धनगढी । कैलालीको धनगढीमा जारी लिटल फ्लावर प्रिमियर लिग (एलपिएल) को आठौँ संस्करणअन्तर्गत बुधबार सम्पन्न दुई खेलमा घोडाघोडी क्रिकेट एकेडेमी र कैलाली जिल्ला क्रिकेट क्लब विजयी भएका छन् । दिनको पहिलो खेलमा घोडाघोडी क्रिकेट एकेडेमीले लिटल फ्लावर स्कुललाई ४१ रनले पराजित गर्यो । घोडाघोडीले दिएको १२८ रनको लक्ष्य पछ्याएको लिटल फ्लावरले १६.५ ओभरमा ८६ रनमा सबै विकेट गुमायो ।
लिटल फ्लावरका लागि मनिष थापाले सर्वाधिक १७ रन बनाउनुभयो । कृष्ण कार्कीले १५ तथा प्रतीक श्रेष्ठ र कौशल रूपाखेतीले समान ११ रन योगदान दिनुभयो । घोडाघोडीका देब्रे हाते स्पिनर अशोक धामी एक्लैले पाँच विकेट लिँदै लिटल फ्लावरको इनिंग्स धरासायी बनाउनुभयो । प्लेयर अफ द म्याच घोषित उहाँले चार ओभरमा १८ रन खर्चिनुभयो । नरेश सुनारले दुई तथा नवयुग बस्नेतले एक-एक विकेट लिनुभयो ।
यसअघि टस जितेर ब्याटिङ गरेको घोडाघोडी क्रिकेट एकेडेमीले १९.५ ओभरमा सबै विकेट गुमाएर १२७ रन बनायो । घोडाघोडीका लागि नरेश सुनारले सर्वाधिक ३४ रन बनाउनुभयो । विपिनविक्रम शाहीले २४ तथा कृष कार्कीले २२ रन बनाउनुभयो ।
लिटल फ्लावर स्कुलका दिनेश अधिकारीले सर्वाधिक चार विकेट लिनुभयो जुन क्रममा ३.५ ओभरमा १७ रन खर्चिनुभयो । कप्तान कृष्ण कार्कीले तीन, कौशल रूपाखेतीले दुई तथा विपिन खत्रीले एक विकेट लिनुभयो ।
दिनको दोस्रो खेलमा कैलाली जिल्ला क्रिकेट क्लबले खप्तड इण्डोर स्पोर्ट्स ट्रेनिङ सेन्टरलाई ३४ रनले पराजित गर्यो । कैलालीले दिएको १४० रनको लक्ष्य पछ्याएको खप्तडले १७.४ ओभरमा १०५ रन बनाउँदा सबै विकेट गुमायो ।
खप्तडका लागि प्रकाश पाण्डेले सर्वाधिक २६, अभिषेक थापाले २० तथा अरुण रानाले १२ रन बनाउनुभयो । कैलालीका बलर नरेन साउदले चार विकेट लिनुभयो जुन क्रममा तीन ओभरमा १५ रन खर्चिनुभयो । दीपक टमाटाले दुई विकेट लिँदा शेर मल्ल, दीपक रोकाया, डबल ऐर र राहुल केसीले समान एक विकेट लिनुभयो ।
यसअघि टस जितेर ब्याटिङ गरेको कैलाली जिल्ला क्रिकेट क्लबले २० ओभरमा सात विकेट गुमाएर १३९ रन बनायो । कैलालीका लागि ओपनर डबल ऐरले अर्धशतकीय योगदान दिने क्रममा ओपनिङ ब्याटिङ गर्दै अविजित ५४ रन बनाउनुभयो । प्लेयर अफ द म्याचसमेत घोषित ऐरले ५२ बलमा चार चौका र दुई छक्का प्रहार गर्नुभयो । सुदांशु रावलले १९ रन बनाउँदा हृदय बिडारी, दिपक टमाटा र नरेन साउदले समान १० रन बनाउनुभयो ।
खप्तडको बलिङमा अरुण रानाले तीन तथा रवि विष्ट र नगेन्द्र उपाध्यायले समान दुई विकेट लिनुभयो । प्रतियोगिताअन्तर्गत आज (बिहीबार) दुई खेल हुनेछन् । पहिलो खेल बिहान ९ बजे युथ अफ टिकापुर र शारदा सेकेण्डरी स्कुलबीच तथा दोस्रो खेल दिउँसो १ बजे सत्यवती एकेडेमी र जेएस स्पोर्ट्स ११ सुपर स्टार्सबीच हुनेछ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच