काठमाडौं । पछिल्लो समय निकै विवादित बन्न पुगेको उत्पादन श्री केश हेयर आयलले विश्व बजारमा नेपाली ब्राण्ड चिनाउने उत्पादकले दाबी गरेका छन् । सप्तऋषि आयल एण्ड कस्मेटिक इण्डष्ट्रिजले नेपाली युवाको लगानीमा नेपाली जडीबुटी प्रयोग गरी नेपालबाटै उत्पादन गरिएको श्री केश हेयर आयलका बारेमा नियोजितरूपमा नकारात्मक प्रचारबाजी भइरहेको पनि उनीहरूले जिकिर गरेका छन् ।
श्री केश हेयर आयलबारेको टिकाटिप्पणीबारे प्रष्टीकरण दिन सोमबार आयोजित पत्रकार सम्मेलनमा कम्पनीका प्रबन्ध निर्देशक टीकाराम बुढाथोकीले तेलमा प्रयोग गरिएका कच्चा पदार्थ तेल र जडीबुटी कपालको सुरक्षा, पोषण र उपचारमा सहयोगी, गुणस्तरीय र उपयोगी रहेको जिकिर गर्नुभयो । विभिन्न अध्ययन अनुसन्धानपछि नै उत्पादन बजारमा ल्याएको उहाँले दाबीसमेत गर्नुभयो ।
श्री केश हेयर आयल उत्पादन, भण्डारण र गुणस्तरबारेमा प्रश्न उठाए पनि सरकारको नीति र नियममा रहेर सम्बन्धित निकायबाट उत्पादन अनुमति तथा ट्रेडमार्क प्राप्त कम्पनी रहेको कम्पनीको जिकिर छ । गुणस्तरीय उत्पादन भएकै कारण कम्पनीलाई विश्वास गरी छोटो समयमै सम्पूर्ण नेपाली जनता तथा उपभोक्तामाझ विश्वबजारसम्म चिनाउन सफल भएको प्रबन्धक निर्देशक बुढाथोकीको भनाइ थियो ।
सरकारबाट जडीबुटी खेतीका लागि आवश्यक जमिन प्राप्त भए कम्पनी छिट्टै तराई, पहाड र हिमाली क्षेत्रमा जडीबुटी खेती गर्ने योजनामा रहेको, सरकारबाट प्राप्त हुने सहुलियत कर्जा, अनुदान, प्राविधिक सहयोग, छुट एवं जडीबुटी खेती गर्न आवश्यक जमिन प्राप्त हुने आशासमेत कम्पनीले लिएका उहाँले बताउनुभयो । जडीबुटीको खेती, कच्चा पदार्थ स्वदेशमै उत्पादन गर्दै देशको प्रमुख आयस्रोतका रूपमा रहेको जडीबुटीको क्षेत्रमा खोज, अध्ययन, अनुसन्धान एवं थप गुणस्तरीय वस्तु उत्पादन, स्वदेश एवं विदेशमा बिक्रीवितरण गर्ने कम्पनीको भावी योजना छ ।
कम्पनीले जडीबुटी संकलक किसान, जडीबुटी बिक्रेता उद्योगमा काम गर्ने कर्मचारी, बिक्रीवितरणमा काम गर्ने कर्मचारी गरी सयजनालाई प्रत्यक्ष एवं अप्रत्यक्षरूपमा रोजगारी दिएको जनाएको छ । पत्रकारभन्दा पनि युट्युबरको बाहुल्यता रहेको पत्रकार सम्मेलनमा अधिकांशले कम्पनीले श्री केश आयलको भ्रामक विज्ञापन प्रचारबाजी गरेर उपभोक्ता ठगिरहेको आरोप लगाएका थिए । तर, कम्पनीले भने सबै आरोपको खण्डन गरेको थियो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच