काठमाडौं । नेपाल भलिबल संघले सन् २०२४ मा दुईवटा अन्तर्राष्ट्रिय प्रतियोगिता आयोजना गर्ने निर्णय गरेको छ । संघका अध्यक्ष जितेन्द्रबहादुर चन्दको अध्यक्षतामा पोखरामा बसेको संघको सातौँ पूर्ण बैठकले अन्तर्राष्ट्रिय, राष्ट्रिय प्रतियोगितासहित विभिन्न कार्यक्रम आयोजना गर्ने निर्णय गरेको छ ।
संघले २०२४ अगस्टमा काभा महिला नेसन्स लिग र नोभेम्बरमा काभा पुरुष क्लब च्याम्पियनसिप आयोजना गर्ने भएको हो । त्यसबाहेक बैठकले यसै वर्षको चैत १ देखि १० गतेसम्म आठौँ एनभिए महिला तथा पुरुष भलिबल च्याम्पियनसिप आयोजना गर्ने निर्णय गरेको छ । त्यस्तै, संघले चैतको अन्तिममा एनभिए अवार्ड समारोह आयोजना गर्ने भएको छ ।
अवार्डमा २०७९ सालभर देश र विदेशमा भएका प्रतियोगिताको अध्ययन, नतिजा, संघसँग समन्वयमा गरेको प्रतियोगिताको मूल्यांकन गरी खेलाडी, प्रशिक्षक, संस्थाहरूलाई सम्मान गरिने बताइएको छ ।
माघ ७ गते भलिबल रेफ्रीहरूको राष्ट्रिय सम्मेलन आयोजना गर्ने र रेफ्री कमिसनलाई पूर्णता दिने पनि संघले निर्णय गरेको छ । चैतमा नै संघको आठौँ पूर्ण बैठक मधेश प्रदेशको जनकपुरमा गर्ने संघले निर्णय लिएको छ । बैठकले महासचिव रोशन श्रेष्ठ र कोषाध्यक्ष श्याम श्रेष्ठको प्रतिवेदनलाई छलफलसहित पारित गरेको थियो ।
संघले राष्ट्रिय भलिबल टोलीका पूर्वकप्तान भरतबहादुर शाहसहित तीनजनालाई संघको उपाध्यक्षमा मनोनयन गरेको छ । सातौँ पूर्ण बैठकले शाहसहित युवराज श्रेष्ठ, श्रीराम बोगटीलाई उपाध्यक्षमा मनोनयन गरेको हो ।
त्यस्तै, ६ जनालाई सदस्यमा मनोनयन गरेको छ । जसमा किशोर आचार्य, श्यामबहादुर थापा, शैलेन्द्र शर्मा, डम्बरबहादुर लिम्बू, रामशंकर चौधरी र निलम बज्राचार्य हुनुहुन्छ । गत वर्ष संघको नयाँ कार्यसमिति चयन भएको थियो । सोही बैठकले पूर्वकप्तान रेशमबहादुर गुरुङलाई सल्लाहकार मनोनीत गरेको छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच