दुई दिनदेखि अवरुद्ध सडक अझै भएन सुचारु

फाइल तस्बिर

ध्रुवसागर शर्मा म्याग्दी, संवाददाता

२९ अषाढ २०८१, शनिबार ०९:१९

Read Time = 5 mins

सिफारिस

रोजगारीका नाममा मानव तस्करी

डिजिटल संस्करण

गण्डकी प्रदेश

प्रदेश समाचार

A A- A+

म्याग्दी । बिहीबार साँझदेखिको वर्षाका कारण पहिरो जाँदा अबरुद्ध बनेका बेनी–जोमसोम र बेनी दरबाङ सडक शनिबार बिहानसम्म पनि सुचारु भएका छैनन् ।

लगातारको वर्षाले गर्दा ठाउँ ठाउँमा झरेको पहिरोले सडक अवरुद्ध हुँदा बेनी जोमसोम कोरला कालिगण्डकी कोरिडोर र बेनी–दरबाङ सडकको सोझो यातायात सेवा बिहीबार साँझ देखि नै अवरुद्ध भएका थिए ।

हिमालपारीको जिल्ला मुस्ताङ जोड्ने कालीगण्डकी करिडोर अन्तर्गतको म्याग्दी क्षेत्रमा पर्ने बेनी–जोमसोम सडकको गलेश्वर–घाँसा खण्डमामा ६ स्थानमा पहिरो खसेकोले यातायात पूर्ण अवरुद्ध छ ।

प्रहरीका अनुसार पहिरोले रघुगंगा गाउँपालिका–१ तिप्ल्याङ, वडा नं २ को सिरुवारी र सोही पालिका–३ मा पर्ने बैसरीमा पहिरो खसेको छ । त्यस्तै अन्नपूर्ण गाउँपालिका–६ भीरकाटे, सोही पालिका २ को तातोपानी, वडा नं ३ मा पर्ने गुइठेभीर र रुप्सेछहरा क्षेत्रमा पहिरो खसेको छ ।

उता पश्चिम म्याग्दीलाई राष्ट्रिय राजमार्गसँग जोड्ने एकमात्र सडक बेनी–दरबाङ–मुना सडकमा पनि चार ठाउँमा पहिरो झरेको छ । पहिरो पन्छाएर सडक खुलाउने प्रयास भइरहेको भए पनि पानी परिरहेकोले समयस्या भएको प्रहरीले जनाएको छ ।

गत साता पनि पहिरोले ३ दिन यातायात अवरुद्ध भइ बिहीबार मात्र सडकमा यातायात खुलेको थियो । रातिको वर्षापछि फेरि पहिरो झरेको हो । घुमाउने भीरको पहिरो पनि बेनी–दरवाङ सडकमा नियमित दुःख दिने पहिरो मध्य एक हो ।

बेनी दरवाङ सडक खण्डको बेनी नगरपालिका ४ घुमाउने भीरमा पूर्णरुपमा सडक अवरुद्ध रहेको प्रहरीले जनाएको छ । प्रहरीका अनुसार लगातारको वर्षाले गर्दा अधिकांश सडक अवरुद्ध हुँदा ग्रामीण जनजीवनमा समस्या भएको छ ।

बेनी नगरपालिका र मङ्गला गाउँपालिकाको सिमानामा रहेको फापरखेत नजिकको घुमाउने भीरको ठाढो खोल्सोमा आएको पहिरो र गेगर सहितको लेदोले सडक अवरुद्ध भएपछि सवारी साधन र पैदल यात्रुहरु समस्यामा परेका छन् । पहिरो खसिरहेकोले सडक खुलाउने प्रयास सफल हुन नसकेको प्रहरीले जनाएको छ ।

म्याग्दीको ‘लाइफलाइन’ का रुपमा लिने गरिएको बेनी–दरबाङ सडकको फापरखेतमा सामान्य वर्षा हुँदा पनि सडक अवरुद्ध हुनेहुँदा पश्चिम म्याग्दीका वासिन्दाले सास्ती खेप्दै आएका तातोपानीका व्यवसायी हितबहादुर पुनले बताउनुभयो ।

१८ वर्षअघि सडकको मार्ग खोल्नुपूर्व नै यहाँ पहिरोको जोखिम थियो । पहिरो रोकथामका लागि दीर्घकालिन योजना नहुँदा यस खण्डमा बर्खायाममा सिधा यातायात सेवा प्रभावित हुने गरेको स्थानीय बताउँछन् । धवलागिरि, मालिका र मङ्गला गाउँपालिकालाई जिल्ला सदरमुकाम बेनी बजार जोड्ने उक्त सडक बर्खायाममा झनै जोखिमपूर्ण बन्दै गएको मालिका गाउँपालिका ६ का वडाअध्यक्ष पथबहादुर रोकाले बताउनुभयो ।

यसै गरि पश्चिम म्याग्दीका ग्रामीण सडकहरु पनि अवरुद्ध भएका छन् । विहीबार दिउँसोदेखि लगातार पानी परिरहेकोले पश्चिम म्याग्दीको दरवाङ–बिम सडक बाहेक अन्य सडकहरु अवरुद्ध हुँदा यात्रीले सास्ती भोग्नुपरेको मालिका गाउँपालिका २ रुमका बेलबहादुर विकले जानकारी दिनुभयो ।