रामेछाप । रामेछापको ऐतिहासिक स्थल शैलुङ क्षेत्रमा पर्यटन प्रवद्र्धन गर्ने उद्देश्यले पहिलोपटक शैलुङ अल्ट्रा म्याराथन प्रतियोगिता गरिने भएको छ । आउँदो चैत ४ गते सञ्चालन गरिने यस प्रतियोगिताको नाम शैलुङ अल्ट्रा म्याराथन २०२३ राखिएको छ ।
५५ किलोमिटर, २५ किलोमिटर र पाँच किलोमिटर दूरी गरी तीन विधामा हुन लागेको दौड प्रतियोगिताको मुख्य उद्देश्य जिल्लाको स्थानीय पर्यटन, संस्कृति र परिदृश्य प्रवद्र्धन गर्ने रहेको राष्ट्रिय खेलकुद परिषद्का सदस्य-सचिव टंकलाल घिसिङले जानकारी दिनुभयो । प्रतियोगितामा महिला÷पुरुष सबैले सहभागिता जनाउन पाउनेछन् ।
प्रतियोगितामा सहभागी हुन चाहने खेलाडीको नाम दर्ताका लागि आवेदन खुला गरिएको छ । जसमा म्याराथनमा भाग लिन चाहने नेपाली खेलाडीलाई प्रतिखेलाडी प्रवेश शुल्क दुई हजार, सार्क राष्ट्रका खेलाडीहरूलाई प्रतिखेलाडी ३ हजार र अन्य देशका खेलाडीहरूका लागि प्रति खेलाडी पाँच हजार रुपैयाँ प्रवेश शुल्क लाग्ने आयोजक संस्थाले जनाएको छ ।
म्याराथनमा सहभागी खेलाडीहरूमध्ये ५५ किलोमिटरमा प्रथम हुने खेलाडीलाई नगद ७५ हजार रुपैयाँ, दोस्रो हुने खेलाडीलाई ३५ हजार र तेस्रो हुने खेलाडीलाई २० हजार रुपैयाँ र प्रमाणपत्र प्रदान गरिनेछ । त्यस्तै, २५ किलोमिटर म्याराथनमा प्रथम हुने खेलाडीलाई नगद ४० हजार रुपैयाँ, दोस्रो हुने खेलाडीलाई २० हजार र तेस्रो हुने खेलाडीलाई १० हजार नगद र प्रमाणपत्र प्रदान गरिनेछ । त्यसैगरी पाँच किलोमिटर म्याराथनमा प्रथम हुने खेलाडीलाई नगद १५ हजार, दोस्रो हुने खेलाडीलाई १० हजार र तेस्रो हुने खेलाडीलाई नगद पाँच हजार रुपैयाँ र प्रमाणपत्र प्रदान गरिने जिल्ला खेलकुद विकास समिति रामेछापले जनाएको छ ।
म्याराथन प्रतियोगिता राष्ट्रिय खेलकुद परिषद्को आर्थिक सहयोग, जिल्ला खेलकुद विकास समिति रामेछापको व्यवस्थापन र सुनापती गाउँपालिका, खाँडादेवी गाउँपालिका र दोरम्बा शैलुुङ गाउँपालिकाको सहकार्य तथा खेलको प्रायोजकमा हिमालयन ट्रेल रनिङ रहेको छ । प्रतियोगितामा नेपालबाहेक विभिन्न देशका खेलाडीहरूको सहभागिता हुने अपेक्षा आयोजक संस्थाले लिएको छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच