आर्सनलको विजयी सुरुवात

Sunday August 7, 2022

Read Time = 3 mins

खेलकुद

A A- A+

लन्डन । लन्डन क्लब आर्सनलले इंग्लिस प्रिमियर लिगमा विजयी सुरुवात गरेको छ । शुक्रबार राती भएको सिजनको पहिलो खेलमा आर्सनलले क्रिस्टल प्यालेसलाई २-० गोलअन्तरले पराजित गरेको हो । आर्सनलका लागि ग्याब्रिएल मार्टिनेलीले एक गोल गर्नुभयो भने विपक्षी कप्तान मार्क गुएहिले आत्मघाती गोल गर्नुभयो ।

२०औँ मिनेटमा मार्टिनेलीले गोल गर्दै आर्सनललाई अग्रता दिलाउनुभएको थियो । खेल सकिन ५ मिनेट बाँकी हुँदा बुकायो साकाको क्रस गुएहिले आफ्नै पोस्टतर्फ पठाएपछि पाहुना टोली आर्सनलले २-० को जित हात पार्‍यो । यस जितसँगै आर्सनलले पहिलो खेलमै तीन अंक जोडेको छ । गत सिजन सुरुवातकै तीन खेल गुमाएको आर्सनलले यसपटक भने पहिलो खेलमै जित हासिल गर्‍यो ।

यता जर्मन बुन्डेसलिगामा साबिकको विजेता बायर्न म्युनिखले सानदार सुरुवात गर्नेक्रममा आइनट्राख्ट फ्रान्कफुर्टमाथि ६-१ को सानदार जित हात पार्‍यो । डोइटसा बैंक पार्कमा शनिबार राती भएको खेलमा बायर्नको सानदार जितमा जमल मुसिएलाले दुई तथा योसुवा किम्मिख, बेन्जामिन पाभार्ड, साडियो माने र सर्ज जिनाब्रीले समान एक गोल गर्नुभयो । घरेलु टोलीका रान्डल कोलो मुआनीले एक गोल फर्काउनुभयो ।

खेलको पाँचौँ मिनेटमा किम्मिखले फ्रिकिकमा गोल गर्दै सुरुवाती अग्रता दिलाउनुभयो । ११औँ मिनेटमा पाभार्डले गोल गर्दै बायर्नको अग्रता दोब्बर पार्नुभयो । २९औँ मिनेटमा साडियो मानेले सर्ज जिनाब्रीको पासमा हेडमार्फत् गोल गर्दै बायर्नलाई ३-० ले अघि बढाउनुभयो ।
३५औँ मिनेटमा जमल मुसएलाले थोमस मुलरको पासमा, ४३औँ मिनेटमा मुलरकै पासमा जिनाब्रीले गोल गर्दै बायर्नलाई पहिलो हाफमा ५-० को अग्रता दिलाउनुभयो । ६४औँ मिनेटमा रान्डल कोलोले गोल गर्दै खेललाई ५-१ को स्थितिमा ल्याउनुभयो । ८३औँ मिनेटमा मुसिएलाले लिरोए सानेको पासमा व्यक्तिगत दोस्रो र टोलीका लागि छैटौँ गोल गर्दै बायर्नलाई सानदार जित दिलाउनुभयो । एजेन्सी ।

यो खबर पढेर तपाईलाई कस्तो महसुस भयो ?