16th January | 2021 | Saturday | 8:38:33 AM

उलंग राजा

नीरेन्द्रनाथ चक्रवर्ती   POSTED ON : मंसिर २०, २०७७ (८:३२ AM)

उलंग राजा

निरेन्द्रनाथ चक्रवर्ती पश्चिम बंगालको एकजना ख्यातिप्राप्त कवि थिए । उनको कविता संग्रह उलंग राजाको लागि उनले सन् १९७४ मा साहित्य अकाडेमी पुरुस्कार पाएका थिए । त्यही कविता संग्रहको शीर्षक कविता बांग्लाबाट अनुवाद गरेको छु ।

सबैले हेर्दैछन् राजा उलंग, तैपनि

 सबैले थपडी बजाई रहेका छन्

 सबै चिच्चाएर बोल्दैछन्

 श्याबास श्यावास ।

 कसैको मनमा संस्कार 

 कसैको मनमा भय,

 कसैले शायद आफ्नो विवेक 

अरू मान्छेलाई बन्धक दिएका छन् स

 केही शायद परान्नभोगी, 

केही कृपाप्रार्थी, उम्मेद्वार, प्रवञ्चक

 कोही सोच्छन्, राजवस्त्र साँच्चै 

अति सूक्ष्म, आँखाले 

 देखिँदैन तैपनि छ 

 अन्ततः हुनु कुनै असम्भव होइन ।

 कथा त सबैलाई थाहा छ 

 तर त्यो कथाभित्र

 केवल प्रशस्तिवाक्य (उच्चारक केही

 आपादमस्तक भयातुर, चाकडीबाज

 अथवा निर्वोध स्तुतिबाजमात्र थिएनन् ।

 एउटा शिशु पनि थियो 

 सत्यवादी, सरल, साहसी एउटा शिशु,

 झरेछ कथाको राजा 

वास्तवमा प्रकाश्य बाटामा ।

 फेरि टररर थपडी बज्यो

 भेला भएको छ 

 स्तुतिबाजहरूको भीड

 तर त्यो शिशुलाई 

भीडभित्र कतै देख्दिन ।

 शिशु कहाँ गयो ?

के कसैले उसलाई कुनै 

 पहाडको गोप्य गुफामा

 लुकाएर राखेको छ ?

 अथवा ऊ ढुंगा, घाँस, 

माटो लिएर खेल्दा खेल्दै 

निदाएछ 

कतै टाढा 

निर्जन नदीको किनारमा 

अथवा कुनै चौरको रूखको छायांमा ?

 जाऔं त्यसलाई जसरी भए पनि 

 खोजेर ल्याओ ।

 ऊ आएर एकचोटि 

यो उलंग राजाको सामु 

 निर्भय उँभियोस् ।

 अन्तिममा यो थपडीकोविरुद्ध

 शिर ठाडो पारेर 

 सोधोस् 

 राजा, तेरो लुगा खै ?

अनुवाद (मणि शर्मा)


Views: 207