काठमाडौं । मनसुनी प्रणाली देशभर फैलिएको छ । १५ दिनअघि पूर्वी नेपालबाट भित्रिएको मनसुनी प्रणाली देशभर फैलिएको हो । मनसुन फैलिएसँगै देशका पश्चिमी भागमा समेत वर्षा हुन थालेको छ । जल तथा मौसम विज्ञान विभागको मौसम पूर्वानुमान महाशाखाका अनुसार पश्चिमी वायु कमजोर बनेपछि मनसुन देशभर फैलिएको हो । महाशाखाका मौसमविद् शान्ति कँडेलका अनुसार मनसुन देशभर फैलिए पनि तत्काल झरी परिहाल्ने सम्भावना भने छैन । लामो समयपछि वर्षा भएसँगै गर्मीबाट केही राहत मिलेको छ ।
मौसमविद् कँडेलले भन्नुभयो, ‘मनसुनी वायुले देशभर कभर गरेको छ, तर झरी परिहाल्ने गरी जलवाष्पयुक्त हावा छैन । अहिले मनसुन पूर्ण सक्रिय भइसकेको छैन, सुरुवाती चरणमा छ ।’ तर, अब वर्षाका गतिविधि भने क्रमशः बढ्दै जाने उहाँले बताउनुभयो । मनसुन सुरु भएको दुई साता बितिसके पनि एकाध स्थानबाहेक अन्यत्र उल्लेख्य पानी पर्न सकेको छैन ।
महाशाखाका अनुसार २८ जेठदेखि पूर्वी नेपालमा केन्द्रित रहेको मनसुनी प्रणाली सोमबारदेखि देशभर फैलिएको हो । अब विस्तारै पश्चिम नेपालमा पानी पर्दै जाने महाशाखाले जनाएको छ । नेपालमा यस वर्षको मनसुन औसत मितिभन्दा तीन दिन छिटो नेपाल प्रवेश गरेको थियो । मनसुन भित्रिएको एक साताभन्दा लामो समयसम्म देशको पूर्वी क्षेत्रमा मात्रै सक्रिय रहेको थियो । असार ६ मा मात्रै मनसुनी प्रणाली कोशी, मधेश, बागमती र गण्डकी प्रदेशका अधिकांश भूभागमा र लुम्बिनी प्रदेशको पूर्वी भूभागमा सक्रिय भएको थियो । यद्यपि, कर्णाली र सुदूरपश्चिम प्रदेश तथा लुम्बिनीको पश्चिमी क्षेत्रमा मनसुनी वायु पुगेको थिएन । सोमबारदेखि भने सबै क्षेत्रमा मनसुनी वायु पुगेको हो ।
नेपालमा मनसुनी वायु पूर्वी क्षेत्र हुँदै प्रवेश गरी पश्चिमी क्षेत्रतिर फैलिन्छ । मनसुनी वायुले पश्चिमी वायुलाई धकेल्दै लग्दा क्रमशः मनसुन प्रभावशाली भएर पानी पर्छ । महाशाखाले यस वर्षको मनसुनमा सरदरभन्दा बढी पानी पर्ने सम्भावना रहेको जनाएको छ । खासगरी, जुलाई र अगष्टमा बढी पानी पर्ने सम्भावना छ । गत वर्ष मनसुन भित्रिएको २२ दिनमा देशभर फैलिएको थियो । लगातार वर्षा नभए पनि मौसम बदली भइराख्ने महाशाखाले जनाएको छ । भारी वर्षाका कारण बाढी, पहिरो र डुबानकोे जोखिम हुनसक्ने भन्दै आवश्यक सतर्कता अपनाउन महाशाखाले अनुरोध गरेको छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच