निर्वाचन प्रक्रिया तत्काल शुरु गर्न दबाब दिँदै नेपाल पत्रकार महासंघमा नाराबाजी

हिमालय टाइम्स

१५ अषाढ २०८१, शनिबार १७:२९

Read Time = 5 mins

डिजिटल संस्करण

समाचार

A A- A+

काठमाडौं । निर्वाचन प्रक्रिया तत्काल शुरु गर्न दबाब दिँदै नेपाल पत्रकार महासंघमा नाराबाजीसहितको प्रर्दशन गरिएको छ ।

नेपाल पत्रकार महासंघको आसन्न निर्वाचनका लागि शनिबार मनोनयन दर्ता गर्ने कार्यक्रम अघि नबढेपछि अध्यक्ष विपुल पोखरेलको राजीनामा माग गर्दै प्रेस चौतारी नेपाल, प्रेस सेन्टर, नेपाल लगायतका पत्रकारहरुको संघ, संगठनले काठमाडौंको सञ्चारग्रामस्थित नेपाल पत्रकार महासंघको केन्द्रिय कार्यालयमा बिरोध प्रदर्शन गरेका हुन् ।

महासंघले निर्वाचन कार्यतालिका अनुसार आज उम्मेदवारहरुले मनोनयन गर्ने कार्यतालिका थियो । तर काँग्रेस निकट प्रेस युनियन नेपालले सदस्यता नविकरणमा असहमती जनाउँदै महासंघको केन्द्रिय कार्यालयमा तालाबन्दी गरेपछि प्रेस चौतारी नेपाललगायतका संगठनहरुले निर्वाचन प्रक्रियामा तलमाथि नगर्न चेतावनी दिँदै महासंघको नेतृत्वविरुद्ध नाराबाजी गरेको हो । उम्मेदवारी दर्ता गर्ने महासंघको हरेक सदस्यको अधिकार सुरक्षित गराउनका लागि आफूहरुले महासंघको नेतृत्वको ध्यानाकर्षण गराएको प्रेस चौतारी नेपालका अध्यक्ष गणेश बस्नेतले बताउनु भयो ।

उहाँले निर्वाचन कार्यतालिका अनुसार मनोनयनको काम अघि नबढाएर निर्वाचन समिति र महासंघको नेतृत्व चुनाव हार्ने डरले भागेको भन्दै आक्रोश पनि व्यक्त गर्नुभयो । अध्यक्ष बस्नेतले निर्वाचनबाटै निर्वाचित महासंघको अध्यक्ष पोखरेलले निर्वाचनबाट भाग्ने खालको गतिविधि गर्न नहुने पनि बताउनु भयो ।

उहाँले भन्नुभयो, ‘निर्वाचनमा हारजित हुनसक्छ । तर जे भएपनि निर्वाचन प्रक्रियामा सहभागी हुनुपर्छ भनेर प्रेस चौतारी नेपालको तर्फबाट हामीले नोमिनेशन दर्ता गर्न म अध्यक्षको उम्मेदवारसहित यहाँ लिएर आएको थिएँ । तर यहाँ आउँदा ताला लागेको रहेछ । साथीहरु जम्मा हुनु भएको छ । निर्वाचन समितिका पदाधिकारीहरु कहाँ हुनुहुन्छ ? हामीले थाहा पाएका छैनौं । नेपाल पत्रकार महासंघका अध्यक्षज्यू भाग्नु भएको भन्ने जानकारी मैले पाएको छु । उहाँहरु कता भाग्नु भएको हो ? थाहा छैन । उहाँहरुले निर्वाचन प्रक्रिया अनुसार मनोनयनका लागि तयार हुनुहुन्छ भन्ने विश्वासका साथ यहाँ बसिराखेका छौं । अहिले हामी उम्मेदवारी मनोनयनका लागि आएका हौं । उम्मेदवारी मनोनयन गर्न आएका साथीहरुले मनोनयन गर्ने ठाउँ नपाएपछि गर्नु भएको होला नाराबाजी । नेपाल पत्रकार महासंघका जति सदस्य साथीहरु हुनुहुन्छ । हरेक सदस्यलाई उम्मेदवारी मनोनयन गर्ने अधिकार छ । उहाँहरु स्वतस्फूर्तः रुपमा उम्मेदवारी मनोनयन गर्न आउनु भयो । अव मनोनयन गर्न यहाँ आउँदा के भयो । नोमिनेशनका लागि साथीहरु आउनु भएको छ । र अध्यक्षज्यु यसरी भाग्नु हुन्नथ्यो भन्ने मलाई लाग्छ । यद्यपि हामी खोजिराखेका छौं । उहाँ भाग्नु हुन्न । किनभने मतदानबाटै उहाँ निर्वाचित हुनुभएको हो । उहाँ नेपाल पत्रकार महासंघको सदस्यबाट नै निर्वाचित भएको अध्यक्ष हो भने पक्कै यहाँ आउनु हुन्छ । र, स्थिति सम्हाल्नु हुन्छ भन्ने मेरो विश्वास हो ।’

नेपाल पत्रकार महासंघको निर्वाचन यही असार २२ गते तोकिएको छ । त्यसका लागि असार १५ गते (आज) मनोनयन कार्यतालिका तय गरिएको थियो । तर नेपाल प्रेस युनियनबाट निर्वाचितमहासंघको नेतृत्वको निर्वाचन भाँड्ने काम गरेको प्रेस चौतारी नेपालको आरोप छ ।

अध्यक्ष गणेश बस्नेतले महासंघलाई वैधानिक रुपमा अघि बढाउन पनि यसको निर्वाचन प्रक्रियालाई अघि बढाउनुको विकल्प नरहेको बताउनु भयो ।

सरोकार

यो खबर पढेर तपाईलाई कस्तो महसुस भयो ?