विज्ञान प्रतिष्ठानमा एक–एक थान अक्सिजन कन्सन्ट्रेसन उपलब्ध गराइएको बताउनु भयो ।

 


Views: 81

Top