27th January | 2021 | Wednesday | 6:31:36 PM

महिला राष्ट्रिय फुटबल लिग माघ पहिलो सातादेखि

  POSTED ON : पुष २५, २०७७ (८:३२ AM)

महिला राष्ट्रिय फुटबल लिग माघ पहिलो सातादेखि

काठमाडौं । महिला राष्ट्रिय फुटबल लिग आगामी माघ ७ गतेदेखि सञ्चालन हुनेभएको छ । अखिल नेपाल फुटबल संघ (एन्फा) का प्रवक्ता किरण राईका अनुसार महिला लिग एक महिनासम्म मात्र सञ्चालन हुनेछ ।

यसअघि एन्फाले उक्त लिग ६ महिनासम्म सञ्चालन गर्ने जनाएको थियो । कोरोना भाइरसको महामारीका कारण यस वर्ष महिला लिग ढिला सञ्चालन हुन लागेको राईले बताउनुभयो । कोरोनाको जोखिमका कारण लिग लामो समयसम्म सञ्चालन गर्न नसकिएको उहाँले उल्लेख गर्नुभयो ।

आगामी फागुन ७ गतेसम्म सञ्चालन हुने उक्त लिगमा कूल ४२ खेल खेलाइनेछ । उक्त लिगमा सात टोलीको सहभागिता रहने प्रवक्ता राईले जानकारी दिनुभयो । नेपाली सेनाको त्रिभुवन आर्मी फुटबल क्लब, नेपाल प्रहरीको पुलिस क्लब, सशस्त्र प्रहरी बलको एपीएफ क्लब तथा चार नगरस्तरीय टोलीले लिगमा प्रतिस्पर्धा गर्ने एन्फाले जनाएको छ ।

अर्को वर्ष महिला लिग सञ्चालन गर्न समय अपुग हुने भएकाले यस वर्षको लिगको समय घटाइएको हो । महिला लिगको विजेताले १५ लाख पुरस्कार प्राप्त गर्नेछ । उक्त लिग त्रिपुरेश्वरस्थित दशरथ रंगशाला र ललितपुरको सातदोबाटोस्थित एन्फा कम्पलेक्समा हुनेछ । कोरोना महामारीका कारण गत चैतयता महिला फुटबल खेलाडी मैदानमा उत्रन पाएका छैनन् । लिग सुरु भएसँगै महिला खेलाडीलाई लयमा फर्कन सहयोग पुग्ने नेपाली टोलीकी कप्तान रेनुका नगरकोटी बताउनुहुन्छ । उहाँले एकवर्ष ढिलो गरी मैदान उत्रिन खेलाडी आतुर रहेको बताउनुभयो ।

एन्फाले स्थगित भएको विसं २०७६ को शहीद स्मारक ‘सी’ डिभिजन लिग आगामी चैत १ गतेदेखि सञ्चालन गर्ने यसअघि नै घोषणा गरिसकेको छ । उक्त लिग कोरोनाका कारण गत वर्ष चैतमा स्थगित भएको थियो । सी डिभिजन लिगको तयारी गर्न एन्फाले प्रत्येक क्लबलाई नौ लाख सहयोग गर्ने घोषणा गरेको छ ।

यसअघि लिग तयारीका लागि प्रत्येक क्लबलाई एन्फाले सात लाख आर्थिक सहयोग गर्दै आएको थियो । यस्तै एन्फाले विसं २०७६ मा कोरोनाका कारण स्थगित गरिएको शहीद स्मारक बी डिभिजन लिग पनि आगामी फागुन ११ गतेदेखि पुनःसञ्चालन गर्ने निर्णय गरेको छ । यी सबै लिग सञ्चालनका क्रममा स्वास्थ्य मापदण्डको पालना गरिनुका साथै सबै खेलाडीको कोरोना परीक्षण गरिने एन्फाले जनाएको छ । नेपाली फुटबल टोलीका खेलाडीहरू भने अहिले विश्वकप छनोटअन्तर्गतका खेलका लागि तयारी गरिरहेका छन् ।


Views: 52

सम्बन्धित सामग्री: