न्यूनतम पारिश्रमिक निर्धारण गरेर मात्रै हुँदैन कार्यान्वयनलाई जोड दिनुस् : सञ्चारमन्त्री शर्मा

रुपन्देही । नेपाल पत्रकार महासंघको आयोजनामा शुक्रबार रुपन्देहीको लुम्बिनीमा राष्ट्रिय मिडिया सम्मेलन–२०७९ सुरु भएको छ । एक दिने राष्ट्रिय सम्मेलनमा मिडियासँग सम्बन्धित विभिन्न विषय तथा समस्याका बारेमा छलफल हुने छ ।

कार्यक्रमको उद्घाटनसत्रमा बोल्दै सञ्चारमन्त्री रेखा शर्माले पत्रकारिताको भूमिका परिवर्तन गर्न आग्रह गर्नु भएको छ । मुलुकको परिवर्तन, संविधान निर्माण लगायत सबै आन्दोलनहरुमा पत्रकारिताको छुट्टै भूमिका रहेको बताउँदै उनले अबको भूमिका फरक रहने उल्लेख गर्नु भयो ।

अबको दिनमा भएका परिवर्तनले जनतालाई के दियो भन्ने विषयमा मिडिया चनाखो हुन आवश्यक रहेको वताउनु भयो । लामो समयसम्मको प्रयासमा पनि कानून बन्न नदिने र बनेका कानूनहरु पनि कार्यान्वयन हुन नदिने अवस्थाका बारेमा मिडियाले आवाज उठाउन आवश्यक रहेको उल्लेख उहाले गर्नु भयो ।

यसैगरी मन्त्री शर्माले पत्रकारहरुको न्युनतम पारिश्रमिकको कार्यान्वयनका विषयमा सम्मेलनमा गम्भीर भएर छलफल गर्न सुझाब दिनुभयो । न्युनतम पारिश्रमिक निर्धारण गरेर मात्रै नहुने बताउँदै मन्त्री शर्माले त्यसको कार्यान्वयनलाई जोड दिनु भयो।

महासंघका सल्लाहकार डा. महेन्द्र विष्टले मिडियाको अस्तित्व बचाउनकै लागि उपाय खोज्नु पर्ने स्थितीको सिर्जना भएको वताउनु भयो । परम्परागत ढाँचाबाट मिडियालाई लामो समय धान्न सकिने अवस्था नभएको बताउँदै उहाले सोही अनुसारको पुनःसंरचना आवश्यक रहेको बताउनु भयो।

महासंघका निवर्तमान अध्यक्ष तथा सल्लाहकार गोविन्द आचार्यले सबैले चाहना गर्ने हो भने सदस्यता सुद्धिकरण सम्भव भएको उल्लेख गर्नु भयो । यसैगरी मिडियामा भएको श्रम समस्या र मिडियालाई कसरी माथी उठाउने भन्ने विषयमा गम्भीर भएर छलफल गर्न आवश्यक रहेको बताउनु भयो ।

यसैगरी मिडियाका कानून, नीति र संरचना संघीयता अनुसार बनाइनु पर्ने उल्लेख गर्नु भयो । मिडियाको दर्ता तथा नविकरण जस्ता सामान्य कुराका लागि पनि काठमाडौं धाउनु पर्ने बाध्यताको अन्त्य गरिनु पर्ने बताउनु भयो ।

अर्का सल्लाहकार निर्मला शर्मा सम्मेलनमा स्वतन्त्र प्रेसको रुपमा गम्भीर भएर छलफल गर्न आग्रह गर्नु भयो । लुम्बिनी विश्वविद्यालयका रजिष्टार तिलक आचार्यले मिडिया सधै प्रतिपक्ष भएर काम गर्नु पर्ने भए पनि समृद्धि र शान्तिको पक्षमा मिडिया सत्तापक्ष बन्न आग्रह गर्नु भयो ।
प्रेस चौतारी नेपालका अध्यक्ष गणेश बस्नेतले नेपाल पत्रकार महासंघ सरकारीकरण हुँदै गएको भन्दै टिप्पणी गर्नु भयो । महासंघले पत्रकार सम्बद्ध संगठनहरुलाई बेवास्ता गरेको भन्दै यदी त्यसो गरिए आफैलाई घातक हुने चेतावनी दिनुभयो ।

त्यसैगरी महासंघ खुट्टा नकमाइकन सुद्धिकरणमा लाग्न समेत उहाले सुझाब दिनुभयो। सुद्धिकरणका लागि प्रेस चौतारी आवश्यक सहयोग गर्न तयार रहेको बताउँदै उहाले कार्यान्वयनका लागि आग्रह गर्नु भयोे । फरक प्रसङ्गमा उहाले विज्ञापन बोर्ड विज्ञापन एजेन्सीसँग दलाली गर्न लागेको आरोप लगाउँदै सुधारका लागि आग्रह समेत गर्नु भयोे ।

प्रेस यूनियन नेपालका अध्यक्ष शिव लम्सालले आग्रह, पूर्वाग्रह रुपमा सुद्धिकरणमा लागेमा उक्त कुरा आफ्नो संगठनलाई सहिय नहुने उल्लेख गर्नु भयो । सुद्धिकरणका लागि प्रेस काउन्सिल जस्तै छुट्टै संरचना बनाएर लाग्न उहाले सुझाब दिनुभयो।

प्रेस सेन्टर नेपालका अध्यक्ष विष्णु सापकोटा ‘जुगल’ले नयाँ ल्याउने भनिएको सञ्चार विधेयक विगतमा जस्तो छलफलमै सीमित नगराउन सरकारसँग आग्रह गर्नुभयो । समाजवादी प्रेस संगठनका वरिष्ठ उपाध्यक्ष विश्वमणी सुवेदीले पत्रकारको नेतृत्व पत्रकारले नै छान्ने स्थितीको निर्माण गर्नुपर्नेमा जोड दिनुभयो।

महासंघका वरिष्ठ उपाध्यक्ष रमेश विष्टले कार्यक्रममा सहभागीहरुलाई स्वागत गर्दै सम्मेलनमा सदस्यता सुद्धिकरण तथा आर्थिक संकटले मिडियामा देखिएको असर लगायतको विषयमा छलफल गरिने बताउनु भयो । लुम्बिनी विकास कोषका उपाध्यक्ष शिक्षु मैत्तय तथा बुटवल उपमहानगरका प्रमुख खेलराज पाण्डेले कार्यक्रम सफलताको शुभकामना व्यक्त गर्नु भयो । महासंघ अध्यक्ष विपुल पोखरेलको अध्यक्षतामा कार्यक्रम भएको छ । कार्यक्रमको संस्कृति मन्त्री सुदन किराँतीले समापन गर्ने कार्यक्रम छ ।