५१ व्यापारी तथा संस्थाले तिरेनन् भृकुटीमण्डपको लाखौं भाडा

काठमाडौं । सरकारी स्वामित्वको भृकुटीमण्डपस्थित जग्गा तथा भवनहरू भाडामा लिई भाडा तिर्न अटेरी गर्ने विभिन्न ५१ व्यक्ति तथा कम्पनीहरूको नाम समाज कल्याण परिषद्ले सार्वजनिक गरेको छ । भृकुटीमण्डप परिसरमा रहेका पसल, कबल, स्टल, भवनलगायतको जग्गा भाडामा लिई विगतमा व्यवसाय, कार्यालय सञ्चालन गरेका साथै हाल स्टल, बुथ, भवन प्रयोग गरिरहेका व्यक्ति एवं संघ संस्थाहरूलाई तत्काल बक्यौता रकम बुझाउन परिषद्ले ताकेता गरेको हो । भाडा नतिर्नेमा नेपाल पर्यटन बोर्डदेखि रिपोटर्स क्लबसम्म रहेका छन् । पटक–पटक पत्राचार, निर्देशन एवं सूचना जारी गरे पनि अटेर गरी नबुझाएकाले परिषद्को गत माघ २ गतेको निर्णयअनुसार ३५ दिनभित्र बक्यौता रकम बुझाई हिसाब मिलान गर्न ताकेता गर्दै उक्त समयभित्र पनि बक्यौता नबुझाएमा कानुनी कारबाही प्रक्रिया अघि बढाउने परिषद्ले चेतावनीसमेत दिएको छ ।

३५ दिनभित्र बक्यौता रकम बुझाई हिसाब मिलान नगरेमा कानुनी कारबाही प्रक्रिया अघि बढाउने समाज कल्याण परिषद्ले चेतावनी दिएको छ । भाडा नतिर्नेमा पर्यटन बोर्डदेखि रिपोटर्स क्लबसम्म रहेका छन् ।

परिषद्द्वारा जारी सूचनाअनुसार २०८१ पुससम्म नेपाल मोबाइल व्यवसायी संघले दुर्ई लाख रुपैयाँ, हृयापी डिलले पाँच लाख ८५ हजार, राइज ग्लोबलले १४ हजार ८८, नेविसंघले आठ लाख ७८ हजार चार सय ७६, उपभोक्ता मञ्च नेपालले ४० लाख ७५ हजार चार सय दुई रुपैयाँ बक्यौता तिर्न बाँकी छ ।

त्यसैगरी नेपाल पर्यटन बोर्डले १० लाख ६७ हजार नौ सय तीन, राजेन्द्र खड्काले ३१ हजार नौ सय ५६, लेदर विङ्स प्रालिले दुई हजार चार सय ९६, कराँते संघले तीन लाख ४८ हजार नौ सय ३६, रिपोटर्स क्लबले ४६ लाख ५८ हजार छ सय ४९ रुपैयाँ रहेको छ ।

त्यस्तै, सिर्जना आर्ट ग्यालरीले दुई लाख ३३ हजार सात सय ७८, काठमाडौं उपत्यका सार्वजनिक पुस्तकालयले ९४ लाख ३५ हजार तीन सय ६५, नेपाल साना पसल श्रमिक संघले तीन लाख ६० हजार नौ सय चार, ग्रामीण महिला तथा बालबालिकाले ५२ हजार ५१, नेपाल प्यारा ओलम्पिक कमिटीले पाँच लाख ७६ हजार छ सय ९१, केन्द्रीय उपभोक्ताले ७३ हजार पाँच सय ६७ र डिलु रानाले दुई लाख १५ हजार सात सय ६८ रुपैयाँ भुक्तानी गर्न बाँकी रहेको छ । त्यसैगरी लब्जीबहादुर कार्कीले चार लाख ६४ हजार एक सय ७८, लक्ष्मण श्रेष्ठले तीन लाख ५८ हजार चार सय ८३, रूपरत्न तुलाधरले दुई लाख ३८ हजार छ सय ६२, रेश्मा तुलाधरले ६५ हजार दुई सय ८९, नेपाल फोटो पत्रकार महासंघले १५ लाख ५२ हजार पाँच सय ९० रुपैयाँ भुक्तानी गर्न बाँकी रहेको छ ।

नेपाल नेत्रहीन संघले ३९ लाख ८२ हजार दुई सय छ, नेपाल अपांग समाज बहुउद्देश्यीय संस्थाले चार लाख ९५ हजार चार सय ६४, शनदकुमार श्रेष्ठले ३१ हजार एक सय ६२, रोहित बस्नेतले तीन हजार तीन सय ४९, गणेशमान सिंह अध्ययन प्रतिष्ठानले २९ लाख २९ हजार पाँच सय ४१ रुपैयाँ तिर्न बाँकी रहेको छ ।

त्यस्तै, विश्वबहादुर जोशीले आठ लाख ३१ हजार एक सय ८२, राष्ट्रिय अपांग महासंघले ९७ लाख ९५ हजार सात सय ३१, पिसी सिटी नेटवर्कले एक लाख २२ हजार आठ सय एक, डाइरेक्सन नेपालले १२ लाख ३७ हजार तीन सय ६४, कृष्णबहादुर गुरुङले एक लाख ३५ हजार तीन सय ९४, दलबहादुर शाहीले पाँच लाख १४ हजार सात सय ३७ रुपैयाँ रहेको छ ।

त्यसैगरी मुकुन्दमान प्रधानले दुई लाख ८७ हजार तीन सय ६२, रोशनी श्रेष्ठले १६ लाख छ हजार दुई सय ३०, बालकृष्ण कुचिकारले ३६ हजार ४३, विनोद तण्डुकारले दुई लाख १० हजार तीन सय ३३, माइकल लामाले १६ हजार आठ सय ६८, नेपाल राष्ट्रिय कर्मचारी संगठनले १९ लाख ५१ हजार नौ सय ४५, नेपाल पत्रकार महासंघले ६१ हजार तीन सय ३७, काठमाडौं उपत्यका सार्वजनिक पुस्तकालयले एक करोड ४६ लाख पाँच सय ९९ रुपैयाँ भुक्तानी गर्न बाँकी छ ।

बालबालिकाका निम्ति गैरसरकारी संघले ७५ लाख दुई हजार पाँच सय ६७, राजनीतिक पीडित सहायताले एक लाख ७६ हजार नौ सय १७, लोकतान्त्रिक शहीद तथा घाइते समाजले ११ लाख ५५ हजार दुई सय ८०, नेपाल पत्रकार महासंघले २७ लाख ७१ हजार तीन सय ९८, नेपाल हिृवलचियर क्लबले २७ लाख ४६ हजार दुई सय २१, नेपाल राष्ट्रिय अपांग मानव अधिकार संरक्षण मञ्चले १६ लाख ६९ हजार आठ सय ९२, स्थानीय विकास मन्त्रालयले दुई लाख ३७ हजार एक सय १९ र यशोदाकुमारी सेट्टीले पाँच लाख ८१ हजार एक सय ८७ रुपैयाँ भुक्तानी गर्न बाँकी रहेको सूचनामा उल्लेख छ । विभिन्न शक्ति केन्द्र र राजनीतिक दबाबका कारण परिषद्ले विगत लामो समयदेखि कतिपय व्यक्ति तथा संस्थाहरूसँग बक्यौता असुली गर्न नसकेको बताइन्छ ।