13th April | 2021 | Tuesday | 6:39:32 PM

गुल्मी काँग्रेसले मनायो ४५ औं मेलमिलाप दिवस

रमेश विश्वकर्मा   POSTED ON : पुष १६, २०७७ (६:२३ PM)

गुल्मी काँग्रेसले मनायो ४५ औं मेलमिलाप दिवस

गुल्मी । गुल्मी जिल्लामा पनि नेपाली काँग्रेसले ४५ औं राष्ट्रिय एकता तथा मेलमिलाप दिवस मनाएको छ । गुल्मी काँग्रेसले सदरमुकाम तम्घासस्थित पार्टी कार्यालय वीपी स्मृति भवनमा एक औपचारिक अन्तरक्रिया कार्यक्रमको आयोजना गरि राष्ट्रिय एकता तथा मेलमिलाप दिवस मनाएको हो । 


कार्यक्रममा रेसुङ्गा बहुमुखी क्याम्पसका पूर्व क्याम्पस प्रमुख चन्द्रकान्त पन्थीले नेपाली कांग्रेस पार्टीका संस्थापक विश्वेश्वरप्रसाद कोइराला (वीपी), लौहपुरुष गणेशमान सिंह, नेत्री शैलजा आचार्य र नेता खुमबहादुर खड्का लगायतका शिर्षनेताहरु ८ वर्ष लामो निर्वासन अन्त्य गरी मेलमिलापको नीति लिएर वि.सं. २०३३ पुष १६ गते स्वदेश फर्किएको बताउनु भयो ।

 त्यस्तै कार्यक्रममा उहाँले स्वदेशमा फर्केर आउँदा वीपी कोइराला लगायतका नेताहरुले लिएको राष्ट्रिय एकता तथा मेलमिलापको नीतिको बारेमा बताउनु भयो । राष्ट्रिय मेलमिलापको नीति लिएर नेपाल फर्केको दिनलाई नेपाली कांग्रेसले सम्झिरहने र अहिले देशको पछिल्लो अवस्थालाई हेर्दा वीपीको नीति अत्यन्तै आवश्यक रहेको उल्लेख गर्नुभयो ।  


नेपाली काँग्रेस पार्टी प्रजातन्त्रको जननी भएको कार्यक्रमका सभापति समेत रहुनभएको नेपाली काँग्रेस गुल्मीका सभापति भुवन प्रसाद श्रेष्ठले पछिल्लो समय प्रधानमन्त्री केपी शर्मा ओलीले गरेको असंवैधानिक कदमलाई कार्यक्रम मार्फत सच्चाउन आग्रह गर्नुभयो । उहाँले पधानमन्त्रीको यो असंवैधानिक कदमले प्रजातन्त्रलाई मास्ने र संघीयतालाई धरापमा पार्न सक्ने उल्लेख गनुृभयो । देशमा कम्युनिष्टले बहुमत प्राप्त गरी ५ वर्षसम्म सरकार चलाउन दिएपनि जनताको मतलाई कुठाराघात गरेको सभापति श्रेष्ठले भन्नुभयो,‘कम्युनिष्टहरु आन्तरिक किचलोका कारण देशलाई नै बन्धक बनाउने काममा छन् ।’ कम्युनिष्टहरुले जनतालाई दुःख दिंदै देशलाई अप्ठ्यारो परिस्थितिमा पु¥याएको उहाँको भनाइ थियो ।

उपसभापति बिष्णुप्रसाद बलालले प्रधानमन्त्रीले चालेको असंवैधानिक कदमले संविधान माथि बलात्कार भएको बताउनु भयो । उहाँले प्रधानमन्त्रीको यो कदमले मुलकुलाई अँध्यारोमा धकेल्न सक्ने उल्लेख गर्नुभयो । सचिव खिलध्वज पन्थीले वीपीको नीति आज जति सान्दर्भिक छ भोलि पनि त्यो भन्दा बढी सान्दर्भिक हुने बताउनु भयो । उहाँले प्रधानमन्त्री ओलीको असंवैधानिक कदम विरुद्ध काँग्रेस पार्टी एकढिक्का भएर सडकमा आउनुपर्ने कुरामा जोड दिनुभयो ।

 कार्यक्रममा नेपाली काँगे्रसका नेता तथा कार्यकर्ताहरु, भातृ तथा शुभेच्छुक संस्थाका प्रमुख एवम् प्रतिनिधिहरु पत्रकार समेतको उल्लेखनीय उपस्थित रहेको थियो । 


Views: 78