डा. बाबुराम भट्टराईलाई दबावमा राख्न जसपाकाे वीरगञ्जमा बैठक, भट्टराई उपस्थित हुने सम्भावना कति?

हिमालय टाइम्स

Saturday July 2, 2022

Read Time = 4 mins

राजनीति

A A- A+

काठमाडौं । जनता समाजवादी पार्टी (जसपा) नेपालको केन्द्रीय कार्य समितिको बैठक वीरगञ्जममा बस्ने भएपछि अध्यक्ष उपेन्द्र यादवसँग असन्तुष्ट रहेका संघीय परिषद्का अध्यक्ष डा. बाबुराम भट्टराई माथि थप दबाब बढेको छ ।

तीन सदस्य हेडक्वाटर’को सहमतिविना नै स्थानीय तह निर्वाचनमा टिकट वितरण गरेको, मन्त्रीमण्डल हेरफेरको अधिकार एकलौटी रुपमा लिएको लगायत विषयमा असन्तुष्ट रहदै आउनुभएका भट्टराईमाथि भौगोलिक रुपमा आफ्नो पकड क्षेत्र वीरगञ्जमा बैठक बोलाएर यादवले उहाँमाथि दबाब बढाउनु भएको हो ।

‘तीन सदस्यीय हेडक्वाटर’ अर्थात यादव, भट्टराई र अशोक राईको सहमतिमा मात्रै कुनै पनि महत्वपूर्ण निर्णय लिनु पर्ने यसअघि बसेको केन्द्रीय कार्यकारिणी समितिको बैठकअनुसार कार्य नगरेको भन्दै असन्तुष्ट रहनुभएका भट्टराईलाई थप दबावमा राख्न सो स्थान रोजिएको यादव निकट एक नेताले बताए ।

‘भौगौलिक रुपमा आफ्नो पक्कड क्षेत्र वीरगञ्जमा बैठक आह्वान गरेर सुरुमा नै भट्टराई पक्षधरलाई मनोवैज्ञानिक रुपमा कमजोर पार्ने र त्यस बैठकमा भट्टराई अनुपस्थित भए एकलौटी निर्णय लिएर अघि बढ्ने उदेश्यका साथ बैठक बोलाएको देखिन्छ,’ एक कार्यकारिणी सदस्यले भने, ‘सकेसम्म त विरगञ्ज बैठकमा भट्टराई नआउन् र भट्टराई नआएको बैठकबाट आफू अनुकुलको निर्णय गराउन सकियोस् भन्ने अन्तर्यका साथ अध्यक्ष यादव अघि बढेको देखिन्छ ।’

उनका अनुसार बीरगञ्ज बैठकमा भट्टराईको अनुपस्थिति देखाउँदै यादवले मन्त्रीमण्डल हेरफेरलगायत कार्यकारी अधिकार प्रयोग गर्न वैद्यानिक रुपमा बाटो खुल्ला भएको घोषणा गर्ने छन् ।

यसअघि बसेको केन्द्रीय कार्यकारिणी समितिको निर्णयअनुसार कुनै पनि महत्वपूर्ण निर्णय लिँदा तीन सदस्यीय ‘हेड क्वाटर’ अर्थात भट्टराई, यादवसहित अशोक राईको सहमतिअनुसार हुने भनिए पनि यसै साता मन्त्रीमण्डल सिफारिस गर्ने सो अधिकार यादवले लिएको सार्वजनिक भएसँगै पार्टी थप आन्तरिक विवादमा फसेको छ ।

उता, केन्द्रीय कार्यालयका सचिव प्रकाश अधिकारीले आगामी २७–२८ असारमा कार्यकारिणी समिति बैठक बीरगञ्जमा आह्वान गरेको सार्वजनिक गरे पनि बैठकका बारेमा भट्टराईसहित उहाँ निकट नेताले अझै खबर पाएका छैनन् ।

यादव निकट नेता मनिष सुमनले पार्टी कार्यालयबाट बैठकका बारेमा इमेलमार्फत खबर पाएको बताए पनि भट्टराई निकट अर्की नेतृ अमृता अग्रहरीले भने कुनै खबर नपाएको बताउनुभयो । ‘मैले मिडियामार्फत खबर पाएको हुँ, अहिलेसम्म औपचारिक रुपमा बीरगञ्ज बैठकका बारेमा कुनै खबर आएको छैन,’ अग्रहरीले भन्नुभयो, ‘उपेन्द्रजीले आजकाल कसैलाई खबर गर्ने कसैलाई नगर्ने गर्दै आउँनु भएको छ, सायद अहिले हामीलाई पनि खबर नदिएको होला ।’

तर, यादव निकट नेताहरूले भने इमेलमार्फत खबर प्राप्त गरिसकेका छन् । ‘विरगञ्ज बैठकका बारेमा हामीलाई त खबर आएको छ, केहीलाई अझै नपुगेको भन्ने सुनियो, अब बिस्तारै जाला,’ केन्द्रीय कार्यकारिणी समिति सदस्य मनिष सुमनले भन्नुभयो ।

यो खबर पढेर तपाईलाई कस्तो महसुस भयो ?