अपांगतामैत्री कार्यक्रम ल्याउने प्रतिबद्धता

काठमाडौं । ‘अपांगता सबैको साझा सवाल, बनाउने हाम्रो अभियान’ भन्ने मूल नाराका साथ अपांगता-अभिभावक समाज नेपाल चन्द्रागिरि -१२, बलम्बुको ‘तेस्रो वार्षिक साधारणसभा तथा दोस्रो अधिवेशन’ सम्पन्न भएको छ । चन्द्रगिरि नगरपालिका नगरप्रमुख घनश्याम गिरीको प्रमुख अतिथ्यतामा अधिवेशन सम्पन्न भएको हो ।

अपांगताभएका ब्यक्ति र तिनका अभिभावकका सवालका बिषयमा नगरपालिका सधै सकारात्मक रहेको गिरीले बताउनुभयो । नगरपालिकाभित्र सबै प्रकारका अपांगता भएका ब्यक्ति अध्ययन गर्ने ‘समावेशी अपांगता विद्यालय’ स्थापना गर्न संस्थाले पहल गरोस नगरपालिका सहयोग गर्न तयार रहेकोसमेत उहाँले बताउनुभयो ।

शुभकामना मन्तव्य राख्दै विशिष्ट अतिथि नगर उपप्रमुख वसन्ती श्रेष्ठले अपांगता भएका व्यक्ति र तिनका अभिभावक लाई संगठित गर्ने कार्य संस्थाको उत्कृष्ट रहेको बताउनुभयो । उहाँले अपांगता भएका व्यक्ति र तिनका अभिभावकलाई विभिन्न प्रकारका सीप सिकाई स्वरोजगार बनाउने अभियान सञ्चालन गर्न संस्थालाई अनुरोध गर्दै उक्त अभियानमा नगरपालिकाको पूर्ण साथ सहयोग रहने प्रतिबद्धतासमेत गर्नुभएको थियो ।

यस्तै, चन्द्रागिरि नगरपालिका-१२ का वडा अध्यक्ष न्हुच्छेबहादुर महर्जनले वडाका तर्फबाट आगामी दिनमा ल्याइने कार्यक्रम अझ अपांगतामैत्री ल्याउनेसमेत प्रतिबद्धता जाहेर गर्नुभएको थियो ।

कार्यक्रममा अभिभावक गोमा लामिछाने, पूर्वशिक्षक गोविन्द खनाल, एकता समाज बहुउद्देश्यीय सहकारी संस्था लि.का उपाध्यक्ष अपसरा पौडेल, अभिभावक, निर्वाचन समिति सदस्य तथा शसत्र प्रहरीका डीएसपी राधिका श्रेष्ठ सेनले आ-आफ्नो अनुभव साझा गर्नुभएको थियो ।
साधारणसभामा संस्थाका अध्यक्ष टेकबहादुर बमले संस्थाको आव २०८०/२०८१ को वार्षिक प्रगति प्रतिवेदन तथा भावि योजना सहितको प्रतिवेदन प्रस्तुत गर्नु भएको थियो भने संस्थाका कोषाध्यक्ष सुनिता ढुंगानाले आव २०८०/२०८१ को संस्थाको आयव्यय विवरण प्रस्तुत गर्नु भएको थियोे । कार्यक्रममा स्वागत मन्तव्य संस्थाका उपाध्यक्ष विनोद सिग्देलले राख्नुभएको थियो ।

सो अवसरमा अपांगता भएका ब्यक्ति र सपाङ्ग व्यक्तिहरूको विवाहित तीन जोडिलाई सम्मानित गरिएको थियो । यस्तै, यसै वर्ष प्लसटुको परीक्षामा उत्तीर्ण एकजना अपांगता भएका छात्रालाई पनि सम्मान गरिएको थियो । कार्यक्रममा सम्मान गर्ने क्रममा केन्द्रीय बहिरा मावि.नक्साल काठमाडौंबाट २०८० को एसइई परीक्षामा उत्तीर्ण भएका २६ जना बहिरा अपांगता भएका विद्यार्थीलाई पनि सम्मान गरिएको थियो ।

कार्यक्रममा एकता समाज बहुउद्देश्यीय सहकारी संस्था लि.बलम्बुको आर्थिक सहयोगमा एकजना अपांगता भएका व्यक्तिलाई कमोड चियर समेत वितरण गरिएको थियोे ।

संस्थाको आगामी दुई वर्षका लागि नयाँ कार्यसमिति पनि निर्विरोध निर्वाचित भएको छ । निर्विरोध निर्वाचित कार्यसमितिमा अध्यक्ष टेकबहादुर बम (अभिभावक), उपाध्यक्ष सुनिता ढुंगाना (शारीरिक अपांगता), सचिव भावना कुमारी ढकाल (अभिभावक), कोषाध्यक्ष बिनोद सिग्देल (अभिभावक), सदस्यहरू हिमबहादुर क्षेत्री (अभिभावक), भगवती रायमाझी (अभिभावक), बबुना पाखाली (अभिभावक), शजी भट्टराई (शारीरिक अपांगता) र समीक्षा घिमिरे (सुस्त श्रवण/बहिरा) रहनुभएको छ । सम्पूर्ण पदाधिकारीलाई निर्वाचन समिति संयोजक गणेशप्रसाद शर्मा न्यौपानेले सपथ खुवाई कार्यभार हस्तान्तरण गर्नु भएको थियो । कार्यक्रमको सञ्चालन संस्थाका कार्यसमिति सदस्य बबुना पाखालीले गर्नुभएको थियो ।