बागमती प्रदेश प्रमुख शर्माद्वारा सिन्धु एकीकृत अर्गानिक फार्म तथा फार्मस्टे अवलोकन

हिमालय टाइम्स

Saturday May 4, 2024

Read Time = 4 mins

डिजिटल संस्करण

प्रदेश समाचार

बागमती प्रदेश

A A- A+

मकवानपुर । बागमती प्रदेशका प्रदेश प्रमुख यादव चन्द्र शर्माले आज शनिबार सिन्धुपाल्चोकको मेलम्ची नगरपालिका वडा नम्बर १,भोटेचौरस्थित सिन्धु एकीकृत अर्गानिक फार्म तथा फार्मस्टे अवलोकन गर्नुभएको छ ।

२५ जना युवाले सिन्धु मल्टिपर्पोट कम्पनी प्रा.लि. मार्फत विगत पाँच वर्षदेखि सञ्चालन गर्दै आएको अर्गानिक फार्म तथा फार्मस्टे अवलोकन गर्दै प्रमुख शर्माले कृषिलाई पर्यटनसँग जोडेर गरिएको कामको प्रशंसा समेत गर्नुभयो । मेहनत गर्ने हो भने आफ्नै देशमा पनि प्रसस्त सम्भावना छ भन्ने उदाहरण बनाउन युवाहरुको समूह लागिपरेकोमा प्रमुख शर्माले खुशी व्यक्त गर्नुभयो । देशमै केही गर्छु भन्ने सोच भएकाहरुका लागि यस खालको कार्य प्रेरणादायी हुने प्रमुख शर्माको भनाइ थियाे ।

करिब सय रोपनी क्षेत्रफलमा सञ्चालित एकीकृत अर्गानिक फार्म तथा फार्मस्टेमा फलफूल, मौसमी तथा बेमौसमी तरकारीका साथै गाई, बाख्रा र स्थानीय जातका कुखुरा पालिएको छ ।

कृषि कर्मबाट जीविकोपार्जन गर्न सकिन्छ लक्ष्य लिएर आफूहरु सहितको समूहले एकीकृत फार्म सञ्चालनमा ल्याएको फार्मका कार्यकारी अध्यक्ष झलकप्रसाद सुवेदीले बताउनुभयो । सुवेदीका अनुसार फार्ममा उत्पादन भएको तरकारी, फलफूल, कुखुरा, अण्डा, बाख्रालगायत कृषि उपज काठमाडौंसम्म लगी बिक्री वितरण गर्ने गरिएको छ । फार्ममा कृषि उद्यमसँगै पाहुनाका लागि रोजे अनुसारको खाने बस्ने सुविधाको फार्मस्टे पनि सञ्चालनमा रहेको उहाँले बताउनुभयो । ‘एकीकृत फार्म अवलोकन गर्ने, खाने, बस्ने र रमाउने सुविधासहित अर्गानिक फार्म तथा फार्मस्टे चलाइरहेका छौं ।’ कार्यकारी अध्यक्ष सुवेदीले भन्नुभयो,‘हाम्रो यो कर्मबाट अरु युवावर्गलाई पनि कृषिमा केही गर्न सकिने उदाहरण हुन्छ भन्ने लागेको छ ।’

व्यवसायिक कृषि विकासमा उत्कृष्ट एवं प्रशंसनीय कार्य गरेको भन्दै अध्यक्ष सुवेदीलाई बागमती प्रदेश सरकारको कृषि विकास निर्देशनालयले शुक्रबार मात्रै पुरस्कृत गरेको थियाे ।

निर्देशनालयले नगद ५० हजार राशीसहित आ.व. २०८०/०८१ का लागि राष्ट्रपति उत्कृष्ट कृषक पुरस्कार (प्रदेशस्तर) प्रदान गरेको हो ।

सरोकार

आर्थिक

यो खबर पढेर तपाईलाई कस्तो महसुस भयो ?