दक्षिण कोरियाका इलामेद्वारा सहयोग

  POSTED ON : माघ ११, २०७३ (१०:०२ AM)

दक्षिण कोरियाका इलामेद्वारा सहयोग

इलाम । इलाम सूर्योदय सेवा समाज, दक्षिण कोरियाले वृद्धवृद्धा, अनाथ र दृष्टिविहीन बालबालिकाका लागि  डेढ लाखभन्दा बढी आर्थिक सहयोग प्रदान गरेको छ । 

समाजले माईभगवती वृद्धाश्रमका लागि भवन निर्माणका लागि ४१ हजार, गोलाखर्कमा रहेको राहसल बाल अनाथलयलाई एक लाख एक हजार र दृष्टिविहीन बालबालिकालाई लत्ताकपडाका लागि २१ हजार नगद हस्तान्तरण गरेको हो । 

वृद्धाश्रममा निर्माणाधीन भवनका लागि रकम अभाव भएको जानकारी प्राप्त भएपछि कोरियामा बस्ने नेपालीले सहयोग सङ्कलन गरेको इलाम सूर्योदय सेवा समाज, दक्षिण कोरियाका वरिष्ठ सल्लाहकार प्रतीक बोहोराले जानकारी दिए । 

गोलाखर्कमा रहेका अनाथ बालबालिकालाई शिक्षादीक्षामा टेवा पु¥याउने उद्देश्यले रु एक लाख एक हजार नगद अनाथालयका अध्यक्ष राजेन्द्र चौहानलाई हस्तान्तरण गरिएको छ । 

सदरमुकामस्थित बालमन्दिरमा अध्ययनरत दृष्टिविहीन बालबालिकालाई लत्ताकपडा खरिद गर्नका लागि बालमन्दिरकी श्रोत शिक्षिका महेश्वरी पाण्डेलाई समाजको तर्फबाट २१ हजार नगद हस्तान्तरण गरिएको छ ।

समाज दक्षिण कोरियाले यसअघि दोलखा जिल्लाको नाम्दु गाविसका करिब २०० भूकम्पपीडितलाई दुई लाख ५० हजार, ताप्लेजुङ र सप्तरीका अग्निपीडितलाई दुई लाख आर्थिक सहयोग गरेको छ । 

समाजले आर्थिक अवस्था कमजोर भएर काठमाडौँमा उपचाररत इनपाका सुशान्त तामाङलाई हालै तीन लाख आर्थिक सहयोग प्रदान गरेको समाजका अध्यक्ष हरिप्रसाद खनालले जानकारी दिए । रासस 


Top