पोखरा । निर्वाचन आयोगले समानुपातिक सांसदको सूची सार्वजनिक गर्दै छ । ६० सदस्यीय गण्डकी प्रदेश सभामा ३६ जना प्रत्यक्ष निर्वाचनबाट चुनिएर आइसकेका छन् । दलहरुले समानुपातिकको सूची पनि बुझाएका छन् । करिव करिव ६० सांसदको टुंगो लाग्ने अवस्थामा छ । अब निर्वाचित सांसदहरुको सपथ सबैभन्दा पहिलो कार्यसूची हुनेछ । प्रदेश प्रमुखले अधिवेशन आह्वान गरेपछि संसद बैठक सुरु हुन्छ । संसद बैठकको सुरुआतसँगै सरकार गठन प्रक्रिया चल्छ ।
गण्डकीमा सत्ता गठबन्धनको स्पष्ट बहुमत छ । केन्द्रीय राजनीति तलमाथि नभए कांग्रेस र माओवादीको गठजोडबाट यहाँ नयाँ सरकार गठन हुन्छ । तर, सरकारको नेतृत्व कसले गर्ने भन्ने चासो यतिबेला राजनीतिक बृत्तमा सुरु भएको छ । यसअघि कांग्रेसले नेतृत्व गरेका कारण आफुहरुले मुख्यमन्त्री पाउनुपर्ने दावी माओवादीको छ भने कांग्रेसले प्राकृतिक न्यायको सिद्धान्त देखाउँदै ठूलो दलले सरकारको नेतृत्व पाउनुपर्ने तर्क गरेको छ ।
जे होस्, माओवादीबाट मुख्यमन्त्री बन्ने हरिबहादुर चुमानको प्रवल सम्भावना छ । कांग्रेसमा भने प्रतिश्पर्धी बढी छन् । केन्द्रीय सदस्य सुरेन्द्रराज पाण्डे, कास्कीका विन्दुकुमार थापा, नवलपुरका सभापति महेन्द्रध्वज जिसी र पूराना नेता भोजराज अर्याल मुख्यमन्त्रीको रेसमा छन् । उनीहरु सबैजना केन्द्रीय नेतृत्वलाई खुशी पार्न तल्लिन छन् । पाण्डे र थापा संस्थापन समूहका हुन् भने जिसी र अर्याल संस्थापन इतरका नेता हुन् ।
निर्वाचित र समानुपातिकको सूची हेर्दा संस्थापन पक्षको झिनो बहुमत छ । तर, पात्रका कारण सांसदहरु यताउति हुन सक्छन् । तथापि संसदीय दलको नेता चयनमा निर्वाचन नहुने सबै नेताहरुको दावी छ । ‘सहमतिबाटै निकास निस्किन्छ । चुनाव गरेर दलको नेता चयन हुँदैन,’ पाण्डेले भन्नुभयाे, ‘पहिला समानुपातिक सूची टुंगिएपछि दलको नेता चयनको प्रक्रिया थाल्छौं ।’
जिसी पनि सहमतिबाटै जाने बताउँनुहुन्छ । ‘सहमति नै सबैभन्दा ठूलो निर्वाचन हो । प्रदेशलाई निकास दिन सक्ने र भिजन भएको मान्छे नै दलको नेता बन्ने हो,’ उहाँले भन्नुभयाे, ‘मिलाएर अघि बढ्छौं । समझदारी बन्छ भन्ने लागेको छ ।’
माओवादी नेता चुमान भने माओवादीले मुख्यमन्त्री पाउँदा आफु नै सर्वसम्मत हुने बताउँनुहुन्छ । उहाँ अघिल्लो कार्यकालमा पनि सर्वसम्मत दलको नेता हुनुभएकाे थियाे । ‘अनुभव र काम गरेको आधारमा म सर्वसम्मत दलको नेता चुनिन्छु,’ उहाँले भन्नुभयाे, ‘मुख्यमन्त्री पनि यसपालि माओवादीले पाउँछ । केन्द्रीय नेताहरुले ढुक्क हुनुस् भन्नुभएको छ ।’ गण्डकीमा कांग्रेसले २७ सीट जितेको छ भने माओवादीले ८ तथा सत्ता गठबन्धनमै एकीकृत समाजवादीका १ सांसद हुने छन् ।
मनाङबाट निर्वाचित स्वतन्त्र सांसद दीपक मनाङे (राजीव गुरुङ) एकीकृत समाजवादी प्रवेश गरेका हुन् । २२ सीट रहेको एमाले र २ सीटको राप्रपा प्रतिपक्षमा रहने सम्भावना बढी छ । मुख्यमन्त्रीका दावेदारहरु निरन्तर काठमाडौं आउजाउ गरिरहेका छन् भने नेताहरु भेट्ने दौडधुप चलिरहेको छ ।
Like
Love
Happy
Surprised
Sad
Excited
Angry
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच