‘महिला स्वतन्त्रता र अधिकारको हकमा कहाँ पुग्यौं’

काठमाडौं । ११४ औं महिला दिवस (मार्च ८) को पूर्वसन्ध्यामा नेपाल पत्रकार महासंघ केन्द्रीय कार्यसमिति महिला समिति तथा न्यूनतम पारिश्रमिक निर्धारण समितिको सहकार्यमा मंगलबार एक कार्यक्रमको आयोजना गरिएको हो । सो आयोजना गरिएको ‘लैंगिकताको सवालमा नेपाली मिडिया विषयक’ अन्तक्र्रिया कार्यक्रममा महिला स्वतन्त्रता र अधिकारको क्रममा कहाँ पुग्यौ :? समीक्षा गर्नुपर्ने धारणा कार्यक्रमका वक्ताहरूले राख्नु भएको छ ।

सञ्चारमाध्यमको अवधारणालाई सामाजीकरण गरेर लग्नुपर्ने नेपाल पत्रकार महासंघका अध्यक्ष विपुल पोख्रेलको भनाइ रहेको छ । समाजलाई सन्तुलित विकासतर्फ लग्न लैंगिकताको सवाललाई अझ पेचिलो ढंगले उठाउनुपर्ने उहाँले बताउनुभयो । नेपाल पत्रकार महासंघले भोगिरहेका समस्याबारे छलफल गरेर निति निर्माणसहितका समाधानका उपाय अवलम्बन गरेर अघि बढ्नुपर्ने उहाँको भनाइ छ ।

तथ्यांकमा समावेशी देखिए पनि क्षमता विकासको अभाव, आर्थिक, भौतिक असुरक्षाले खोजमूलक अनुसन्धानमा महिला पत्रकार न्यून रहेको महासंघ सल्लाहकार तथा अन्तर्किया कार्यक्रम प्रमुख अतिथि निर्मला शर्माले बताउनु भयो । महिलाले प्रतिनिधित्व सँगसँगै नेतृत्व गर्न सक्नुपर्छ न्यूनतम पारिश्रमिक निर्धारण समितिका अध्यक्ष संगीता खड्काले बताउनुभयो । सम्पादकीय स्तरमा महिला पत्रकारको पहुँच न्यून रहेको भन्दै महिलाको क्षमतालाई कम आँकल नगर्न अनुरोध गर्नुभयो ।

वरिष्ठ पत्रकार तथा हिमालय टाइम्सका प्रधान सम्पादक पुरुषोत्तम दाहालले पत्रकारितामा २० प्रतिशत महिला हुनु गौरवको विषय रहेको बताउनुभयो । जमातले देशको हरेक क्षेत्रमा ५० प्रतिशत महिला सहभागिता सुनिश्चित गर्न पहल गर्नुपर्ने उहाँको धारणा छ । पछिल्लो समयमा सञ्चार गृहमा समस्यै समस्या छ । देशमा नीति, उद्योग, उत्पादन छैन । यसप्रति पूर्णतः सरकार जिम्मेवार हुनुपर्छ भन्दै उहाँले यो अवस्थामा महिला र पुरुष भन्दै हिँडेर सार्थक नरहेको बताउनुभयो । उहाँले भन्नु हुन्छ, ‘नेपाली मिडियाको सम्बोधनले हिंसा गरेको देखिन्छ यो परिमार्जन गर्नुपर्छ ।’

थोरै संख्यामा रहेका महिला पत्रकारलाई महिला भएकै कारण मिडिया हाउसमा विभेद, पारिश्रमिकमा विभेद, असुरक्षाको सवाल, आर्थिक समस्याजस्ता विषयमा बहस गर्नैपर्ने अवस्था सिर्जना भएको नवीन सन्देश सम्पादक कल्पना शर्माले बताउनुभयो । कोरोनाको बेला कामबाट विस्थापित महिला पत्रकारहरूको खोजी गरेर वर्तमान महासंघ नेतृत्वले न्याय दिनुपर्ने उहाँले माग गर्नुभयो ।

पछिल्लो समय नेपाली मिडियामा लैंगिकताको सवाल र संवेदनशीलताको विषयप्रति गम्भीर हुँदै नेपाल प्रेस युनियनका उपाध्यक्ष नकुल अर्याल, प्रेस चौतारीका उपाध्यक्ष देवीका मगर गुरुङग, प्रेस सेन्टरका उपाध्यक्ष गंगा बराल, महासचिव सन्तोष पौडेल सञ्चारिका समूहकी अध्यक्ष विमला तुम्खेवा आमसञ्चार प्राधिकरण मधेस प्रदेशका सदस्य प्रतिमा चौधरी क्रियाशील महिला पत्रकार समूहका महासचिव चन्दा विष्ट, नेपाल अमेरिका पत्रकार संघ नेजाका पूर्वअध्यक्ष गौतम दाहाल, लोकतान्त्रिक छापा माध्यमका अध्यक्ष दामोदर दवाडी, एनभिआई न्यूजका हेमन्त अधिकारीलगायतले आ–आफ्नो धारणा राख्नु भएको थियो ।

अन्तक्र्रियामा महासंघकी उपाध्यक्ष एवं महिला समिति संयोजक बाला अधिकारीको अध्यक्षता कार्यक्रम सम्पन्न भएको थियो । उक्त कार्यक्रममा न्यूनतम पारिश्रमिक निर्धारण समितिका बोर्ड सदस्य आस्था केसीले धन्यवाद ज्ञापन गर्नु भएको थियो भने कार्यक्रमको सहजीकरण महासंघ सचिव सिर्जना अर्यालले गर्नु भएको थियो ।