म आफूलाई सांगीतिक मजदुर भन्न रुचाउँछु : बाबुल गिरी, गायक/संगीतकार

नेपाली गीत संगीतको क्षेत्रमा आफ्नै राजमार्ग बनाएर कुदिरहेको नाम हो बाबुल गिरी । गायक, संगीतकार र गीतकारका रूपमा उहाँले आफूलाई श्रोता/दर्शकमाझ प्रस्तुत गर्दै आइरहनुभएको छ । यो क्षेत्रमा आफूलाई ‘भर्सटायल’का रूपमा प्रस्तुत गर्दै आइरहनुभएका गिरी गायन, संगीत र लेखनसँगै एरेञ्ज रेकर्डिङ र मिक्सिङमा पनि अब्बल मानिनुहुन्छ । नेपाली गीत संगीत क्षेत्रमा विगत एक दशकदेखि अनवरतरूपमा आफूलाई प्रस्तुत गर्दै आउनुभएका उहाँका तीन सयको हाराहारीमा सिर्जना श्रोता/दर्शकमाझ आएका छन् । ‘दिन दिनै आउँछु, म त आमाको पाउ ढोगेर आएँ, सपनाको भारी, अटल बाचा गरेँ, अङ्स मलाई देऊ, बस्यो माया, यो हो नि तरिका, मन त सधैँ लक्का जवान, ड्याम ड्याम, सिरूपाते जुंगा, मनको बाघले, उनभित्र गुण फुल्ने, वा वा वा, मयालाई चिनो, नारीलाई त सुहाउँछ नि सारीमा, अमेरिकासम्म’ लगायतका थुप्रै गीत उहाँका श्रोता/दर्शकको रोजाइमा रहेका गीत छन् । गीत संगीतका विविध विधामा आफूलाई प्रस्तुत गर्दै आइरहनुभएका गिरी सबैको जीवनमा गीत संगीत जोडिएको बताउनुहुन्छ । आफूलाई सांगीतिक मजदुर भन्न रुचाउने बाबुल गिरीसँग हिमालय टाइम्सका लागि गीता अधिकारीले गर्नुभएको संवादको संक्षिप्त अंशः-

नेपाली संगीतिक क्षेत्रमा संगीतकार, गायक र गीतकारका रूपमा यहाँको परिचय स्थापित छ । मूलतः यहाँ आफूलाई के भन्न चाहनुहुन्छ ?
यहाँले भने जस्तै माथिका सबै विधामा आफूलाई संलग्न गराउँदै आएको छु । तर, म आफूलाई सांगीतिक मजदुर भन्न चाहन्छु ।

औपचारिकरूपमा कहिलेदेखि हुनुहुन्छ यो क्षेत्रमा ?
सानैदेखि यो क्षेत्रमा भए पनि यहाँले भने जस्तै औपचारिकरूपमा विसं. २०७२ पुस १० गतेदेखि लागेको छु ।

हालसम्म यहाँका कति जति सिर्जना श्रोता/दर्शकमाझ आएका छन् ?
यस्तै तीन सयका हाराहारीमा श्रोता/दर्शकमाझ आए होलान् ।

केही गीतको नाम लिनुपर्दा ?
धेरै गीत छन् । प्रायः सबै गीतलाई श्रोता/दर्शकले मन पराइदिनुभएको छ । यसमा उहाँहरूप्रति आभारी छु । यहाँले भने जस्तै केहीको नाम लिनुपर्दा ‘दिन दिनै आउँछु, म त आमाको पाउ ढोगेर आएँ, सपनाको भारी, अटल बाचा गरेँ, अंश मलाई देऊ, बस्यो माया, यो हो नि तरिका, मन त सधैँ लक्का जवान, ड्याम ड्याम, सिरूपाते जुंगा, मनको बाघले, उनभित्र गुण फुल्ने, वा वा वा, मयालाई चिनो, नारीलाई त सुहाउँछ नि सारीमा, अमेरिका सम्म’ लगायतका छन् ।

यहाँका यति धेरै गीत छन्, श्रोता/दर्शकले पनि त्यत्तिकै मन पराएको पाइन्छ, यहाँले आफूलाई चाहिँ कुन गीतले चिनायो भन्ने लाग्छ ?
मलाई के लाग्छ भने सबै सिर्जनाले धेरथोर चिनाएका नै हुन्छन् । अत्यधिक चाहिँ ‘सिरूपाते’ले हो कि ।

नयाँ के आउँदैछ ?
यही शुक्रबार (हिजो) अभिनेत्री प्रियंका कार्की र बेनिषा हमाल अभिनित नयाँ म्युजिक भिडियो ‘तैँ का ठमक’ सार्वजनिक भएको छ । पश्चिमेली शैलीको गीतको भिडियोमा प्रियंका र बेनिषालाई अभिनयमा पुरुष मोडलको रुपमा गोविन्द भट्ट र मैले साथ दिएका छौ । गोविन्दकै शब्द रचना रहेको गीतमा मेरो संगीत छ । गीतमा मेरोसँगै र इब्सल सन्ज्यालको स्वर छ । यस गीतको एरेञ्ज धनबहादुर गिरीले गर्नुभएको हो । गरिमा फिल्मस्ले निर्माण गरेको भिडियो माइकल चन्दले निर्देशन गर्नुभएको छ । उत्सव दाहालको छायांकन रहेको भिडियोमा शिलन लम्सालको सम्पादन छ ।

तपाईं आफूलाई सफल गायक मान्नुहुन्छ कि संगीतकार ?
म सिक्दै छु, सिक्ने क्रममा छु । श्रोता/दर्शकले मन पराइदिनुभएको छ आभारी छु ।

बाबुल गिरी को हो ?
एउटा किसानको छोरो, अहिले सांगीतिक मजदुर ।

जीवन र गीत संगीतलाई कसरी परिभाषित गर्नुहुन्छ ?
सबैको जीवनमा गीत संगीत जोडिएकै हुन्छ । मलाई लाग्छ सुख दुःखको साथी हो गीत संगीत ।

तपाईं कसका लागि गीत-संगीत सिर्जना गर्नुहुन्छ ?
पहिले आफ्नै आत्मसन्तुष्टिका लागि । त्यसपछि मन पराइदिनुभयो भने दर्शक श्रोताका लागि ।

संगीतमा बेला-बेलामा चोरीको आरोप लाग्ने गर्छ नि ?
त्यस्तो भएको सुनिन्छ, पाइन्छ । जानी-जानी यस्तो गर्नु राम्रो होइन । केही मिल्न जानु संयोग हुनसक्छ । प्रभावित हुन सकिन्छ । तर, हुबहु चोरी गर्नु भनेको राम्रो होइन ।

यहाँको सिर्जनाको आधार के हो ?
ठ्याक्क यही आधार भन्ने छैन । मनमा आउने भावलाई सिर्जनामा उतार्छु ।

अहिलेको नेपाली गीत संगीतको अवस्था कस्तो पाउनुहुन्छ ?
सबैले राम्रो गर्ने प्रयास गरिरहनुभएको छ । राम्रो गरिरहनुभएको छ । राम्रै लाग्छ ।

राम्रो गीत, राम्री युवती र मदिरामा कुन रोज्नुहुन्छ ?
मदिरा त अहिलेसम्म मुखमै परेको छैन, केटीले आँखै लगाउँदैनन् हा हा हा ...। गीत संगीत नमरेसम्म छोड्दिनँ ।

बजारमा राम्रा गीत संगीतभन्दा ‘झुर’ले बजार तताइरहेको देख्दा कत्तिको झोंक चल्छ ?
मलाई लाग्छ सिर्जना सबै राम्रा हुन्छन् । तपाईंलाई मन पर्ने चिज मलाई मन नपर्न सक्छ । कसैलाइ झुर लागेको गीत कसैलाई राम्रो लाग्छ । फेरि पनि हामीले के बुझ्नु जरुरी छ भने राम्रा सिर्जना नै दीर्घकालीन हुन्छन् ।

हिजो र आजका गीत संगीतमा कत्तिको फरक पाउनुहुन्छ ?
हिजोका गीत संगीत विल्कुल विशुद्ध हुन्थे भने अब सिर्जना गर्दा हिजैका गीत संगीतसँग धेरथोर मिल्न जान्छन् । आजको सिर्जनालाई नयाँ उचाइमा लैजानु वर्तमान पुस्ताको जिम्मेवारी हो ।

यो क्षेत्रमा आउन चाहने नवप्रवेशीलाई के भन्न चाहनुहुन्छ ?
म जस्तो आलोकाँचो भएर नआउनुहोला, अरूको मुख ताकेर नबस्नुहोला, मिहिनेत गरेर आउनुहोला ।