भोजराज रोस्यारा/हिटा
धनगढी । क्रिकेटका दीपेन्द्रसिंह ऐरी र कबड्डीकी जयन्ती बडू उत्कृष्ट वर्ष खेलाडी घोषित हुनुभएको छ । खेलकुद पत्रकार मञ्च कैलालीले आयोजना गरेको ‘एसपिए सुदूरपश्चिम स्पोर्ट्स अवार्ड २०८०’ अवार्डको पुरुषतर्फ दीपेन्द्र र महिलातर्फ जयन्ती वर्ष खेलाडी चुनिनुभएको हो ।
क्रिकेटका ऐरीसँगै भलिबलका टेकराज अवस्थी र भारोत्तोलनका सागर भण्डारी वर्ष पुरुष खेलाडीको मनोनयनमा पर्नुभएको थियो । कबड्डीकी बडूसँगै वर्ष खेलाडी महिलाको मनोनयनमा क्रिकेटकी कविता जोशी र भलिबलकी निरुता ठगुन्ना पर्नुभएको थियो । यो विधाका उत्कृष्ट खेलाडी पुरुष र महिलाले ३५/३५ हजार प्राप्त गरेका छन् ।
कबड्डीका विष्णुदत्त भट्ट वर्ष प्रशिक्षक हुनुभएको छ । वर्ष प्रशिक्षक विधामा भारोत्तोलनका जीवन गौतम र एथलेटिक्सका रामचन्द्र जोशी मनोनयनमा पर्नुभएको थियो । यो विधाका उत्कृष्ट भएका प्रशिक्षकले ३० हजार प्राप्त गर्नुभयो । वर्ष युवा खेलाडी भारोत्तोलनका हेमन्त पाल हुनुभयो । यो विधामा फुटबलका कुशल देउवा र क्रिकेटका आकाश चन्द मनोनयनमा पर्नुभएको थियो । यो विधाका विजेताले २५ हजार प्राप्त गरे ।
सुदूरपश्चिम आइकन पुरुष विधामा क्रिकेटका नरेन भट्ट विजेता हुनुभएको छ । यो विधामा एथलेटिक्सका आशिष महर र शारीरिक सुगठनका रञ्जित लामा मनोनयनमा पर्नुभएको थियो । सुदूरपश्चिम आइकन महिला विधामा एथलेटिक्सकी देवकी धामी विजेता हुनुभएको छ । यो विधामा क्रिकेटकी मनिषा बोहोरा र फुटबलकी विर्सना चौधरी मनोनयनमा पर्नुभएको थियो । सुदूरपश्चिम आइकन पुरुष र महिला विधाका विजेताले २०/२० हजार प्राप्त गरेका छन् ।
लाइफटाइम एचिभमेन्ट अवार्ड तेक्वान्दो प्रशिक्षक गोविन्द विष्टले पाउनुभएको छ । उहाँले नगद २५ हजार प्राप्त गर्नुभयोे । स्पेसल अवार्ड पौडीका अथर्व सिंह र कराँतेका प्रदीप वैजाली मगरले संयुक्त रूपमा पाउनुभयो । उहाँहरूले जनही साढे १२/१२ हजार प्राप्त गर्नुभयो ।
विजयी खेलाडीहरूलाई कार्यक्रमका प्रमुख अतिथि सुदूरपश्चिम प्रदेश सरकारको सामाजिक विकासमन्त्री ओमविक्रम भाट, विशिष्ट अतिथिद्वय सुदूरपश्चिम प्रदेश खेलकुद परिषद्का सदस्य-सचिव दीपकबहादुर सिंह र सुदूरपश्चिमाञ्चल एकेडेमीका प्रबन्ध निर्देशक सुवास शाहीलगायतले पुरस्कार वितरण गर्नुभयो । पाँचौँ संस्करणको ‘एसपिए सुदूरपश्चिम स्पोर्ट्स अवार्ड २०८०’ मार्फत् वर्ष २०८० मा उच्च प्रदर्शन गरेका राष्ट्रिय तथा अन्तर्राष्ट्रिय क्षेत्रमा सफल खेलाडी र प्रशिक्षक गरी विभिन्न आठ विधामा अवार्ड प्रदान गरिएको हो । अवार्डको मुख्य प्रायोजकमा धनगढीको सुदूरपश्चिमाञ्चल एकेडेमी रहेको थियो । प्रायोजकमा नवजीवन को-अपरेटिभ्स लिमिटेड, ठाकुर एग्रो इण्डष्ट्रिज, गरिमा पोलिक्लिनिक एण्ड गरिमा डेण्टल, न्यु सिटी पोलिक्लिनिक र सिराज इन्टरनेसनल रहेका थिए ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच