सुकेका रूखमुनि जोखिमपूर्ण बसाई

भजनी । कैलालीको टीकापुर बहुमुखी क्याम्पससँग ३८० बिघा जग्गा छ । विसं २०५८ मा स्थापना गरिएको क्याम्पसलाई तत्कालीन टीकापुर नगर विकास समितिले उक्त जग्गा उपलब्ध गराएको थियो । उपलब्ध गराएको जग्गामध्ये क्याम्पसले ८० बिघा जग्गामात्रै प्रयोग गर्न पाएको छ भने बाँकी जग्गा वर्षौंदेखि अतिक्रमणमा छ ।

अतिक्रमणमा परेको जग्गा त्यतिबेला जंगल नै थियो । अहिले पनि सालका र असनाका रूख त्यो क्षेत्रमा छन् । त्यहाँ भएका रूखमध्ये अधिकांश सुकेका छन् । कैयौँ रूख सुकेर त्यहीँ ढलेका छन् भने कैयौँ त्यस्ता रूख रातारात त्यहाँबाट गायब हुने पनि गरेका छन् । क्याम्पसको जग्गा अतिक्रमण गरेर सयौँ घर निर्माण भएका छन् । रूखका फेदमा निर्माण भएका घर निकै असुरक्षित छन् । ‘गर्मीयाममा हाम्रो जनजीवन निकै त्रासमा हुन्छ, सुकेका रूखका फेदमा टिनका छाप्रामा कतिबेला के हुन्छ, थाहै हुँदैन,’ स्थानीयवासी रणबहादुर विकले भन्नुभयो, ‘बर्सेनि सुकेका रूख हावाहुरीसँगै खस्दा कैयौँले ज्यान गुमाउनुपरेको छ, कैयौँ विस्थापित हुनुपरेको छ ।’

उहाँले सरकारलाई सुरक्षित स्थानमा स्थानान्तरणका लागि पटक-पटक हारगुहार गर्दा पनि सुनुवाइ नभएको बताउनुभयो । सुकेका रूखलाई समयमा व्यवस्थापन गर्न सके आफूहरू सुरक्षित हुने उहाँ बताउनुहुन्छ ।

सोही शिविरमा बस्दै आउनुभएका वीरबहादुर चौधरीले ज्यान हत्केलामा राखेर दिन बिताउनुपरेको बताउनुभयो । उहाँले वर्षातको समयमा हुने किरा-फट्यांग्राको जोखिम, हिउँदमा शीतलहरको जोखिम, गर्मी मौसममा हावाहुरीको जोखिम शिविरका नागरिकका लागि सधैँ महँगो पर्दै गएको बताउनुभयो । ‘यो ठाउँ छाडेर अन्त कतै जानलाई जाने ठाउँ छैन, यतै बस्दा ज्यान सुरक्षित छैन, राज्य हाम्रा कुरा सुन्दैन,’ वीरबहादुर भन्नुहुन्छ । क्याम्पसले संकलन गरेकै काठ बिक्रीका लागि अनुमति नपाएपछि काठ संकलनको कामलाई छाडेको छ । केही वर्षपहिले संकलन गरेको करिब दुई हजार पाँच सय क्युफिट काठ बिक्रीका लागि अनुमति नपाएपछि बिग्रन थालेको छ ।

‘संकलन भएको काठ बिक्रीका लागि वन मन्त्रालयसँग पटक-पटक अख्तियारी माग्दा पनि अख्तियारी दिएको छैन, काठ बिग्रँदै गएको छ,’ क्याम्पस प्रमुख केशरबहादुर कुँवरले भन्नुभयो, ‘बिक्री गर्न नपाएपछि संकलनमात्रै गरेर के गर्ने भनेर संकलन गर्न पनि छाडेका हौँ, अख्तियारी नदिए सालको काठ बिक्री गर्न पाइँदैन ।’

उहाँका अनुसार सुकेर ढलेका रूखको संरक्षण क्याम्पसले गर्न छाडेको छ । त्यस्ता रूख शिविर क्षेत्रबाट रातारात गायब हुने गरेका छन् । कति रूख कसको अधीनमा पुगे त्यसको लगत क्याम्पसले राख्न छाडेको छ । ‘काठ बिक्रीका लागि समन्वय गर्दा नै थुप्रै रकम खर्च भएको छ, न त विभागले काठ बिक्रीका लागि अनुमति दिन्छ, न त स्थानीय सरकारलाई आग्रह गर्दा सुनेको छ,’ क्याम्पस प्रमुख कुँवर भन्नुहुन्छ, ‘कतैबाट सकारात्मक प्रतिक्रिया आउन छाडेपछि हामीले पनि त्यसमा चासो दिन छोडेका छौँ ।’

क्याम्पसको हाताभित्र संकलन भएको काठ २५ लाख बराबरको छ । सुकेका रूखलाई व्यवस्थापन गरेर बिक्री गरे करोडौँ आम्दानी गर्न सकिने उहाँ बताउनुहुन्छ । यसले एकातिर स्थानीयवासीलाई ज्यान जोगाउन गाह्रो भएको छ भने अर्कोतिर राज्यकोषमा आउने ठूलो स्रोत गुमेको छ । शिविरमा अन्य आधारभूत आवश्यकता पनि पुगेका छैनन् । शिक्षा, यातायात, खानेपानी, बिजुली बत्तीलगायतका आवश्यकतामा पनि शिविरका नागरिक वञ्चित हुँदै आएका छन् ।

टीकापुर नगरपालिकाका नगर उपप्रमुख खडकबहादुर शाहले चालु आर्थिक वर्षमा पनि शिविरमा बजेट खर्च गर्न सकिने अवस्था नरहेको बताउनुभयो । उहाँले नगरपालिकाको १२औँ अर्थात् हिउँदे नगरसभामा सरोकारवालाहरूसँग आवश्यक छलफल गरेर क्याम्पसको जग्गामा बसेका नागरिकको सहजताका लागि काम गर्ने आश्वासन दिनुभयो । ‘हामी चाहन्छौँ, शिविरका नागरिकले पनि विकासको अनुभूति गर्न सकून्, सरकार भएको महसुस गर्न सकून्,’ नगर उपप्रमुख शाह भन्नुहुन्छ, ‘नगरपालिकाबाट हुने सीपमूलक तालिम तथा अन्य कुराहरूमा हामीले समन्वय गर्दै आएका छौँ तर भौतिक विकासका लागि केही अप्ठ्यारा पाटालाई समाधान गरेर अगाडि बढ्ने योजना बनाएका छौँ ।’ क्याम्पसको नाममा भएको जग्गामा सुकुम्बासीलाई व्यवस्थित गर्नसमेत चुनौती छ ।