17th April | 2021 | Saturday | 10:50:35 PM

विद्यार्थी भन्छन्–‘न्याय कहिले सरकार’?

रामचन्द्र रायमाझी   POSTED ON : फाल्गुन २, २०७७ (४:०२ PM)

विद्यार्थी भन्छन्–‘न्याय कहिले सरकार’?

पाल्पा । नेपालमा दिनहुँ जसो विद्यार्थीहरु बलात्कार पछि हत्या हुने घटनाहरु बढ्दै गएपछि पाल्पाका विद्यार्थीहरुले न्यायको माग गरेका छन् । सरकारको गैरजिम्मेवारीका कारण दिनहुँ जसो स्कूल पढ्ने विद्यार्थीहरु बलात्कारपछि हत्या भइरहने घटनाहरु बढ्दै गएकाले हत्यामा संलग्नलाई कडा भन्दा कडा सजायको व्यवस्था गर्न विद्यार्थीहरुले सरकारसँग माग गरेका हुन् ।

कञ्चनपुरकी १३ वर्षीया बालिका निर्मला पन्तको बलात्कारपछि हत्या भएको तीन वर्ष नपुग्दै पुनः बैतडीको दोगडाकेदार ७ की १७ वर्षीया भागरथी भट्टले पनि त्यस्तै नियति भोग्नु परेको भन्दै पाल्पा इञ्जिनियरिङ्ग कलेजका विद्यार्थीहरुले तानसेनमा प्रदर्शन गरेका छन् । उनीहरुले निर्मला पन्तले अहिलेसम्म पनि न्याय पाउन नसकेको भन्दै ‘न्याय कहिले सरकार’ ? भन्दै प्रश्न गरेका छन् । प्रदर्शनमा विद्यार्थीहरुले निर्मलाले तीन वर्ष पुग्न लाग्दा समेत न्याय नपाएको अब कहिले पाउने सरकार ? भन्दै सरकारप्रति खरो रुपमा प्रस्तुत भएका थिए । उनीहरुले निर्मलाको जस्तै भागरथीको पनि त्यस्तै अवस्था सिर्जना हुने होकी भन्दै सरकारको ध्यानाकर्षण गराएका छन् । प्रदर्शनमा विद्यार्थीहरुले भागरथीको हत्याको घटनाका दोषीहरुलाई तत्काल पक्राउ गरी पिडितलाई न्याय दिन माग गरेका छन् । प्रदर्शन तानसेनको भगवतीटोलस्थित पाल्पा इञ्जिनियरिङ्ग कलेजबाट सुरु भई शित्तलपाटी, नारायणस्थान, टुँडिखेल, लहरेपिपल, पेट्रोलपम्प, तेस्रो सडक हुँदै शित्तलपाटीमा पुगेर कोणसभामा परिणत भएको थियो । प्रदर्शनपछि आयोजित कोणसभामा बोल्दै नेपाल विद्यार्थी संघ सिटिइभिटीका केन्द्रीय उपाध्यक्ष प्रमोद अधिकारीले भागरथी भट्टको बलात्कार पछि भएको हत्यामा संलग्न अपराधीलाई तत्काल पक्राउ गरी कारबाही गर्न सरकारलाई आग्रह गर्नुभएको छ । ‘बलात्कार र हत्याका घटनाका अभियुक्तलाई कारबाहीको दायरामा नल्याउँदा घटना अपराधीको मनोबल बढेको छ,’ उहाँले भन्नुभयो, ‘यसले सरकारको उदासीनता प्रस्ट झल्किन्छ ।’ सरकारले अपराधिहरुलाई नै संरक्षण गरेर राखेकाले दिनहुँ बलात्कारका घटनाहरु बढ्दै गएको उपाध्यक्ष अधिकारीले बताउनुभयो । सभामा विद्यार्थी नेताहरु केशव भण्डारी, दिपेन्द्र बूढा मगर, ज्ञानेन्द्र कुंवर,हिमानी गौतम, पदम रावत लगायतले निर्मला पन्त र भागरथी भट्टका पीडित परिवारलाई न्याय दिन सरकार समक्ष माग गरेका छन् । प्रदर्शनमा सहभागी विद्यार्थीहरुले निर्मला र भागरथीको फोटो र ब्यानरमा न्याय कहिले पाउने ?, ‘जवाफ चाहियो सरकार, किन बढ्यो बलात्कार ?, ‘हत्यारालाई फाँसी दे, हत्या हिंसा कहिलेसम्म ? भागरथीलाई न्याय दे, बलात्कारीलाई फाँसी दे, महिला हिंसा बन्द गर, दिदी बहिनीहरुको सुरक्षाको ग्यारेन्टी गर, बलात्कारीलाई लुकाउने सरकार हामीलाई चाहिदैन, गृह मन्त्री कहाँ छौं ? न्याय माग्न हामी यहाँ छौं, महिलालाई नै सुरक्षा दिन नसक्ने महिला राष्ट्रपति मुर्तवाद जस्ता शब्द लेखिएका प्ले कार्ड लिएर चर्को नारा लगाएका थिए । कक्षा १२ मा पढ्ने भागरथी भट्ट गत बुधबार स्कुल पढ्न गएको र गत बिहीबार उनको शव बीभत्स अवस्थामा भेटिएको थियो । उनको बलात्कारपछि हत्या भएको आशंका आफन्त र स्थानीयले गरेका छन् । प्रहरीले पनि घटनालाई शंकास्पद मान्दै अनुसन्धान थालेको छ । अहिले बलात्कार र हत्याजस्ता प्रत्येक अपराधका अपराधीहरूलाई राज्यले कानूनी कठघरामा उभ्याउन नसकेको भन्दै देशभर विद्यार्थीहरु आन्दोलित भएका छन् ।


Views: 70