लन्डन । च्याम्पियन्स लिगअन्तर्गतको बहुप्रतिक्षित खेलमा इंग्लिस क्लब म्यानचेस्टर सिटीले स्पेनिस महारथी रियल म्याड्रिडलाई पराजित गरेको छ । सेमिफाइनल चरणको पहिलो लिगमा घरेलु मैदान इतिहाद रंगशालामा सिटीले म्याड्रिडमाथि चार/तीनको रोमाञ्चक जित हात पारेको हो ।
सिटीको जितमा केभिन डे ब्रुएना, ग्याब्रिएल जेसस, फिल फोडेन र बर्नार्डो सिल्भाले एक/एक गोल गर्नुभयो । रियलका लागि फरवार्ड करिम बेन्जेमाले दुई तथा भिनिसियस जुनियरले एक गोल फर्काउनुभयो ।
खेलको दोस्रो मिनेटमा नै डे ब्रुएनको गोलमा सिटीले अग्रता लिएको थियो । त्यसको १० मिनेट नबित्दै जेससले सिटीको अग्रता दोब्बर पार्नुभयो । बेन्जेमाले ३३औँ मिनेटमा गोल गर्दै रियललाई खेलमा फर्काउने संकेत गर्नुभयो ।
तर, दोस्रो हाफको सुरुवातमा फोडेनले गोल गर्दै सिटीलाई फेरि दुई गोलको अग्रता दिलाउनुभयो । तर, भिनिसियसले त्यसको दुई मिनेटमा रियलका तर्फबाट एक गोल फर्काउनुभयो । ७४औँ मिनेटमा सिटीले सिल्भाको गोलमा चार/दुईको अग्रता बनाएको थियो ।
तर, खेलको अन्त्यतिर बेन्जेमाले पेनाल्टीमार्फत् एक गोल फर्काउनुभएको थियो । सिटीका डिफेन्डर एमेरिक लापोर्टले पेनाल्टी क्षेत्रभित्र हृयान्ड गरेपछि प्राप्त पेनाल्टीमा उहाँ चुक्नुभएन । अब दोस्रो लिग अर्को साता रियलको घरेलु मैदान सान्टियागो बर्नाबाउमा हुनेछ ।
खेलमार्फत् बेन्जेमाले रियलको जर्सीमा ६०० खेलको आँकडा पूरा गर्नुभएको छ । उहाँले रियलका अर्का लेजेन्ड पाको जेन्टोको ६०० खेलको कीर्तिमानलाई बराबरी गर्नुभएको हो । उहाँले कीर्तिमानी खेलमा दुई गोल थप्दै खेललाई अविस्मरणीय बनाउनुभयो । यो सिजनमा उहाँले ४१ खेलमा आफ्नो गोलसंख्या ४१ पुर्याउनुभएको छ ।
सिटीविरुद्धको दुई गोलसँगै उहाँ यो सिजनको च्याम्पियन्स लिगको सर्वाधिक गोलकर्ताको सूचीमा शीर्षस्थानमा उक्लिनुभएको छ । च्याम्पियन्स लिगमा बेन्जेमाले आफ्नो गोलसंख्या १४ पुर्याउनुभएको छ । बेन्जेमाले प्रि-क्वाटरफाइनलमा फ्रान्सेली क्लब पेरिस सेन्ट जर्मेन (पिएसजी) विरुद्ध तीन गोल, क्वाटरफाइनलमा चेल्सीविरुद्ध चार गोल र सेमिफाइनलमा सिटीविरुद्ध दुई गोल गरिसक्नुभएको छ ।
यो ४१ गोलसँगै बेन्जेमा रियल म्याड्रिडको इतिहासमा क्रिस्टियानो रोनाल्डो, फेरेन्क पुस्कास, अल्फ्रेडो डि स्टेफानो र हृयुगो सान्चेजपछि एकै सिजनमा ४० गोलको आँकडा पूरा गर्ने पाँचौँ खेलाडी बन्नुभएको छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच