काठमाडौं । अख्तियार दुरुपयोग अनुसन्धान आयोगले घुस रकमसहित पक्राउ परेका प्रहरी नायब निरीक्षक (सई)विरुद्ध भ्रष्टाचार मुद्दा दायर गरेको छ । दुई लाख रुपैयाँ घुससहित पक्राउ परेका जिल्ला प्रहरी कार्यालय जलेश्वर महोत्तरीका लेखापालसमेत रहेका सई विनोद विष्टविरुद्ध दुई लाख रुपैयाँ बिगो कायम गरी विशेष अदालत काठमाडौंमा बुधवार आरोप-पत्र दायर गरिएको आयोगका प्रवक्ता भोला दाहालले जानकारी दिनुभयो । उहाँका अनुसार विष्टले भवन निर्माणको म्याद थप तथा भुक्तानी प्रक्रियामा सहजीकरण गरिदिने भन्दै सेवाग्राहीसँग घुस मागेका थिए ।
सोही सूचना एवं उजुरीका आधारमा अख्तियारको टंगालबाट खटिएको टोलीले घुस रकमसहित उनलाई नियन्त्रणमा लिइएको थियो । अनुसन्धानको क्रममा विष्टले भवन निर्माणको म्याद थप र भुक्तानी प्रक्रियामा सहजीकरण गरिदिने भन्दै सेवाग्राहीसँग रकम लिएको पुष्टि भएकाले भ्रष्टाचार निवारण ऐन, २०५९ को दफा ३(१)(घ) बमोजिम कैद र बिगो बमोजिम जरिवानाको माग दाबीसहित आरोप पत्र दायर गरिएको हो ।
अख्तियारद्वारा सिम्रौनगढका तत्कालीन निमित्त प्रमुख प्रशासकीय अधिकृतसहित सात जनाविरुद्ध भ्रष्टाचार मुद्दा
अख्तियार दुरुपयोग अनुसन्धान आयोगले बाराको सिम्रौनगढ नगरपालिकाका तत्कालीन निमित्त प्रमुख प्रशासकीय अधिकृत वीरेन्द्रप्रसाद साह कानूसहित सात जना विरुद्ध भ्रष्टाचार मुद्दा दायर गरेको छ । संसदीय अनुगमन विशेष समिति मधेश प्रदेशको प्रतिवेदनसहितको उजुरीमाथि छानबिन गर्दा भ्रष्टाचार गरेको पुष्टि भएपछि बुधवार विशेष अदालत काठमाडौंमा मुद्दा दायर गरिएको अख्तियारका प्रवक्ता भोला दाहालले जानकारी दिनुभयो ।
प्रवक्ता दाहालका अनुसार सिम्रौनगढ नगरपालिकाले मधेश प्रदेश सरकारको अनुदानबाट आ.व. २०७७/०७८ मा सञ्चालित योजनाहरूमा रकम निकासा गरी योजना सञ्चालन एवं सम्पन्न नै नगराई रकम हिनामिना भएको उजुरी परेको थियो ।
उजुरीमाथि छानबिन गर्दा तत्कालीन निमित्त प्रमुख प्रशासकीय अधिकृत वीरेन्द्रप्रसाद साह कानू, लेखा अधिकृत सर्मेन्द्रप्रसाद चौधरी, इञ्जिनियर सुरेशकुमार यादव र सव-इञ्जिनियर उपेन्द्र कुशवाहाले सिम्रौनगढ नगरपालिका, वडा नं. २ स्थित रानीवास खेल मैदान निर्माण कार्यमा भए गरेको कार्यभन्दा बढी तथा साइटमा नगरे/नगराएको परिमाणको कार्य भएको भनी नापी किताबमा चढाई, झुट्टा बिल भरपाई र गलत कार्यसम्पन्न प्रतिवेदन तयार गरी भए गरेको भन्दा बढी मूल्याङ्कन गरी गराई एक लाख ५६८ रुपैयाँ भ्रष्टाचार गरेको पाइएको अख्तियारले जनाएको छ ।
सोही बराबरको बिगो कायम गरी भ्रष्टाचार निवारण ऐन, २०५९ को दफा ८ को उपदफा (४) बमोजिम सजायको मागदाबी गर्दै आरोप पत्र दायर गरिएको प्रवक्ता दाहालले जानकारी दिनुभयो ।
यस्तै, सिम्रौनगढ नगरपालिका वडा नं. २ स्थित रानीवास खेल मैदान निर्माण उपभोक्ता समितिका अध्यक्ष सोनालालप्रसाद यादव, सचिव नन्दकिशोर साह कानू र कोषाध्यक्ष गीताकुमारी साहले नगरपालिकासँग भएको सम्झौता बमोजिमको शर्त पालना नगरी, लागत अनुमान बमोजिम गर्नुपर्ने सबै कामहरू नगरी कार्य सम्पन्न भएको भनी मूल्यांकन गरी नगरपालिकामा बिल पेश गरेको पाइएकाले उनीहरू विरुद्ध पनि मुद्दा दायर गरिएको अख्तियारले जनाएको छ ।
Like
Love
Happy
Surprised
Sad
Excited
Angry
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच