पदक विजेता मुक्केबाज सम्मानित

हिमालय टाइम्स
Read Time = 3 mins

काठमाडौं । नेपाल लोकतान्त्रिक खेलकुद संघ, बागमती प्रदेशले एएसबिसी एसियाली यू-२२ बक्सिङ च्याम्पियनसिपका पदक विजेता खेलाडीलाई बिहीबार नगदसहित सम्मान गरेको छ । जनवरी १८ देखि २६ तारिखसम्म थाइल्याण्डको बैंककमा भएको प्रतियोगिताको महिला ४८ केजीमा सुष्मा तामाङले रजत तथा ५७ केजीमा हेमा राई र ७५ केजीमा त्रिशा जबेगुले कांस्य जित्नुभयो । पुरुष ८६ केजीमा विजय बाटाले कांस्य हात पार्नुभयो ।

सुष्माले २० हजार नगद पुरस्कार पाउनुभयो । सुष्माले जितेको रजत पदक नेपाली बक्सिङको इतिहासमा कुनै पनि नेपाली खेलाडीले एसियालीस्तरमा जितेको सबैभन्दा ठूलो पदक हो । बाँकी कांस्य विजेताले जनही १० हजार नगद पुरस्कार पाउनुभयो । झापाकी त्रिशा भने कार्यक्रममा उपस्थित हुनुभएन ।

सो प्रतियोगिताका प्रशिक्षकद्वय दीपक महर्जन र सन्दिप श्रेष्ठ समान पाँच–पाँच हजार नगदसहित सम्मानित हुनुभयो भने व्यवस्थापक ओमनारायण श्रेष्ठलाई प्रशंसापत्र प्रदान गरी सम्मान गरिएको थियो । उक्त प्रतियोगितामा सहभागी लालप्रसाद उप्रेती र इन्द्रबहादुर सुनार पनि प्रशंसापत्रबाट सम्मानित हुनुभयो ।

सोही अवसरमा राष्ट्रिय तथा अन्तर्राष्ट्रिय खेलाडी उत्पादनमा योगदान पुर्‍याएबापत प्रशिक्षक राजकृष्ण महर्जन र नवीन तण्डुकार पनि सम्मानित हुनुभयो ।

उहाँहरूलाई युवा तथा खेलकुदमन्त्री डिगबहादुर लिम्बू, बागमती प्रदेशकी सांसद मिना पराजुली, नेपाली कांग्रेसकी केन्द्रीय सदस्य राधा घले, नेपाल लोकतान्त्रिक खेलकुद संघ, बागमती प्रदेशका अध्यक्ष दीपक गुरुङलगायतले एक कार्यक्रमबीच नगद र प्रशंसापत्र प्रदान गरी सम्मान गर्नुभयो ।

सो अवसरमा खेलकुदमन्त्री लिम्बूले खेलकुदलाई माथि उठाउन सक्दो र इमानदार प्रयास गर्ने बताउनुभयो । अध्यक्ष गुरुङले खेलाडीको हौसला अभिवृद्धि गर्न संघले खेलाडीलाई सम्मान गर्दै आएको बताउनुभयो ।

Subscribe
Notify of
guest
0 Comments
Inline Feedbacks
View all comments

रिलेटेड न्युज

छुटाउनुभयो कि ?