मितेरी सहकारी : एक महिना अगाडि धनराज गुरुङले आफैँ पुगेर ऋणको पैसा तिरेकाे अध्यक्ष कुम्भराजकाे दाबी

हिमालय टाइम्स

२८ भाद्र २०८१, शुक्रबार १७:३७

Read Time = 3 mins

डिजिटल संस्करण

समाचार

A A- A+

काठमाडौं । सहकारी ठगी प्रकरण छानबिन गर्न गठन गरिएको संसदीय छानबिन विशेष समितिले कांग्रेसका उपसभापति धनराज गुरुङ मुछिएको मितेरी सहकारीको स्थलगत निरीक्षण गरको छ ।

समितिका सभापति सूर्य थापासहित सबै सदस्यले सहकारीको स्थलगत निरीक्षण गरेर जानकारी लिनुभएको छ । त्यसक्रममा समितिले सहकारीका अध्यक्ष कुम्भराज गुरुङसँग धनराज दम्पती जोडिएको १५ करोड बचत हिनामिनाबारे सोधपुछ गरेको थियो ।

श्रीमतीसँग डिभोर्स भएको भनिए पनि श्रीमतीको नाममा रहेको ऋण धनराज गुरुङ आफैले पटक–पटक आएर तिरेको सहकारीका अध्यक्ष गुरूङले समितिलाई बताउनुभएको थियो । एक महिनाअघि मात्रै आएर धनराजले ऋणको पैसा तिरेको बताउँदै कुम्भराजले कागजीरूपमा मात्र डिभोर्स भएको बताउनुभएको छ ।

यसअघि समितमै बोलाएर पनि कुम्भराजको बयान लिइएको थियो । त्यसक्रममा उहाँले तत्कालीन महाप्रबन्धक ज्योति गुरुङले गरेको रकम हिनामिना र त्यसपछि धनराज आफैँ सञ्चालक समिति बैठकमा बसेर रकम फिर्ता गर्ने सम्झौता गरेको समितिलाई जानकारी गराउनुभएको थियो ।

धनराज गुरुङले भने २०७६ सालमै ज्योतिसँग सम्बन्धविच्छेद भइसकेको र पूर्व श्रीमती ज्योतिले गरेको सहकारी बचत हिनामिनासँग आफ्नो सम्बन्ध नरहेको बताउँदै आउनुभएको छ । आफू सहकारीको साधारण सदस्य रहेको र साधारण सदस्यकै रुपमा आफूले ऋण लिएको उहाँको दाबी छ । बाँकी रकम ज्योतिसँगको बारेमा आफूलाई थाहा नभएको उहाँले बताउँदै आउनु भएको छ ।

आफ्नो प्रतिवेदन बुझाउने अन्तिम तयारीमा रहेको समितिले बिहीबार कार्यविधिबमोजिम निर्णय गरी ३ वटा सरकारी निकाय र १३ वटा सहकारी संस्थाहरूको स्थलगत निरीक्षण गरेको सभापति थापाले जानकारी दिनुभएको छ ।

सरोकार

यो खबर पढेर तपाईलाई कस्तो महसुस भयो ?