13th April | 2021 | Tuesday | 8:05:32 PM

सिडिओ न्यानो कपडा लिएर वृद्धाश्रममा

रमेश विश्वकर्मा   POSTED ON : माघ २६, २०७७ (५:२३ PM)

सिडिओ न्यानो कपडा लिएर वृद्धाश्रममा

गुल्मी । केही समय अघि महिला सिडिओ (प्रमुख जिल्ला अधिकारी) का रुपमा गुल्मी आउनु भएको रुद्रादेवी शर्मा न्यानो कपडा लिएर वृद्धाश्रम पुग्नु भएको छ । अत्याधिक चिसो बढेपछि जिल्लाको सत्यवती गाउँपालिका १ अस्लेवास्थित राममन्दिर तारकेश्वर परमानन्द सन्यास आश्रममा रहेका नागरिकहरुलाई चिसोबाट बचाउन प्रजिअ शर्मा न्यानो कपडा लिएर आश्रममा पुग्नुभएको हो ।

जिल्ला आएको छोटो समयमै शान्ति सुरक्षा व्यवस्था कायम गर्न, अपराध नियन्त्रण गर्न र विपद् व्यवस्थापनमा सक्रिय रहँदै आउनुभएको शर्मा चिसोका कारण जेष्ठ नागरिक बढी प्रभावित हुने भन्दै चिसोबाट जोगाउन न्यानो कपडा स्वरुप कम्बल लिएर शनिबार आश्रम पुग्नुभयो । उहाँले जिल्ला विपद् व्यवस्थापन कोषको रकमबाट त्यहाँका जेष्ठ नागरिकहरुलाई कम्बल वितरण गर्नुभयो । प्रजिअ शर्माले आश्रममा रहेका ४८ जना वृद्धवृद्धाहरुको लागि १० थान कम्बल दिनुभयो । चिसो बढेका बेला कम्बल लिएर सिडिओ नै आश्रममा पुगेपछि त्यहाँका वृद्धवृद्धाहरु खुसी भएका थिए । चिसोले आफुहरुलाई समस्या उत्पन्न भएको अवस्थामा कम्बल पाएकोमा सुखी लागेको ८९ वर्षीया एक वृद्धले बताइन् । उनले भनिन्, ‘जाडोमा न्यानो कपडा दिनुभयो, खुसी लागेको छ, धेरै–धेरै धन्यवाद भन्न चाहन्छु ।’

आश्रममा बस्ने जेष्ठ नागरिकहरु र स्याहारसुसार गर्ने तथा भान्सेहरुलाई कोरोना भाइरस (कोभिड–१९) विरुद्धको खोप पनि लगाइदिइएको छ । आश्रममा रहेका ४८ जना वृद्धवृद्धा र १२ जना उनीहरुको स्याहार सुसार गर्ने तथा भान्सेहरुलाई खोप लगाइएको प्रजिअ शर्माले बताउनु भयो । उहाँले त्यहाँका वृद्धवृद्धाहरुलाई व्यक्तिगत खर्चमा एकछाक भोजन समेत गराउनु भयो ।

यस्तै प्रजिअ शर्माले सोही समयमा २०७५ सालमा ठूलोलुम्पेकमा गएको भीषण पहिरोबाट विस्थापित घरपरिवारको गाउँपालिका र प्रदेश सरकारको सहयोगमा निर्माण भएका र निर्माणाधीन स्थायी आवासको समेत निरीक्षण गनुैभयो । उहाँले गतवर्ष संघको शसर्त अनुदानबाट स्थायी आवासहरु निर्माण भएतापनि पूर्णरुपमा निर्माण नभएको हुनाले सम्बन्धित निकायमा आफुहरुले पहल गर्ने बताउनु भयो । अहिलेसम्म गाउँपालिकाले २४ वटा घरहरु निर्माण गरिसकेको छ । प्रदेशबाट ७९ वटा घरहरु निर्माण गर्ने भनेता पनि अहिलेसम्म पूर्णरुपमा निर्माण भएका छैनन् ।


Views: 229