‘समुदायमा कांग्रेस’ अभियान

काठमाडौं । नेपाली कांग्रेसको ‘समुदायमा कांग्रेस’ अभियान मंगलबारदेखि औपचारिक रूपमा सुरु भएको छ । शहीद दिवसको अवसर पारेर कांग्रेसले मंगलबारदेखि औपचारिक रूपमा अभियानको सुरुवात गरेको हो । कांग्रेसले देशभरका ६ हजार ७४३ वटै वडामा विशेष कार्यक्रमसहित अभियानको प्रारम्भ गरेको छ । अभियानका लागि जिल्ला र प्रदेशबाट ६ हजार ७४३ वटै वडामा प्रतिनिधि खटिएका छन् । २६ गतेसम्म सञ्चालन हुने अभियानमा नेताहरूले जनताका कुरा सुन्नेछन् । तर, औपचारिक कार्यक्रम भने हुने छैनन् । अभियानका लागि ७७ जिल्लामै केन्द्रीय प्रतिनिधि र सातवटै प्रदेशमा शीर्ष नेताहरू खटाइएको छ । यसअघि, केन्द्रीय समिति बैठकले एक महिनाका लागि अभियान तय गरे पनि राष्ट्रियसभा सदस्य निर्वाचनका कारण अवधि छोट्याइएको छ । मूलतः वडा केन्द्रित हुने अभियानमा औपचारिक आसनग्रहण र मन्तव्यलगायत कार्यक्रम नहुने पार्टी प्रचार विभाग प्रमुख मीनबहादुर विश्वकर्माले जानकारी दिनुभयो ।

अभियानका क्रममा तीनै तहका सरकारसँगका जनताका अपेक्षा, सुझाव र गुनासा संकलन गरिनेछ । जनताबाट आएका राय-सुझाव कार्यान्वयनका लागि पहलकदमी लिने तथा महासमिति बैठकलगायत पार्टीको नीति निर्माणका क्रममा नीतिगत मार्गदर्शनको रूपमा लिने कांग्रेसले जनाएको छ । साथै, सातै प्रदेशमा केन्द्रीय पदाधिकारी, पूर्वपदाधिकारी वा पार्टीका नेताले अभियानको प्रादेशिक समन्वय, अनुगमन र संयोजन गर्नेछन् । समुदायमा कांग्रेस अभियान माघ २६ गते सुशील कोइरालाको स्मृति दिवसको दिन समापन हुनेछ ।

अभियानबारे जानकारी दिँदै पार्टी प्रचार विभाग प्रमुख मीन विश्वकर्माले भन्नुभयो, ‘देशभर एकैसाथ वडास्तरमा विभिन्न समुदायसँग दस दिनसम्म निरन्तर छलफल कार्यक्रम हुन्छन् । तर, यसपटक औपचारिक कार्यक्रम, आसनग्रहण र नेताले भाषण गर्ने कार्यक्रम नगर्न भनिएको छ । यो समुदायसँग अन्र्तसंवाद गर्ने, गुनासाहरू सुन्ने र सुझाव संकलन गर्ने अभियान हो ।’ जिल्लामा प्रतिनिधिका रूपमा नगएका नेताहरू आफ्नो क्रियाशील सदस्यता रहेको वडामा हुने अभियानमा सहभागी भएका छन् ।

अभियानका क्रममा तीनै तहका सरकारसँगका जनताका अपेक्षा, सुझाव र गुनासा संकलन गरिने जानकारी दिँदै प्रचार विभाग प्रमुख विश्वकर्माले भन्नुभयो, ‘यो अभियानमा जनताका अपेक्षा, सुझाव र गुनासा संकलन हुन्छन् । जनताबाट प्राप्त सुझावलाई तत् तत् तहका सरकारमा पु¥याउने, पार्टी सरकारमा रहेका ठाउँमा सरकारको नीति कार्यक्रममा समावेश गरी कार्यान्वयनमा अग्रसरता लिने र प्रतिपक्षमा रहेका ठाउँमा समाधानका लागि पहलकदमी लिने काम गछौँ ।’ अभियानले संविधानको भावनाअनुसार समुदायका बीचको सद्भाव र सम्बन्ध प्रगाढ बनाउने गरी जनसंवाद र छलफल गर्ने कांग्रेसले जनाएको छ ।

अभियानका क्रममा नागरिक समाज, शिक्षक, प्राध्यापक, आमा समूह, युवा क्लब, कृषक समूहदेखि समाजका सबै समूहसँग समेत छलफल गर्न र उनीहरूका कुरा सुन्ने काम हुने बताइएको छ । वडामा सेवा प्रवाहको अवस्था, स्वास्थ्य चौकी, विद्यालय, विकास निर्माणलगायत क्षेत्रमा भइरहेको गतिविधिको अवस्था बुझ्ने र जनताका कुरा सुन्ने कार्यक्रम गर्नुपर्ने केन्द्रीय कार्यालयले जारी गरेको परिपत्रमा उल्लेख छ । अभियानका क्रममा वृक्षारोपण, सम्पदा सरसफाइ, नदीनाला सरसफाइ, शिक्षा शिविर, स्वास्थ्य शिविर, रक्तदान, श्रमदान वा स्वास्थ्यसँग सम्बन्धित कुनै न कुनै कार्यक्रम गरिने बताइएको छ ।

