काठमाडौं । वामलोकतान्त्रिक आन्दोलनमा करिब पैसठ्ठी वर्षदेखि निरन्तर सक्रिय गोविन्दराज ज्ञवालीको अभिनन्दन गरिएको छ । मधुस्थली प्रतिष्ठान बर्दिया सूर्यपटवाको आयोजनामा भएको सो कार्यक्रममा प्रमुख अतिथि पूर्वराष्ट्रपति विद्यादेवी भण्डारीले नेपालको वर्तमान परिवर्तनलाई थप सबल गराउन, देश र जनताको विकास हेतु राष्ट्रिय एकता अनिवार्य भएको बताउनुभयो ।
उहाँले अहंकारको परिणति नै देश विकासमा अवरोध रहेको भन्दै सबैले सामूहिक भाव राख्न सके देशले प्रगति गर्ने विश्वास प्रकट गर्नुभयो । ‘नेपालको राजनीतिमा पुष्पलालको विचार महत्वपूर्ण भएको र उहाँको संयुक्त जनआन्दोलनको सोचले ०४६ पछि सार्थकता पाएको’, पूर्वराष्ट्रपति भण्डारीले भन्नुभयो, ‘यसमा गोविन्दराज ज्ञवाली जस्ता निःस्वार्थ अभियन्ता, निष्ठावान् राजनीतिका योद्धाहरूको समन्वयकारी भूमिका प्रशंसनीय रहेको अविस्मरणीय छ ।’
कार्यक्रममा गोविन्दराज ज्ञवालीका विषयमा विभिन्न लेखकहरूको विचार समेटिएको अभिनन्दन ग्रन्थसमेत लोकार्पित गरिएको थियो । गुल्मीको मानकोटमा जन्मिएर अध्ययनार्थ वनारस पुग्नु भएका ज्ञवालीको राजनीतिक जीवन कम्युनिष्ट पार्टीका संस्थापक पुष्पलालको सहकर्मीका रूपमा सक्रिय हुन पुग्यो । ०३६ को जनमत संग्रहमा बहुदलका पक्षमा सक्रिय ज्ञवाली ०४६ को संयुक्त जनआन्दोलन निर्माणका एक सूत्राधारसमेत हुनुहुन्थ्यो । वामपन्थी दल र नेपाली कांग्रेसका बीच समन्वय गर्ने, सर्वोच्च नेता गणेशमान सिंहको नेतृत्वमा भएको आन्दोलनमा महत्वपूर्ण भूमिका रहेको थियो । ०४८ मा बर्दियाबाट सांसद ज्ञवालीले त्यसपछिका दिनमा कुनै पदको कुनै आकांक्षा राख्नु भएन । उहाँ साहित्य सिर्जना, विचार निर्माण र कविता लेखनको दिनचर्यामा व्यस्त हुनुहुन्छ ।
कार्यक्रममा नेपाल कम्युनिष्ट पार्टी एमालेका उपमहासचिव प्रदीप ज्ञवाली, नेपाली कांग्रेसका नेता एवं ज्ञवालीसँगै वनारस प्रवासका सहकर्मी बलदेव मजगैंया, साहित्यकार डा.तुलसीप्रसाद भट्टराई, पुष्पलाल अध्ययन समाजका अध्यक्ष राजनीतिकर्मी लोककृष्ण भट्टराई, पूर्वसांसद विना ज्ञवाली, डा.विजय ज्ञवाली र कुमार भट्टराईले गोविन्दराज ज्ञवालीको योगदान, उहाँको सरल जीवनले सिकाएको पाठ, नेपालको राजनीतिक प्रकिया र परिवर्तनमा उहाँको योगदान जस्ता अनेक विषयमा विचार प्रस्तुत गर्नुभएको थियो ।
वनारस निर्वासन क्रममा नेपालको लोकतान्त्रिक समाजवादका भाष्यकार बीपी कोइराला र साम्यवादी आन्दोलनका प्रमुख पुष्पलालका सम्बन्धमाथि अनेक राजनीतक जानकारीहरूकासाथ ज्ञवालीका सहयोद्धा बलराम उपाध्यायको योगदान बारे प्रसंगबस चर्चा गरिएको थियो ।
मधुस्थली प्रतिष्ठानकी अध्यक्ष विमला भट्टराईको अध्यक्षतामा सम्पन्न सो कार्यक्रममा ज्ञवालीकी धर्मपत्नी मधु ज्ञवाली समेतलाई सम्मानित गरिएको थियो । सो समयमा पुष्पलाल अध्ययन समाज, मधुस्थली प्रतिष्ठान, ज्ञवाली समाज आदि विभिन्न संघसंस्थाले सम्मान पत्रसमेत प्रदान गरेका थिए ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच