कालीकोटको रास्कोट–४ बालबिवाह मुक्त वडा घोषणा

कालीकोट । कालीकोटको रास्कोट नगरपालिका–४ लाई नगरकै पहिलो बालबिवाह मुक्त वडा घोषणा गरिएको छ । बिहीबार एक कार्यक्रमकाबीच १७ बुँदे घोषणापत्र जारी गर्दै वडालाई बालबिवाह मुक्त घोषणा गरिएको हो ।

रास्कोट नगरपालिकाका नगरप्रमुख धर्मराज शाहीको प्रमुख आतिथ्यता, नगरपालिकाका उप–प्रमुख मनिराज बरालको बिशेष आतिथ्यता र वडा नम्बर–४ का वडा अध्यक्ष दिनेश संज्यालको सभा अध्यक्षतामा वडा नम्बर–४ लाई नगरकै पहिलाे बालबिवाह मुक्त वडा घोषणा गरिएको हो ।

लामो समयदेखि कालीकोटको रास्कोट नगरपालिका, सान्नीत्रिवेणी गाउँपालिका र नरहरीनाथ गाउँपालिकामा परियोजनामार्फत समाज रुपान्तरण निमित्त काम गर्दै आइरहेका स्थानीय गैरसरकारी संस्था सामाजिक जागरण तथा विकास प्रतिष्ठान सादा नेपाल र मानअधिकार तथा बातावरण विकास केन्द्र हुरेन्डेक नेपालले परियोजना अन्तर्गत रास्कोट नगरपालिका–४ लाई बालविवाह मुक्त वडा घोषणा गरिएको बताइएको छ ।

बालबबिवाह मुक्त वडा घोषण कार्यक्रममा बोल्दै रास्कोट नगरपालिकाका नगर प्रमुख धर्मराज शाही पोषणले रास्कोटको आमूल परिवर्तनमा विशेष भूमीका खेल्ने सामाजिक संघसंस्थाहरुलाई धन्यवाद दिदैँ सामाजिक संस्कार र सामाजिक परम्पराको अन्त्य गर्दै बालविवाह रोकथाम, बालश्रम न्यूनीकरण, लैंगिक हिंसा तथा छुवाछूत मुक्त समाज निर्माणमा रास्कोट सरकार निरन्तर लागिपर्ने प्रतिबद्धता जनाउनुभयो ।

'रास्कोटले पहिलो बालबिवाह मुक्त वडा घोषणाको सुरुवात गरेको छ' उहाँले भन्नुभयो । 'अब हाम्रो समाजमा बालबालिका अनिवार्य विद्यालयमा जाने बातावरणको कसरी सिर्जना गर्न सकिन्छ भनेर नगरले नमुना विद्यालय कार्यक्रम सञ्चालन गर्ने प्रयास गरेको छ ।'

कार्यक्रमका विशेष अतिथि नगर उप–प्रमुख मनिराज बरालले हाम्रा सबै बालबालिका विद्यालयको गुणस्तरीय शिक्षामा केन्द्रित गर्न सकेमा हाम्रो रास्कोटमा धेरै बालविवाह घट्ने निश्चित रहेको बताउनुभयो । बालबालिकाको क्षेत्रमा रास्कोट नगरपालिकाले आगामी दिनमा लगानी बढाएर लैजाने बताउदै वजेट विनियोजन समेत गरिने बताउनु भएको हो ।
बालबिवाह मुक्त वडा घोषणा कार्यक्रमका सभाध्यक्ष तथा वडा नम्बर–४ का वडा अध्यक्ष दिनेश संज्यालले यसअघि आफ्नो वडालाई बिहे गर्न वडाको सिफारिस अनिवार्य गरेको बताउँदै सामाजिक संघसंस्थाका कारण नगरकै पहिलो बालबविाह मुक्त वडा घोषणा गर्न सफल भएको बताउनुभयो ।

उहाँले बाल गुनासो संयन्त्र कार्यविधि २०८०, बाल संरक्षण प्रबन्धन तथा कार्यविधि २०७८, आपतकालीन बाल उद्दार कोष २०७७, बालबिवाह न्यूनीकरण सम्बन्धी ३ वर्षीय रणनिती कार्ययोजना २०७८, का सबै चरण र प्रक्रिया पुरा गरेपछि मात्रै वडालाई बालबिवाह मुक्त घोषणा गरिएको जानकारी दिनुभयो ।

रास्कोटलै नमुना पालिका बनाउने अभियान अन्तर्गत नमुनाको एउटा सूचक बालबिवाह मुक्त पालिका हुनुपर्ने भएकाले वडापछि नगरपालिकालाई घोषणा गर्ने अभियानमा रहेको उल्लेख गर्नुभयो ।

कार्यक्रममा प्रमुख प्रशासकीय अधिकृत जवानसिंह बमले २० वर्ष पुगेपछि मात्र बिवाह गरिदिने कुरामा समाजमा सबैको दायित्व हुनु पर्नेमा जोड दिनुभयो । उहाँले बालबिवाहलाई पूर्णरुपमा निरुत्साहित गर्न सरोकारवाला निकाय सक्रियरुपमा लाग्नु पर्ने समेत बताउनुभयो ।

कार्यक्रममा शुभकामना मन्तव्य दिँदै नेपाल पत्रकार महासंघ कालीकोटका उपाध्यक्ष नमराज योगीले शिक्षा कमीको कारण बालबिवाह हुने गरेको र केही सामाजिक रितिरिवाज पनि बालबिवाहको प्रमुख कारण रहेको बताउँदै सामाजिक बिकास र जनचेतनासंगै बालबिवाह मुक्त वडा घोषणा गर्न सफल रहेकोमा धन्यवाद दिनुभयो ।

प्लान इन्टरनेश्न नेपाल, सादा नेपाल र हुरेन्डेक नेपालका कारण आज रास्कोट नगरपालिकाले वडा नं. ४ लाई बालबिवाह मुक्त वडा घोषणा गर्न सफल भएको दावी गर्नुभयो ।

बालबिवाह मुक्त वडा घोषणा कार्यक्रममा बालबालिका, महिला, विद्यार्थी, राजनीतिक दल, सुरक्षाकर्मी, नागरिक समाज, स्थानीय बासि, बालक्लब, सरकारी तथा गैरसरकारी संस्थाका कर्मचारीहरुको उल्लेख्य उपस्थित रहेको थियो ।

प्लान इन्टरनेश्नल नेपालको आर्थिक सहयोग, सादा–नेपाल, हुरेन्डेक नेपालको सहजिकरण, रास्कोट नगरपालिकाको समन्वय र वडा नम्बर–४ को आयोजनामा कार्यक्रम भएको थियो ।

वडाले बालबविाह मुक्त घोषणा गर्नमा विशेष सहयोग पुर्याउने सामाजिक संघसंस्थाहरुलाई कदर पत्रसहित सम्मान समेत गरेको छ ।