नेताहरू को कहाँ खटिए ?
नेपाली कांग्रेसले समुदायमा कांग्रेस अभियानका लागि शीर्ष नेताहरूलाई नै विभिन्न जिल्लामा खटाएको छ । ७७ वटै जिल्लामा एक÷एकजना प्रतिनिधि खटाएको र त्यससँगै अभियानलाई थप प्रभावकारी बनाउन फरक-फरक जिल्लामा फरक-फरक समुदायका बीचमा पुग्न र संवाद गर्न शीर्ष नेताहरूलाई समेत खटाएको हो । अभियानमा नेताहरूले सम्बन्धित जिल्लामा पुगेर फरक-फरक समुदायसँग संवाद गर्नेछन् । कांग्रेसले कोशी प्रदेशमा शेखर कोइराला, नारायण खड्का र बलबहादुर केसीलाई खटाएको छ । त्यस्तै,मधेश प्रदेश र बागमती प्रदेशका जिल्लामा प्रकाशमान सिंह, महालक्ष्मी उपाध्याय, डा.मीनेन्द्र रिजाल र पुष्पा भुसाल खटिएका छन् । त्यस्तै, गण्डकी प्रदेशमा महेन्द्र यादव र प्रदीप पौडेल, लुम्बिनी प्रदेशमा विमलेन्द्र निधि र डिला संग्रौला, कर्णाली प्रदेशमा डा.शशांक कोइराला र सुदूरपश्चिम प्रदेशमा भीष्मराज आङ्देम्बेलाई खटाइएको छ ।

मुलुक बनाउन कांग्रेसलाई सिंगो देशको साथ चाहिएको छ : महामन्त्री थापा
नेपाली कांग्रेसका महामन्त्री गगन थापाले जात, धर्म र समुदायको नाममा विभाजनको राजनीति गर्नेहरूलाई रोक्न कांग्रेसलाई देशभरबाट जनसमर्थन आवश्यक रहेको बताउनुभएको छ । उहाँले सत्ता र राजनीतिमा सबै नेपालीले समान अवसर पाउने अवस्थाको सुनिश्चितता गर्न पनि कांग्रेसले नेतृत्व गर्ने दाबी गर्नुभयो । मेची–महाकाली संवाद यात्राका क्रममा मधेश प्रदेश पुग्नुभएका महामन्त्री थापालाई स्थानीय नेता कार्यकर्ताले पार्टी र सरकारमा समेत मधेशलाई कोटामा मात्रै सीमित गर्न खोजिएको भन्दै प्रश्न उठाएका थिए । जवाफमा महामन्त्री थापाले कांग्रेसले सिंगो देशको मुहान झल्किने गरी पार्टी निर्माण गरिरहेको र सत्तामा हुँदासमेत त्यसलाई कार्यान्वयन गर्ने प्रयास गरेको दाबी गर्दै भन्नुभयो, ‘राष्ट्रियसभा सदस्य निर्वाचनमा उम्मेदवारको छनोट गर्दै गर्दा मेरो फरक मत यही विषयमा थियो । अहिले आएर मैले राखेको फरक मतको थप महŒव अनुभूति भएको छ । नेपाली कांग्रेसले सिंगो देशको अनुहार झल्किने गरी अवसरको बाँडफाँट गर्न प्रयासरत छु । म पार्टीको महामन्त्री भएर पनि फरक मत राखेर हिँड्नुपर्ने अवस्था छ । वास्तवमा अहिले जात, धर्म र अन्य आधारमा जसरी विभाजनको राजनीति गर्नेहरू देखिएका छन्, त्यस्ता शक्तिहरूलाई रोक्नका लागि पनि अहिले कांग्रेसलाई सिंगो देशको साथ चाहिएको छ । त्यो तागत बनाउनका लागि कांग्रेसलाई सबै नेपाली समुदायको विश्वास आवश्यक छ ।’

प्रधानमन्त्रीले शहीदहरूको अवमूल्यन गर्नुभयो : कोइराला
नेपाली कांग्रेसका नेता डा.शेखर कोइरालाले प्रधानमन्त्री पुष्पकमल दाहाल ‘प्रचण्ड’ले शहीदहरूको अवमूल्यन हुने काम गरेको आरोप लगाउनुभएको छ । मंगलबारबाट सुरु भएको सामुदायमा कांग्रेस अभियानको विराटनगरमा सुरुवात गर्दै नेता कोइरालाले शहीदको अवमूल्यन हुने काम प्रधानमन्त्री प्रचण्डबाट भएको आरोप लगाउँदै भन्नुभयो, ‘प्रधानमन्त्रीजीले तीन हजार थप शहीद थप्ने कुरा गर्नुभयो । शहीद दिवसका दिन हामीले शहीदहरूलाई अवमूल्यन गर्न भएन । त्यो कुरामा ध्यान दिन आवश्यक छ । शहीदको वास्तविक परिभाषालाई अंगीकार गरी अघि बढ्दा शहीदहरूप्रति सच्चा श्रद्धाञ्जलि हुन्छ भन्ने मलाई लाग्छ । शहीदको संख्या थप्दै गर्दा शहीदकै अपमान हुने बुझेको छु ।’ प्रधानमन्त्री प्रचण्डले माघ १३ गते काठमाडौंमा आयोजित एक कार्यक्रममा करिब तीन हजारलाई छिट्टै शहीद घोषणा गर्ने अभिव्यक्ति दिनुभएको थियो । नेता डा.कोइरालाले कांग्रेस समुदायमा पुगेर जनभावना बुझ्न अघि बढेको उल्लेख गर्नुभयो । उहाँले समुदायस्तरमा देखिएका कमी कमजोरीलाई आत्मसात गर्दै सच्चिएर कांग्रेस अघि बढ्नुपर्नेमा जोड दिनुभयो ।