पोखरा । हिमश्री फुड्स प्रालिले यहाँको चर्चित आहा रारा पोखरा गोल्डकप फुटबल प्रतियोगितालाई थप १० वर्ष मुख्य प्रायोजन गर्ने भएको छ । सहारा क्लब पोखराले २० वर्षअघिदेखि सञ्चालन गर्दै आएको सो फुटबल प्रतियोगितालाई हिमश्री फुड्सले सुरुवातदेखि नै मुख्य प्रायोजन गर्दै आएकामा थप १० वर्षका लागि तेस्रोपटक साथ दिने गरी सम्झौतामा बुधबार हस्ताक्षर गरिएको हो । सम्झौतामा हिमश्री फुड्स प्रालिका कार्यकारी अध्यक्ष प्रेमकुमारी केसी र क्लबका अध्यक्ष हरिराम गुरुङ (सुरज) ले हस्ताक्षर गर्नुभएको छ ।
सम्झौताअनुसार सहारा क्लबलाई मुख्य प्रायोजक हिमश्री फुड्स प्रालिले वार्षिकरूपमा आगामी पहिलो तीन वर्ष १८ लाख, दोस्रो तीन वर्ष २१ लाख, तेस्रो तीन वर्ष २४ लाख र विसं २०८८ मा २७ लाख सहयोग गर्नेछ । हिमश्री फुड्सले यसअघि दुईपटकसम्म उक्त प्रतियोगितालाई १०÷१० वर्ष मुख्य प्रायोजकका रूपमा सहयोग गर्दै आएको छ ।
समाजसेवी उद्योगपति एवं पूर्वसांसद स्व. सूर्यबहादुर केसीको पहलमा विसं २०५९ मा आहा गोल्ड कपबाट १० वर्ष सम्झौता भएको थियो भने विसं २०६९ देखि २०७८ का लागि दोस्रोपटक आहा रारा गोल्डकपका नाममा सञ्चालन हुँदै आएको हो । विगतमा आहा राराका नाममा सञ्चालन हुँदै आएको यस प्रतियोगिता आगामी संस्करणदेखि आहा रारा पोखरा गोल्डकप फुटबलका नामबाट सञ्चालन हुने सहाराका महासचिव रामजीप्रसाद अधिकारीले बताउनुभयो ।
कार्यक्रममा प्रालिका निर्देशक किरण केसीले सहारा क्लबको समाजसेवामा थप १० वर्ष जोडिन पाएकोमा खुसी व्यक्त गर्नुभयो । पोखराको खेलकुदलाई प्रोत्साहन गर्ने आफूहरूको उद्देश्य रहेको उहाँले बताउनुभयो । केसीले भन्नुभयो, ‘सहारा क्लब प्रतियोगितामात्र होइन समाजसेवामा पनि जोडिएको छ । त्यसैले सकारात्मक काममा हाम्रो उत्पादनसँगै जोडिन पाएकोमा हामी केसी परिवार खुसी छौँ ।’
राष्ट्रिय खेलकुद परिषद्का सदस्य राजेशकुमार गुरुङले क्लबले सामाजिक कार्यमा बचत रकम खर्चिने भएकाले उक्त प्रतियोगिता सञ्चालन गर्दा पोखरा रंगशाला न्यूनतम सरसफाइ शुल्कबाहेक अन्य शुल्क लिन नमिल्ने बताउनुभयो । गण्डकी प्रदेश खेलकुद परिषद्का निवर्तमान सदस्य–सचिव तेजबहादुर गुरुङले व्यापारिक घरानाको सहयोगबाट नेपालको खेलकुद विकासमा योगदान पुग्ने बताउनुभयो ।
पोखराको आहा रारा गोल्डकप फुटबल प्रतियोगिताले आन्तरिक तथा बाहृय पर्यटन प्रवद्र्धनसहित पोखरालाई स्पोर्ट्स हब सिटीमा परिचित गराउँदै आएको छ । यस प्रतियोगिता नेपालको फुटबल इतिहासमा मोफसलको बर्सेनि निरन्तर आयोजना हुने प्रतियोगितामा पर्दछ । प्रतियोगिताबाट बचत हुने रकम क्लबले सञ्चालन गरेको फुटबल एकेडेमीमा खर्च हुँदै आएको छ । सो एकेडेमीमा देशका विभिन्न जिल्लाका विपन्न वर्गका बालक आवासीय अध्ययनसहित फुटबल प्रशिक्षण गर्दै आएका छन् ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच